البسبوسة واحدة من أطعم الحلويات الشرقية المصرية الأصيلة، إللي كلنا بنحبها وفي أي مناسبة هتلاقي صينية البسبوسة هي أجمل هدية تاخديها معاكي لضيوفك، سواءً في رمضان أو غيره. كتير مننا بيفضل يشتري البسبوسة عن إنه يحضرها في البيت، وده لإن طريقة عمل البسبوسة بتكون دايمًا مختلفة وبتواجهنا معاها مشاكل كتير، أهمها مثلًا إنها بتكون مش بسبوسة أصلًا، بتبقى حاجة شبيهة بالكيكة، أو بتبقى ناشفة جدًا، أو الشربات بيسكر وما يظبطش أو تكون معجنة وطرية بزيادة عن اللزوم. النهارده جيبنا لك الوصفة المضمونة إللي هتخلي البسبوسة ناجحة جدًا معاكي بدون أي مشكلة من المشاكل إللي ذكرناها، الوصفة دي هتخليكي تتشجعي وتعمليها بدل ما تشتريها! تعالي بينا نشوف الوصفة بكل تفاصيلها بتمنى تجربيها وتحكي لنا تجربتك.
لو انتي من عشاق الكنافة، اعرفي طريقة عمل الكنافة بالقشطة
أهم معلومة لازم تعرفيها هي إن تحضير البسبوسة بيحتاج تجهيز نوعين من الشربات:
- شربات خفيف عشان نسقي بيه البسبوسة وده العامل إللي هيخليها تبقى طرية وبتدوب.
- شربات تقيل نسبة السكر فيه ضعف المياه، بحيث يكون قوامه زي العسل الأبيض، وده هيضاف لعجينة البسبوسة وهو ده المسؤول عن قوام البسبوسة المظبوط زي المحلات بالظبط.
لو فاكرة إن بلح الشام صعب، اعرفي هنا طريقة عمل بلح الشام البيتي
مقادير عمل البسبوسة
لعمل الشربات التقيل:
- 2 كوب سكر
- 1 كوب ماء
- عصير نص ليمونة (أو 1/4 معلقة صغيرة ملح ليمون)
- 1 باكيت فانيليا
لعمل الشربات الخفيف (لسقي البسبوسة بعد التسوية)
- 1 و 1/2 كوب ماء
- 1 و 1/2 كوب سكر
- 1 معلقة كبيرة سمنة
- عصير نص ليمونة
- 1 باكيت فانيليا
لتحضير خليط البسبوسة
- 500 جم سيمولينا
- 250 جم سكر
- 125 جم سمنة مذوبة (حوالي 2/3 كوب)
- 1/3 كوب من الشربات التقيل السابق تحضيره
- 150 مل لبن حليب (2/3 كوب)
- 1/4 كوباية جوز هند مبشور (اختياري)
- بندق أو لوز للوجه حسب الرغبة (ممكن تحضريها سادة أو بالمكسرات)
- 2 معلقة كبيرة سمنة في حرارة الغرفة لدهن الصينية
طريقة عمل البسبوسة البيتي
- لتحضير الشربات التقيل: في حلة صغيرة، ضيفي السكر والماء وعصير الليمون، وارفعيهم على النار لحد ما يذوب السكر ويبدأ الشربات في الغليان.
- سيبي الشربات يغلي على نار هادية لمدة 5-10 دقايق لحد ما يتقل قوامه، بعدها اطفي النار وضيفي الفانيليا وسيبيه يبرد تمامًا. (يحفظ الشربات في برطمان أو أي وعاء زجاجي محكم الغلق بعد تبريده تمامًا في التلاجة أو على رخامة المطبخ)
- لتحضير شربات سقي البسبوسة: في حلة صغيرة، ضيفي السكر والماء وعصير الليمون، وارفعيهم على النار لحد ما يذوب السكر ويبدأ الشربات في الغليان.
- سيبي المزيج يغلي لمدة 5 دقايق، اطفي النار وضيفي الفانيليا والسمنة، وسيبيه يبرد تمامًا في حرارة الغرفة (يتم سقي البسبوسة بالشربات الخفيف وهو بارد في حرارة الغرفة).
- لتحضير خليط البسبوسة: في بولة كبيرة ضيفي السميد والسمن المذوب وافركيهم بإيدك فقط بدون عجن لحد ما يمتزجوا ويتغلف السميد بالسمنة.
- في بولة قابلة لدخول المايكروييف، ضيفي الحليب والسكر ودخليهم الميكروويف لحد ما يذوب السكر تمامًا ويالحليب يكون دافي لمدة دقيقة تقريبًا.
- ضيفي الحليب الدافي والشربات التقيل وجوز الهند لمزيج البسبوسة وقلّبي بدون عجن وبدون مبالغة، فقط لحد ما تختلط المكونات (كثرة تقليب مزيج البسبوسة يؤدي إلى بسبوسة ناشفة جدًا ونتيجه غير مرضية)
- ادهني الصينية (يفضل استخدام صينية فاتحة مصنوعة من الألومينيوم) بالسمنة بوفرة، وصبي مزيج البسبوسة.
- اخبطي الصينية مرتين لتلاتة على رخامة المطبخ عشان تتوزع البسبوسة ويخرج منها أي هوا، وزعي المكسرات على الوجه في المرحلة دي واضغطيها ضغط خفيف بإيدك عشان تمسك في العجينة.
- سيبي صينية البسبوسة ترتاح قبل دخول الفرن، في حرارة الغرفة لمدة 15 دقيقة فقط.
- دخليها الفرن ويكون مسخن مسبقًا على حرارة 200 درجة لمدة 20 دقيقة أو لحد ما يحمر الوجه.
- مباشرة بعد خروج البسبوسة من الفرن، اسقيها بالشربات الخفيف وهو بارد.
- غطي البسبوسة بالفويل مباشرة بعد ما تسقيها بالشربات وسيبيها لمدة 30 دقيقة قبل التقطيع عشان تكون قطع متماسكة ومظبوطة.
ادخلي هنا عشان تعرفي طريقة عمل شربات الحلويات المختلفة
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك