عيد الفطر خلاص على الأبواب، وبدأت جوانا الاستعدادات الخاصة بالعيد، الكحك ولبس العيد ولعبة العيد وتسالي العيد، من الحاجات اللي إحنا بنحب نعملها في نفسنا وحقيقي مافيش أي تفسير علمي أو منطقي للي احنا بنعمله ده غير محاولة تعويض شيء ما إحنا ما نعرفش إيه هو، إننا بنقضي نهار العيد كله ناكل طول الوقت كافة اشكال التسالي والحلويات، وطبعًا كينج التسالي هو الترمس، علشان كده، هنقول لك انهارده طريقة عمل الترمس الحلو للشيف سالي فؤاد.
ما تنسيش برضه تهتمي بنفسك تجهيزات العيد: اعملي سكراب للجسم في البيت بكل سهولة
وشوفي 3 ماسكات للوجه لنضارة بشرتك في العيد
على فكرة الترمس من البقوليات، وحقيقي مليان فوائد وألياف مفيدة للجسم بجانب إن سعراته مش عالية، بس أكيد كل ده بيقع تحت شرط الاستهلاك المنطقي، مش الانهيار اللي بنعمله في نفسنا ده، بس طالما نوينا ناكله، يبقى لازم نتعلم نعمله صح ازاي، أساسي لما تيجي تشتري لو هتشتريه من العطار تطلبي منه إنه يكون ترمس حلو، لأن فيه حلو فيه مر، وبلاش منه المر ده لأنه متعب ومحتاج وقت وتغيري المياه بتاعته كذا مرة واحنا خارجين من رمضان والله ما قادرين على فرهدة الترمس، ولو هتشتريه معلب في أكياس هو بيكون كده كده ترمس حلو وسهل جدًا في عمله، فتعالي شوفي طريقته هنا.
بالصور: أفكار مبتكرة لـ تقديم العيدية للأطفال
مقادير الترمس الحلو
- كيلو ونص ترمس (ده هيعمل كمية كبيرة هتقضي العيد – غالبا يعني)
- نص معلقة كبيرة ملح
- نص معلقة كبيرة كمون
- نص معلقة باريكا أو شطة زي ما بتحبيه
طريقة عمل الترمس الحلو لسالي فؤاد
- هتجيبي الترمس وتغسليه كويس في مصفاة. وبعد كده، تنقعيه في كمية وفيرة من المياه لمدة 24 ساعة لحد ما تلاحظي إن الحبوب حجمها كبر.
- بعد كده، صفي الترمس واغسليه كويس جدًا من مياه النقع.
- هاتي حلة كبيرة من عندك وامليها كمية كافية من المياه وحطي عليها الكمون وسيبي المياه تغلي كويس وحطي فيها الترمس لحد 30 دقيقة. وبعد كده، تأكدي إنه استوى بنفسك لإن مدة التسوية أوقات بتختلف من نوع للتاني.
- بعد ما يبرد الترمس، صفيه من المياه اللي استوى فيها من غير ما تشطفيه، وحطي له مياه تاني متدوب فيها الملح (تقدري تملحيه بالقدر اللي يعجبك).
- دلوقتي الترمس بتاعك جاهز. لازم تحفظيه في التلاجة وخصوصًا في الأيام الحر دي واحفظيه منقوع في المياه بتاعته في حلة أو برطمانات زجاجية.
طريقة تقديم الترمس
دلوقتي كل واحد له شكل الترمس اللي يعجبه، فيه ناس تحبه سادة كدة زي ما هو مملح بس، فيه ناس تحبه بالباريكا أو الشطة والليمون، أو حتى عليه شوية كمون، فلما تيجي تقدميه، اعملي جنبه طبق فيه ليمون وتوابل مختلفة علشان تقدري ترضي كل الأذواق.
بس زي ما قولنا واتفقنا: كل الأكل ممكن نحصل على فايدته بالاستهلاك المعقول والمعتدل، لكن الزيادة في أي شيء حقيقي هتعمل مشكلة صحية احنا في غنى عنها، انتي هتكون خارجة من رمضان، بطنك لسه متعودة على معدلات أكل أقل من العادي، فبلاش تكتري في نهار العيد الأكل علشان تتجنبي أي مشاكل لجهازك الهضمي، وكل سنة وإنتي طيبة.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
1 comment
ماسك الترمس