محتويات المقال
المطبخ الصيني له شعبية كبيرة جدًا في مصر، وأكبر دليل على ده الطوابير اللي بنشوفها على محلات الأكل الصيني في أي مول. السر في الأكل الصيني إنه مليان مذاقات متنوعة لذيذة وجديدة على أذواقنا كمصريين، وبيجمع بين الحلو والحادق والحراق. عشان كده بيبقى عليه إقبال كبير، كنوع من أنواع الخروج عن المألوف في الأكل المصري. عشان تعملي الأكل الصيني في البيت، الموضوع محتاج شوية استعدادات سواء أدوات مطبخ معينة أو مكونات مش مألوفة ومش دايمًا متوفرة في كل بيت، يعني ما ينفعش تطلع في دماغك تطبخي لعيلتك أكل صيني وانتي مش مجهزة نفسك ولا مستعدة بمكونات الأكل الصيني الأساسية. عشان كده في المقال ده، هنقول لك إزاي تقدري تجهزي نفسك عشان تعملي أكل صيني لذيذ في بيتك، وصدقيني هتكتشفي أد إيه هو أوفر وأحلى بكتير من برة وهتاكلي براحتك الكمية اللي تحبيها.
أولًا هنتكلم عن المكونات اللي هتحتاجيها عشان تعملي ألذ أكل صيني.
1. الصوصات
أكل صيني. المصدر: pinterest
من أهم المكونات اللي بتضيف طعم مميز للأطباق الصيني وما لهاش بدايل وصعب نستغنى عنها أو نحذفها من الوصفة. اتعرفي معانا على أشهر الصوصات المستخدمة في المطبخ الصيني:
-
الصويا صوص
أكل صيني. مصدر الصورة:pinterest
الأكتر شهرة والأكتر استخدامًا في المطبخ الصيني، الصويا صوص فيه منها أنواع كتير أكثرها شيوعًا وتوافرًا في الأسواق: الصويا صوص الفاتحة والغامقة. الصويا الفاتحة بيكون فيها نسبة أعلى من الملح وبتدي مذاق قوي وما بتديش لون غامق، عشان كده هي الأفضل لتتبيل اللحوم أو الفراخ أو البحريات، ومعاها ممكن ما تحتاجيش تضيفي ملح زيادة. أما الصويا صوص الغامقة بيكون ملحها أقل لكن بتدي لون أقوى وأغمق عند إضافتها للصوصات هتخلي لون الأكلة بني غامق.
-
الأويستر صوص Oyster Sauce
أكل صيني. مصدر الصورة:asianinspirations
بيسمّوه صوص المحار وهو صوص قوامه تقيل شوية وطعمه بيجمع بين الملوحة والحلاوة، وبيستخدم مع أغلب الأكلات الصينية سواء لحوم أو فراخ أو بحريات، مش عشان اسمه صوص المحار يبقى بيقتصر على البحريات بس.
-
الهويزن صوص Hoisin Sauce
أكل صيني. مصدر الصورة:curiouscuisiniere
مصنوع من معجون فول الصويا مع توم وسكر وخل بنسب معينة. فيه طعم حادق ومسكر وبيستخدم في أطباق كتير من اللحوم والفراخ وممكن يتضاف لدريسينج السلطات الآسيوية أو كصوص تغميس جنب المقبلات الصينية زي الدامبلينج Dumplings.
-
خل الرز و زيت السمسم
أكل صيني. مصدر الصورة:gettyimages
من أكتر أنواع الزيوت استخدامًا في المطبخ الآسيوي هو زيت السمسم. وده مش بيستخدم بس للطهي، لكن هو كمان مُنَكِّه مهم جدًا. له نكهه مميزة وقوية، عشان كده لازم استخدامه يكون بحذر جدًا وبكميات قليله عشان ما يطغاش على نكهه الطبق كله. أما بالنسبة لخل الرز هو أكتر أنواع الخل استخدامًا في المطبخ الآسيوي، لو مش متوفر تقدري تبدليه بالخل الأبيض لكن بكمية أقل لأن الخل الأبيض حاد أكتر في نكهته.
-
صوص السويت شيلي وصوص الحلو والحامض sweet chili and sweet and sour sauce
أكل صيني. مصدر الصورة: daringgourmet
صوص الحلو والحامض صوص مشهور جدًا وله شعبية رهيبة، خصوصًا مع الفراخ أو الجمبري، والصوص ده تقدري تشتريه جاهز مجرد بس يتضاف مع باقي المكونات من الإزازة ويتخفف شوية، أو تقدري تحضرّيه بنفسك بمكونات سهله جدًا موجودة في كل بيت زي الكاتشب والسكر والخل. أما صوص السويت شيلي هو نوع من أنواع ما لهاش عدد من الصوصات الآسيوية الحراقة لكنه بيتميز بإنه مسكر كمان، بينفع للتغميس وخصوصًا مع السبرينج رولز ودريسينج السلاطات والتتبيل. هو صوص بصراحة متعدد الاستخدامات.
2. عجينة السبرينج رولز
أكل صيني. مصدر الصورة:recipetineats
مكون أساسي لعمل السبرينج رولز اللي تعتبر من أكتر المقبلات الصينية المشهورة والمحبوبة لإنها بتكون مقرمشه ولذيذة وبتتغمس في الصوص المفضل ليكم. العجينة بتكون موجودة مجمدة زي عجينة الجلاش أو السمبوسك بتتحشي بالخضار فقط واللي عادة بيكون كرنب وجزر وبصل، أو الخضار مع الفراخ أو مع اللحمة أو الجمبري ودي تعتبر أشهر الحشوات وبتتلف بالطريقة الموضحة في الصورة وتتقلي في زيت غزير.
3. الخضراوات
أكل صيني. مصدر الصورة:dinneratthezoo
من أهم مميزات الأكل الصيني إنه فيه كمية كبيرة من الخضراوات المتنوعة زي الفلفل بألوانه، المشروم، البصل الأبيض والأخضر، الجزر وكمان الكرنب بأنواعه. استخدام مهروس التوم والجنزبيل مع أغلب الأكلات الصينية من الحاجات اللي بتبني نكهة وطعم عطري مميز جدًا، عشان كده دايمًا حضّري برطمان فيه توم وجنزبيل طازة مفرومين ناعم جدًا واحفظيهم بشوية من الزيت النباتي وكل ما تحتاجي تعملي أكل صيني تقدري تستعمليه هيسهل عليكي الموضوع جدًا. الخضار دايمًا في الأكل الصيني بيكون مقرمش ومش مستوي بزيادة وده بيحافظ جدًا على قيمتة الغذائية وكمان ألوانه.
4. البهارات والتوابل
أكل صيني. مصدر الصورة:curiouscuisiniere
أغلب الأكل الصيني بيستمد نكهاته من الصوصات المضافة له أكتر من التوابل والبهارات، لكن برضه فيه بعض البهارات المميزة اللي بتستخدم في بعض الأكلات زي مثلًا البهارات الصينية الخمسة Chinese five spices ودي عبارة عن توليفة من خمس بهارات مميزة جدًا وهي الينسون والقرفة والقرنفل والشمر وفلفل السيشوان الشبيه جدًا بالفلفل الأسود، بيدّوا نكهة دافية ولذيذة. البهارات دي بقت متوفرة في مصر وأكتر من ماركة بتنتجها. وكمان الشطة البودرة ورقائق الفلفل الأحمر الحراق من أهم المنكهات اللي بتضيف الطعم الحراق للأكل الصيني.
5. اللحوم و الفراخ و البحريات
أكل صيني. مصدر الصورة:seriouseats
الأكل الصيني بيتطبخ بطريقة طهي اسمها الستير فراي stir fry أو التقليب السريع، ودي طريقة بتعتمد إن كل المكونات تكون متقطعة قطع صغيرة ومتساوية الحجم، عشان كده الفراخ واللحمة بيكونوا متقطعين شرايح أو مكعبات صغيرة ورفيعة عشان تستوي بسرعة. استخدمي دايمًا شرايح اللحمة الفيليه لإنها طرية جدًا وما بتحتاجش غير وقت قليل جدًا عشان تستوي، فبتكون مناسبة جدًا. وممكن كمان تستخدمي النشا والبيكينج صودا في تتبيلة أي قطعة لحمة عشان تطرّيها وتساعد إنها تستوي بشكل سريع.
6. النودلز والرز
أكل صيني. مصدر الصورة:yummy
المطبخ الصيني مشهور جدًا باستخدام أنواع كتير من النودلز والرز، ومن أشهر الأكلات دي الفرايد رايس أو الرز المقلي اللي بيعتبر وجبة هايلة لاستغلال بواقي الرز المطبوخ وأي بواقي عندك في التلاجة سواء لحوم أو فراخ. أما النودلز ففيه منها أنواع كتير جدًا، كل مطبخ من مطابخ شرق آسيا مشهور باستخدامه لنوع معين، منها نودلز البيض egg noodles ونودلز الرز أو rice noodles وأنواع تانية كتير وكلها هتلاقوها متوفرة في ركن المنتجات الآسيوية في أي سوبر ماركت كبير وفي بعض الشركات بتبيع منتجات الأكل الآسيوي كلها أونلاين وممكن توصلها لك لحد البيت.
ثانيًا: هنكلمك عن الأدوت االلي هتحتاجيها عشان تعملي الأكل الصيني أو تقدميه في البيت
أكل صيني. مصدر الصورة:chowhound
طبعًا فيه أدوات كتير تخص المطبخ الصيني والآسيوي بشكل عام منها: حلة طبخ الرز وحلة البخار المصنوعة من البامبو، بس الحقيقة أهم أداة في كل دول هي الواك، وهي أكتر حاجة هتحتاجيها عشان تطبخي أكل آسيوي في بيتك. الواك متوفرة بخامات وأسعار كتير في أغلب محلات الأدوات المنزلية. الواك مهمة جدًا لنجاح الأكل الصيني لإنها واسعة، فتقليب الأكل فيها بيكون أسهل والأكل الصيني بيعتمد على طريقة stir fry أو الطهي بالتقليب، غير إنها بتوزع الحرارة بشكل أفضل من الطاسة العادية ونتيجتها بتبقى هايلة. ولو عايزة بقى سفرتك الصينية تكتمل والمود يبقى صيني على الآخر بدّلي المعالق والشوك بالعصيان الخشب chopsticks وعلمي ولادك ياكلوا بيها لإنها فعلًا تجربة ممتعة.
ثالثًا: هنكلمك عن شوية نصايح سريعة عشان تطبخي أحلى أكل صيني
- قطّعي مكوناتك بشكل متساوي شرايح رفيعة أو مكعبات صغيرة.
- قبل ما تطبخي، حضّري كل المكونات جنبك وقطّعي كل الخضار. الأكل الصيني ما بياخدش وقت.
- اطبخي على نار عالية جدًا مع التقليب السريع واستخدمي الواك لأفضل نتيجة.
- استخدمي معجون من النشا والمياه عشان تدي قوام للصوصات، وكمان استخدمي النشا مع بياض البيض لتغطية الفراخ قبل ما تقليها عشان تعملي أحلى سويت آند ساور.
- لو الفراخ أو أي نوع بروتين تاني هيكون مقلي في الزيت دايمًا ضيفيه للصوص قبل التقديم مباشرة.
- دوقي طول ما انتي بتطبخي لحد ما توصلي لتوازن النكهات اللي يناسب ذوقك.
- و إنتي بتعملي أي وصفة آسيوية خلي بالك جدا من ترتيب نزول كل مكون خصوصا الخضار لإن في خضراوات بتستوي أسرع من غيرها والمهم إن تكون النتجية النهائية خضار مقرمش مش طري.
الكلام عن المطبخ الآسيوي مش هيخلص ومش هيكفيه مقال واحد يتكتب عنه. لكن حاولنا النهارده نجمع لك مجموعة معلومات أساسية عن أشهر مكونات المطبخ الصيني وإزاي تقدري تجهزي نفسك وتوظفي المكونات عشان تعملي أكلات صينية وتعيشي مع عيلتك تجربة أكل مختلفة جوه بيتك وعلى سفرتك.
التعليق باستخدام حساب فيس بوك