محتويات المقال
كيك البراونيز هي واحدة من أعظم وأطعم الحلويات اللي بتعتمد في مكوناتها الأساسية على وجود الشوكولاتة. أحلى حاجة في البراونيز واللي بيميزها عن الكيك العادي قوامها وكثافتها. البراونيز ما بتكونش هشة زي كيك الشوكولاتة العادي، لكن بتكون مندّغة وكثيفة ونكهة الشوكولاتة فيها مركزة جدًا، عشان كده أفضل مرافق ليها بيكون الآيس كريم اللي بيكسر الطعم والقوام الغني المكثف ده.
ده غير كمان إنها لازم تتقدم دافية شوية أو سخنة عشان نسبة الزبدة العالية الموجودة فيها بتأثر على قوامها لما بتبرد. فالأفضل إنك تقدميها دافية عشان تستمتعي بيها وهي بتدوب في بقك. البراونيز ليها وصفات كتير جدًا وطرق كتير قوي، مكونات أساسية واحدة لكن تفاوت النسب بينها هو اللي بيدّي نتايج مختلفة شوية في القوام. وعشان البراونيز تنجح معاكي وتكون مظبوطة أيًا كانت الوصفة، فيه شوية نصايح بسيطة، هنقول لك عليها.
براونيز – المصدر realtineats
نصائح تحضير البراونيز
- استخدمي أفضل أنواع الشوكولاتة اللي تحبي تاكليها لوحدها، وأفضل أنواع الزبدة، لإن نكهتهم وجودتهم هتأثر بشكل كبير على النتيجة النهائية.
- خلي بالك من نسبة السكر الموجودة في الشوكولاتة لإنها هتأثر على الطعم النهائي للبراونيز، يعني الوصفة ذكرت إنك تستخدمي شوكولاتة غامقة وانتي استخدمتي شوكولاتة بالحليب مثلًا، هتطلع البراونيز في النهاية مسكرة زيادة.
- بلاش تبالغي في تقليب مزيج البراونيز، خصوصًا بعد إضافة المواد الجافة عشان زيادة التقليب هتخلي البراونيز ناشفة جدًا.
- مرحلة خبز البراونيز مرحلة مهمة جدًا لنجاحها، اوعي تبالغي في توقيت خبزها وخرّجيها من الفرن وهي لسه طرية نسبيًا، لإنها مع التبريد هتجمد أكتر وتتماسك.
- استخدمي دايمًا ورق الزبدة في تبطين صينية البراونيز، عشان تتأكدي إنها مش هتلزق معاكي.
ودلوقتي تعالي نشوف مع بعض وصفة سهلة ولذيذة جدًا لعمل البراونيز.
مقادير البراونيز
- 150 جم شوكولاتة غامقة
- 113 جم زبدة في حرارة الغرفة
- 2 معلقة كبيرة كاكاو خام
- 3/4 كوب سكر
- 3 بيضات في حرارة الغرفة
- 1 معلقة صغيرة فانيليا
- 3/4 كوب دقيق
- 1/4 معلقة صغيرة ملح
المصدر saltandserenity
طريقة عمل البراونيز
- سخني الفرن على درجة حرارة 180.
- في بولة كبيرة، اخلطي كل المكونات الجافة باستخدام مضرب سلك.
- في حمام مائي على نار هادية، أو في الميكرويف، ذوبي الشوكولاتة مع الزبدة.
- سيبي مزيج الشوكولاتة يبرد وبعدين ضيفي السكر والبيض وقلبي المزيج كويس باستخدام سباتولا أو معلقة خشبية.
- ضيفي مزيج المكونات الجافة وقلبي كويس بدون مبالغة.
- في صينية فرن مربعة (مقاس 20 سم)، مبطنة بورق الزبدة، صبي المزيج ودخليها الفرن لمدة 15 دقيقة. وطلعيها من الفرن وهي لسة طرية شوية من المنتصف عشان لما تبرد هتتماسك وتفضل من جوة رطبة وغنية.
- قدمي مربعات البراونيز دافية مع آيس كريم الفانيليا وصوص الشوكولاتة.
ملحوظة
- البراونيز من الحلويات القابلة للتفريز: بعد ما تبرد، قطعيها مربعات وغلفي كل مربع بالبلاستيك الشفاف وحطيهم في علبة محكمة الغلق في الفريزر، تقدري تحفظيها لمدة 3 شهور.
- تقدري تضيفي للبراونيز شيبس الشوكولاتة أو قطع من الشوكولاتة أو المكسرات في المرحلة الأخيرة مع إضافة المكونات الجافة.
- تقدري كمان تقسمي مزيج البراونيز على نصين، وفي النص تضيفي شوية من الشوكولاتة القابلة للدهن لطعم أغنى.
طريقة عمل الآيس كريم بدون ماكينة في البيت
التعليق باستخدام حساب فيس بوك