مفيش شك إن أكلنا المصري الأصيل بيتميز بإنه حرش كده ومتبل ومليان مذاقات تفتح النفس وتجري الريق، والمصريين كمان بيعشقوا جميع أصناف المخللات والحوادق إللي لما بتتحط جنب أي أكلة بتخلي الواحد نفسه تتفتح على الأكل، ومن أشهر الأطباق دي هي البتنجان المخلل. الله عليه جنب الملوخية أو البامية، ويا سلام عليه جنب طبق كشري إسكندراني حرش ولذيذ ولا بقى لما يتحط في رغيف مع الطعمية ويضرب في الدماغ على طول وينسينا الدنيا بإللي فيها!
البتنجان المخلل البيتي لا يعلى عليه، طِعِم ولذيذ ومعمول على ذوقك، في ناس تحبه مقلي في الزيت وبعدين تخلله، وفي قول آخر بيتسلق الأول نص سلقة وبعدين يتخلل. في كلتا الحالتين هو حِرِش ولذيذ وبيحلّي أي أكلة أو ساندويتش يتحشر جواه فيخليه خيالي.
المصدر rotinrice
النهارده هشارك معاكم أحلى وصفة للبتنجان المخلل على طريقة أمي، أتمنى تحبوها وتجربوها، ويا ريت تشاركوني لو عندكم أي إضافات مميزة للبتنجان المخلل عشان تعم الفائدة.
المصدر keeprecipes
مقادير البتنجان المخلل
- 10 حبات باتنجان أسود عروس صغير الحجم
- 5 فصوص توم
- 1 قرن فلفل أخضر أو أحمر حار
- 2 ثمرة فلفل أخضر رومي مقطع مكعبات
- 1 ثمرة فلفل أحمر حلو صغيرة مقطعة مكعبات
- 1 معلقة كبيرة كمون
- 2 معلقة صغيرة نعناع مجفف
- 1/2 معلقة صغيرة شطة (اختياري)
- ملح حسب الرغبة
- 1/2 كوب عصير ليمون
- 1/4 كوب خل
للتقديم
- 1 جزرة متوسطة مبشورة
- بقدونس مفروم ناعم
طريقة عمل البتنجان المخلل
- بالسكينة قومي بعمل شق طولي في حبات البتنجان ونشفية كويس جدًا من أي رطوبة.
- قومي بقلي البتنجان في زيت غزير على حرارة متوسطة، عشان ما يفقدش طراوته أثناء القلي.
- صفي حبات الباتنجان بعد القلي في مصفاة واشطفيه شطف سريع جدا تحت مياة ساخنة جارية (الطريقة دي بتساعد على التخلص من أي زيت والحفاظ على طراوة البتنجان)
- في محضرة الطعام، ضيفي البهارات والفلفل الحار والعادي والتوم والليمون والخل، وافرمي كل المكونات فرم خشن إلى حد ما.
- صبي المزيج في بولة وضيفي له الملح حسب رغبتك، املي الشقوق إللي عملتيها في البتنجان بالخلطة إللي جهزتيها وباقي الخلطة صبيها فوق البتنجان.
- رصي حبات البتنجان في علبة محكمة الغلق وسيبيه في التلاجة لمدة 3 ساعات لليلة كاملة لطعم ونكهة أقوى.
- زينيه بالبقدونس المفروم والجزر المبشور وقدميه كطبق جانبي مع الأكلات الشرقية اللذيذة.
التعليق باستخدام حساب فيس بوك