محتويات المقال
البيتيفور من حلويات عيد الفطر اللي ليها معزة خاصة في قلبي، ويمكن كتير منكم زيي، بيفضلوه عن الكحك والبسكويت والغريبة كمان. بحس إنه نوع راقي جدًا من حلويات العيد، وفيه تنوع كبير في أشكاله ومذاقاته. كتير بيفتكروا إنه طريقة عمل البيتيفور في البيت من الحاجات الصعبة اللي بتاخد وقت ومجهود وبيحتاج أدوات مخصوصة، عشان كده النهارده، أنا جايبة لكم وصفة سهلة جدًا وبسيطة لعمل بيتيفور العيد، تقدري تشكليه بماكينة تشكيل البيتيفور أو بكيس الحلواني أو بالقمع أو بالكوب، اختاري المتوفر عندك والأسهل ليكي.
كمان تقدري تعملي من العجينة دي بيتيفور بالفانيليا وبالشوكولاتة لما تستبدلي مقدار من الدقيق بمقدار من الكاكاو الخام زي ما هنشوف في الوصفة. من أهم النصائح اللي أقدر أقدمها لك لحلويات العيد بشكل عام هو إنك تستخدمي الدقيق المخصص للكحك والبسكويت. وده لإنه بيبقى قليل الجلوتين وده بيديكي نتيجة هشة جدًا وبتدوب معاكي سواء للكحك أو البيتيفور أو البسكويتات وبيمنع إنها تنشف منك.
طريقة عمل البيتيفور بالفانيلا
مقادير البيتيفور بالفانيلا:
- 2 كوب دقيق مخصص للكحك والبسكويت.
- 1/2 كوب سكر بودرة.
- 180 جم زبدة في حرارة الغرفة.
- 1 بيضة.
- 1 باكو فانيليا
- رشة ملح
لحشو البيتيفور:
- مربى مشمش
- شوكولاتة سايحة
- نوتيلا
لتزيين البيتيفور:
- مكسرات مفرومة – جوز هند – شوكولاتة فاماسيل – سبرينكلز ملونة
طريقة عمل البيتيفور بالفانيلا – المصدر youtube
طريقة عمل البيتيفور بالشوكولاتة – المصدر youtube
طريقة عمل البيتيفور
- في العجان الكهربائي، باستخدام أداة الكف، اضربي الزبدة كويس لحد ما يبقى قوامها كريمي.
- ضيفي السكر البودرة واضربي كويس لمدة 10-15 دقيقة على الأقل لحد ما القوام يتضاعف ولون المزيج يفتح ويبقى هش جدًا وخفيف، الخطوة دي مهمة جدًا لنجاح البيتيفور.
- ضيفي البيضة مع الفانيليا واخفقي مرة تانية لحد البيضة ما تختفي.
- ضيفي رشة الملح للدقيق وقلبيها كويس معاه وضيفي الدقيق لمزيج الزبدة باستخدام سباتيولا على دفعات، اعملي الخطوة دي بخفة وبدون مبالغة في التقليب عشان تحافظي على هشاشة العجينة.
- حطي العجينة في كيس الحلواني أو في ماكينة البيتيفور. المهم إنك تشكليه على صينية خبز مبطنة بورق الزبدة.
- يُفضل وضع البيتيفور في التلاجة قبل الخبز لمدة ربع ساعة، اخبزي البيتيفور في فرن متسخن على درجة حرارة 170 درجة لحد ما يحمر من الأسفل لون خفيف ويفضل من فوق فاتح، ما تبالغيش في وقت الخبز عشان ما ينشفش ويفضل هش.
- ما تبدأيش تتعاملي مع البيتيفور غير بعد ما يبرد تماما. ابدأي زينيه أو احشيه بالشكل المفضل ليكي.
لعمل بيتيفور الشوكولاتة
استبدلي معلقتين من الدقيق بمعلقتين من الكاكاو الخام غير المحلى، مع نفس المقادير وطريقة التحضير السابقة.
ممكن تشوفي هنا طريقة عمل بسكويت النشادر لعيد الفطر
التعليق باستخدام حساب فيس بوك