حلوى التيراميسو هي حلوى إيطالية لذيذة جدًا بتتميز بنكهة القهوة القوية الموجودة بين طبقات من بسكوت السافوايار الهش اللي بيتشرب كل النكهات، وطبقات الكريمة اللي قوامها عامل زي السحاب، وفي النهاية كل الطبقات دي بتحتويها رشة من بودرة الكاكاو اللي بتدي للتيراميسو شكله النهائي المميز جدًا.
كلمة تيراميسو معناها بالعربي حرفيًا “ارفعني” أو “ابهجني”، وده بيبين قد إيه التيراميسو يعتبر واحد من الحلويات اللي بتصيبك بحالة من السعادة والبهجة بسبب نسبة القهوة والسكر الموجودين فيه، والتوازن الرائع بين كل المكونات دي في قطمة واحدة.
التيراميسو كمان من الحلويات اللي تقدري تبتكري فيها وتطوري، مع الحفاظ طبعًا على أساسيات الوصفة. وتقدري كمان تقدميه بأكتر من شكل وطريقة. عشان كده النهارده، اختارنا لك طريقة سهلة جدًا لعمل التيراميسو مش هتاخد منك وقت ولا مجهود، وكمان طريقة تقديمة لذيذة وفي منتهى الشياكة، وهي كاسات التيراميسو.
مقادير التيراميسو
المصدر cdkitchen
- 12 قطعة بسكوت سافوايار (ladyfingers)
- 1 كوب جبنة كريمي في حرارة الغرفة (أو جبنه ماسكاربون لو متوفرة)
- 1 كوب كريمة خفق
- 3 معلقة كبيرة سكر
- 2 معلقة صغيرة قهوة سريعة التحضير
- 3/4 كوب ماء مغلي
- بودرة الكاكاو الخام للتزيين
- شرائح شوكولاتة للتزيين
- 1 معلقة صغيرة بشر برتقان أو ليمون
طريقة عمل التيراميسو
المصدر jessicagavin
- في بولة، اخلطي القهوة سريعة التحضير مع الماء المغلي وقلبيهم مع بعض لحد القهوة ما تدوب تمامًا.
- في بولة تانية، اخفقي الكريمة الباردة مع السكر لحد ما يتضاعف حجمها، وتوصلي لمرحلة soft peaks بدون مبالغة في الخفق (الصورة هتوضح لك شكل الكريمة اللي المفروض تكون عليه).
- في بولة تانية، اخفقي الجبنة الكريمي أو الماسكاربون مع بشر البرتقان لحد ما تبقى هشة وطرية.
- باستخدام سباتولا، اخلطي الكريمة المخفوقة مع الجبنة بخفه عشان ما تخرجيش الهوا من المزيج.
- ابدأي بتحضير الأكواب اللي هتقدمي فيها التيراميسو: غمسي البسكوت تغميسه خفيفة جدًا في مزيج القهوة، ورصي طبقة منه في قاع الأكواب.
- ضيفي طبقة من الكريمة، وبعدها طبقة تانية من البسكوت لحد ما ينتهي الكوب، زيني الوجه برشة من بودرة الكاكاو والشوكولاتة المبشورة.
- الكمية هتكفي معاكي لعمل 4 أكواب صغيرة.
- غطي الأكواب وشيليها في التلاجة لمدة 4-6 ساعات قبل التقديم عشان تتماسك وتندمج الأطعمة جواها.
- قدميها باردة.
التعليق باستخدام حساب فيس بوك