ساندويتشات البرجر، أنا باعتبرها متعة من متع الحياة، متربعة على عرش الفاست فوود والأكل المريح إللي بيسموه إخواننا الأجانب comfort food. ممتع في تحضيره، ولذيذ في أكله، أول أكلة بنفكر فيها لما نفسنا تهفنا على الفاست فوود، الصغيرين بيحبوه زي الكبار بالظبط ما بيحبوه ويقدروه. عارفة إن أغلبكم بيحب يطلبه من بره، وده مش غلط! كلنا بنحتاج للتغيير. بس البرجر البيتي من الوصفات السهلة البسيطة، وكتير من الأمهات بيحبوا يحضروه في البيت، عشان يضمنوا جودة ونضافة اللحمة إللي بيحضروا بيها البرجر لأولادهم. عشان كده، جيبنا لكم النهارده وصفة سهلة جدًا وبمكونات بسيطة لتحضير البرجر في البيت. تقدري تضاعفي الكمية وتحفظي البرجر في الفريزر بين كل قطعة والتانية تفصليهم بورق زبدة أو أكياس بلاستيك، بحيث يكون جاهز أي وقت أولادك يكون نفسهم فيه.
المقادير لتحضير ساندويتشات البرجر البيتي
لتحضير البرجر
- 500 جم لحم مفروم (نسبة الدهون 20% ويفضل تكون من لحم الكتف لمذاق أفضل)
- 1 معلقة كبيرة بودرة البصل
- 1/2 معلقة صغيرة بيكاربونات الصوديوم
- 1 معلقة صغيرة كاتشب
- 1 معلقة صغيرة مسترد
- ملح وفلفل أسود مجروش
- زبدة
للتقديم
- خبز بريوش محمص في القليل من الزبدة
- شرايح طماطم طازة
- شرايح بصل أبيض
- خيار مخلل
- خس
- شرايح من الجبن الأمريكي
لعمل الصوص
- 2 معلقة كبيرة كاتشب
- 3 معالق كبيرة مايونيز
- 1 معلقة صغيرة مسترد
- 1 معلقة كبيرة خل تفاح
- 1/2 معلقة صغيرة بابريكا مدخنة
- 1/2 معلقة صغيرة بودرة التوم
طريقة عمل ساندويتشات البرجر البيتي
البرجر – مصدر الصورة: countryliving
- لتحضير الصوص، اخلطي كل المكونات مع بعضها في بولة، واحفظيها بالتلاجة لوقت التقديم.
- لتحضير البرجر، اخلطي كل المكونات مع بعض، بدون ما تبالغي في الخلط أو تعجني اللحمة، وشكّلي البرجر بإيدك أو بمكبس البرجر. الكمية دي هتعمل معاكي حوالي 5 حبات برجر متوسطة الحجم والسُمك.
- في المرحلة دي، تقدري تخزني حبات البرجر في الفريزر عشان تكون جاهزة عندك وقت الحاجة، أو تحفظيها في التلاجة لمدة 30 دقيقة عشان ترتاح قبل التسوية.
- في طاسة أو جريل، ادهني كمية بسيطة جدًا من الزيت النباتي باستخدام فرشاة. قبل تسوية البرجر مباشرة، رشي سطحه مرة تانية بالملح والفلفل لتتبيل الطبقة الخارجية للبرجر.
- نزلي البرجر في الجريل الساخنة، وسيبيها تتحمر وتكوّن طبقة خارجية مكرملة بدون تقليب لمدة 2-3 دقايق، وبعدين اقلبيها على الجهة التانية برضه لنفس المدة.
- في المرحلة دي، تقدري تضيفي قطعة من الزبدة للبرجر لإضافة نكهة روعة، وتقدري كمان تضيفي شرايح الجبن الأمريكي وتغطي الجريل أو الطاسة وتسيبي الجبنة تسيح على نار هادية جدًا.
- ارفعي البرجر عن النار، وسيبيه يرتاح دقايق بسيطة، لحد ما تحمصي الخبز في نفس طاسة تسوية البرجر.
- حضري الساندويتشات بالإضافات إللي تحبيها وقدميها مع البطاطس المقلية والسلطة المفضلة لأولادك.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك