محتويات المقال
البان كيك من الأكلات المحبوبة جدًا اللي بتتاكل على الفطار، والأطفال بيحبوها جدًا والظريف إنها سهلة قوي في عمايلها وممكن ولادك يشاركوكي فيها في المطبخ ويختاروا الصوصات وأنواع الفواكه المختلفة والتوبينج اللي ممكن يتاكل معاها والنهارده جبنا لك طريقة عمل البان كيك بطريقة سهلة وهش، جرّبيه وقولي لنا رأيك.
مقادير البان كيك بالعسل
1 كوب دقيق أبيض
2 معلقة صغيرة باكينج باودر
1 بيضة
½ كوب لبن رايب
¼ كوب لبن حليب
2 معلقة كبيرة عسل أبيض
1 معلقة كبيرة زبدة سايحة
1 معلقة صغيرة فانيليا
رشة ملح
طريقة عجينة البان كيك
- في بولة، اخلطي الدقيق والبيكينج باودر والملح وانخليهم في مصفاة. ده هيساعد إن البان كيك يكون هش جدًا.
- اخلطي البيض واللبن والرايب والعسل والفانيليا والزبدة السايحة بمضرب سلك.
- ضيفي خليط السوايل على المكونات الجافة واخلطي كويس لحد ما تتجانس عجينة البان كيك.
طريقة عمل البان كيك بالعسل
- سخني طاسة على نار متوسطة وادهنيها بفرشة زبدة.
- بالمعلقة صبي عجينة البان كيك وهدي النار.
- أول ما تشوفي فقاقيع على السطح، اقلبي البان كيك وابدأي تسوية الوش التاني.
- قدمي البان كيك وهو سخن مع العسل أو المابيل سيرب والزبدة.
اتعلمي هنا طريقة عمل قالب البطاطس باللحم المفروم
التعليق باستخدام حساب فيس بوك