الصيف بيحب الأكلات الخفيفة والحلويات الساقعة والعصاير المنعشة عشان تهوّن علينا الحر والرطوبة وترطب على القلب وتحسسنا بالانتعاش والبرودة في ظل الأجواء الصيفية. وطبعًا مفيش أحلى من الآيس كريم بنكهاته المتنوعة عشان يرطب على قلوبنا، ما افتكرش فيه حد ما بيحبش الآيس كريم، مش بس في الصيف لأنه لذيذ في كل وقت. وخروجة الآيس كريم الشهيرة مقدسة عند كتير من المصريين، ننزل نلف بالعربية ونخطف لنا كام بولة آيس كريم في كوباية أو بسكوتة تعدل الموود وتفرح كل الجماهير الصغير منها والكبير. فيه طرق كتير قوي لعمل الآيس كريم، منها المعقد اللي محتاج دقة وماكينة خاصة بإعداد الآيس كريم، واللي ما بتكونش متوفرة عند كتير مننا، ومنها طرق تانية تعتبر طرق مختصرة هتوصلك لنتيجة مرضية بأقل مجهود ومكونات. هنقولك ازاي تتعلمي طريقة عمل الآيس كريم في بدون ماكينة في البيت بسهولة ويطلع خطير.
آيس كريم. المصدر hartford
عندك طريقتين أسهل من بعض: الطريقة الأولى بتعتمد على استخدام اللبن المكثف المحلى واللي بيدي قوام رائع للآيس كريم لإنه مكثف، نسبة السكر فيه عالية وطريقة تصنيعه وصلته لإنه يبقى بقوام كريمي ويتخلص من نسبة كبيرة من الرطوبة الموجودة فيه.
أما الطريقة التانية، فبتعتمد على الفواكه المجمدة والزبادي اليوناني، واللي بيكون صحي أكتر وبرضه قوامة كريمي رائع جدًا.
ياللا بينا نتعرف بالتفصيل على أشهر وأسهل طرق عمل الآيس كريم بدون ماكينة في البيت.
الطريقة الأولى: طريقة عمل الآيس كريم بنكهة الفانيليا
آيس كريم – المصدر foodnetwork
المقادير
- 1 عبوة من اللبن المكثف المحلى (حوالي 400 جم)
- 2 كوب كريمة خفق غير محلاة (باردة جدًا)
- 2 معلقة صغيرة خلاصة الفانيليا
طريقة عمل الآيس كريم بنكهة الفانيليا
- بالمضرب الكهربائي، قومي بخفق الكريمة ولازم تكون باردة جدا لحد ما توصلي لقوام تقيل (stiff peaks)
- في بولة تانية، ضيفي الفانيليا للبن المكثف واخلطي الكريمة المخفوقة معاها على دفعات، قلبي بخفة عشان تحافظي على الهوا اللي دخلتيه للكريمة.
- صبي الآيس كريم في علبة قابلة لدخول الفريزر وسيبيه يجمد لمدة 6-12 ساعة قبل التقديم.
آيس كريم – المصدر thebakingchocolatess
ملحوظة
- لعمل آيس كريم بنكهة الفواكه، تقدري تضيفي للمقادير السابقة 1 كوب من بيوريه الفواكه اللي تحبيها: توت، فراولة، مانجو، كريز، كنتالوب، أي نوع فواكه تفضلية ويفضل يكون البيوريه ده للفواكه شبة مجمدة عشان يساعد في الوصول لقوام الآيس كريم الكريمي بسهولة.
- تقدري كمان تضيفي قطع صغيرة من الفواكه جوه الآيس كريم زي الخوخ، المشمش، الكريز، البرقوق، أو تضيفي أي نوع من المكسرات أو حبيبات الشوكولاتة أو قطع من نوع شوكولاتة بتحبيه أو قطع من البسكوت المجروش.
- لو عايزة تعملي آيس كريم بالشوكولاتة، ضيفي للمقادير الأساسية معلقتين كبيار من معجون الشوكولاتة القابلة للدهن أو الكاكاو الخام لو بتحبي نكهة الشوكولاتة الغامقة.
- تقدري تضيفي ألوان طعام جيل لتعزيز لون الآيس كريم مع بيوريه الفواكه المتنوعة حسب لون الفاكهة.
لو عايزة تعرفي تعملي حلويات من المكرونة، تعالي هنا
الطريقة التانية
آيس كريم – المصدر robustrecipes
آيس كريم – المصدر robustrecipes
المقادير
- 500 جم من الزبادي اليوناني (بارد جدًا)
- 500 جم من الفاكهة المفرزنة (موز-فراولة-كريز-توت)
- 2 معلقة كبيرة عسل أبيض
طريقة عمل الآيس كريم بدون ماكينة
- اخلطي كل المكونات في محضرة الطعام لحد ما توصلي لقوام كريمي.
- تقدري تقدمي الآيس كريم فورًا أو تحفظيه في علبة في الفريزر.
وبكده، تقدري تعملي آيس كريم صحي ليكي ولأولادك بمكونات بسيطة وبطرق سهلة جدًا، وبدون ما تحتاجي ماكينة الأيس كريم، بنتمنى لك صيف منعش ولذيذ انتي وأطفالك.
التعليق باستخدام حساب فيس بوك