أم علي، طبق الحلو المصري بامتياز، مكونات أم علي بسيطة جدًا وموجودة في كل بيت تقريبًا، وكمان تحضيرها سهل وسريع، بس مش أي حد يعرف يظبطها، عارفين السهل الممتنع؟ هي أم علي كده بالظبط. بطلة أصناف الحلو في بوفيهات الأفراح، أنا شخصيًا باسيب كل الأكل، وباجري أجيب لي طبق سخن ولذيذ، وعمري ما بانسى أبدًا الفرح إللي أكلت فيه أم علي حلوة ومظبوطة، الموضوع فعلًا كبير قوي بالنسبة لي!
طريقة أم علي إللي اختارناها النهارده، هنستخدم فيها عجينة الميلفي الجاهزة، الحقيقة هي الطريقة المفضلة بالنسبة لي، لإن عجينة الميلفي لما بتتغرق باللبن، بتفضل محتفظة بقوامها ومش بتعجّن بزيادة. وفي نفس الوقت، مش بتتشرب كل كمية اللبن زي طريقة أم علي بالكرواسون مثلًا، عشان كده في رأيي هي أفضل وأظبط طريقة. ودّعي الدايت وابسطي نفسك شوية، وحضري طاجن أم علي خطير يدفي البيت كله ويفرح عيلتك.
مقادير أم علي
- 1/2 ك عجينة ميلفي جاهزة
- 1 لتر لبن حليب كامل الدسم
- 1 معلقة كبيرة قشطة بلدي
- 3/4 كوب سكر أبيض
- 2 كيس فانيليا
- 1/4 كوب زبيب
للوجه
- 1 كيس بودرة كريمة الخفق
- 1/2 كوب لبن بارد لخفق الكريمة
للتقديم
- مكسرات محمصة مشكلة
- جوز هند
طريقة عمل أم علي
- في بولة، صبي اللبن البارد فوق الكريمة البودرة، واخفقيهم بالمضرب الكهربائي لحد ما يتضاعف حجمها، وسيبيها على جنب لوقت الاستخدام.
- سخني الفرن على درجة حرارة 180.
- في حلة على النار، ضيفي اللبن والسكر والفانيليا، وسخنيهم لدرجة الغليان.
- في طاجن فخار كبير، أو تقدري تقسمي الكمية في 4 طواجن فردية صغيرة، ضيفي قطع الميلفي والزبيب، وصبي فوقيهم مزيج اللبن ومعلقة القشطة وزعيها في الطاجن كله.
- وزعي الكريمة المخفوقة على وش الطاجن وافرديها كويس بسباتيولا بحيث تغطي كل السطح، وهي دي إللي هتديكي وش كريمي محمر ولذيذ.
- دخلي الطاجن الفرن المتسخن لمدة 30 دقيقة تقريبًا، وبعدها شغّلي الشواية عشان تحمري الوش وتاخدي لون وتحميرة خطيرة.
- سيبي الطاجن يبرد شوية لمدة 10 دقايق قبل التقديم، ويفضل تقديم المكسرات في بولة جانبية عشان تضاف على وش الطاجن، لإنها بتفقد قرمشتها لو ضيفتيها جوه الطاجن نفسه وقت التسوية.
لو عايزة تعرفي وصفات أكتر لأكلات شتوية هتساعدك تدفي في الشتا، ادخلي على اللينك ده
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك