تعتبر الاستاكوزا واحدة من أكتر الأكلات الأنيقة وكمان من أعلى الأطباق سعرًا في أي مطعم شيك وفخم. نكهتها ولحمتها شبيهة جدًا بالجمبري وقوامه. لكن طبعًا فيه نسبة أكبر من اللحم إللي بيكون متركز أكتر في منطقة الذيل.
الاستاكوزا كانت من سنتين تلاتة صعب جدًا تلاقيها متوفرة غير في المطاعم والفنادق الفخمة، أو في مطاعم الأسماك الموجودة في محافظات البحر الأحمر، ولما الواحد نفسه تهفه عليها، كان لازم ياكلها في الأماكن دي. لكن دلوقتي الاستاكوزا بقت متوفرة مجمدة في أغلب السوبر ماركت الكبيرة وأماكن كتير بتبيعها مجمدة خصوصًا ذيول الإستاكوزا إللي بتكون مجمدة وجاهزة على الطبخ.
النهارده وبمناسبة الأعياد، بنقدم لك طريقة سهلة وبسيطة جدا لطبخ ذيل الاستاكوزا في الفرن، والسر كله في وقت الطهي يعني زيها زي الجمبري لو طوّلنا مدة الطبخ لحمها هيشد ويبقى زي الكاوتش.
المقادير لعمل الاستاكوزا في الفرن
- 2 ذيل استاكوزا
- 1/4 كوب زبدة في حرارة الغرفة
- ملح وفلفل
- 1 معلقة صغيرة بابريكا مدخنة
- 3 فصوص توم مهروسين
- 1/4 كوب أعشاب مشكلة مفرومة ناعم (بقدونس-زعتر-شبت-مرمرية-روزماري)
- 1/2 كوب ماء
طريقة عمل الاستاكوزا
تحضير الاستاكوزا: jessicagavin
- في بولة، اخلطي الزبدة مع التوابل والأعشاب والملح والفلفل وقلبيهم كويس بشوكة أو مضرب سلك.
- جهزي ذيول الاستاكوزا: باستخدام مقص المطبخ، قصي الذبل من الظهر وبأصابعك ابدأي افصلي اللحم عن القشرة وخرّجيه من الفتحة إللي قصيتيها عشان يتعرض أكبر جزء منه للتتبيلة ويكون شكلها حلو في التقديم.
- قسمي كمية الزبدة بين حبتين الاستاكوزا وادهنيها كويس بالزبدة المنكهة.
- في صينية للفرن، صبي 1/2 كوب من الماء إلي هيتبخر في الفرن ويساعد إن الاستاكوزا ما تكونش ناشفة، رصي الذيول في الصينية ودخليها الفرن المتسخن على حرارة 200، مدة التسوية هتختلف حسب الوزن، بالتقريب كده 4 دقايق لكل 50 جم من الوزن.
- بعد ما تخرج الاستاكوزا من الفرن، قدميها مع شرايح الليمون ورشة من الأعشاب الطازة وبألف هنا.
و بكده تقدري تحضري أكله المطاعم الفخمة جدًا في مناسبة مميزة في بيتك أوفر وأطعم.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك