محتويات المقال
ما بتقدريش تقاومي لما بتشوفيها بتنده لك ما بين كل الحلويات الموجودة في تلاجة الكافيه، تروحي رايحة فورًا على الكاشير تطلبي واحدة تشيز كيك بالتوت مع كوباية كابوتشينو عشان تطبطبي بيهم على نفسك وتفرّحيها! إيه رأيكم في المشهد ده، أصل بصراحة التشيز كيك ما ينفعش ما تتحبش.
بسكويت مقرمش ومتقلب في الزبدة، وعليه طبقة كريمية هشة ولذيذة مكوناتها الأساسية هي الجبنة حبيبة الملايين، وعليها بقى طبقة من الفواكه أو الكراميل أو المكسرات. توليفة رائعة من النكهات والطبقات والملامس المختلفة اللي حقيقي بتمتع كل الحواس مع كل قطمة.
كتير مننا معتقد إن التشيز كيك أصولها أمريكية، لكن الحقيقة التشيز كيك ظهرت في البداية في واحدة من جزر اليونان واتنقلت بعدها لإيطاليا، ومنها لدول أوروبية كتيرة جدًا، كل دولة أضافت لمساتها وغيرت وابتكرت طرق وأشكال مختلفة للتشيز كيك لحد ما وصلت لأمريكا اللي طورتها بشكل كبير، لحد ما وصلت لشكلها التقليدي الشائع والمعروف حاليًا. ده حتى اليابان دخلت في لعبة التشيز كيك، وبقينا نسمع عن التشيز كيك اليابانية المنفوشة والهشة جدًا واللي نسبة البيض فيها بتكون عالية ولها تكنيك خاص وهو ده اللي بيديها القوام المميز.
عشان كده، النهارده جيبنا لك 3 وصفات مختلفة للتشيز كيك. جربي اللي يعجبك منها، أو جربيهم كلهم مع كوباية القهوة اللي بتحبيه. استمتعي بقطعة منها بعد الأولاد ما يناموا، أو اعزمي عليها حد بتحبيه، أو استمتعي بيها انتي وأسرتك كلها. في كل الحالات، أوعدك إن البهجة هتعم بيتك والكل هيبقى سعيد.
التشيز كيك الباردة (بدون خبز وبدون جيلاتين)
المصدر justsotasty
المقادير
لحشوة الجبنة
- 350 جم جبنة كريمي في حرارة الغرفة
- 100 جم كريمة حامضة (يمكن استبدالها باللبنة)
- 2 مغلف كريم شانتيه بودرة
- 1/2 كوب سكر بودرة
- 100 مل كريمة خفق (باردة جدًا)
- 1 معلقة صغيرة بشر ليمون
- 1 باكيت فانيليا
لقاعدة البسكويت
- واحد ونص كوب بسكويت قمح مطحون
- 6-8 معالق زبدة سايحة
الطريقة
- في محضرة الطعام، اخلطي البسكويت مع الزبدة السايحة لحد ما قوامهم يكون رملي، وفي نفس الوقت، لو مسكتيهم بإيدك هيكونوا متماسكين.
- في قالب الشيز كيك (قطر 23 سم) ضعي البسكويت واكبسيه كويس باستخدام كوباية أو معلقة خشب.
- دخلي قاعدة البسكويت التلاجة لمدة 30 دقيقة تتماسك لحد ما تحضري الحشوة.
- باستخدام المضرب الكهربائي، اخفقي الجبنة الكريمي مع اللبنة والسكر والفانيليا وبشر الليمون، لحد ما توصلي لقوام كريمي ناعم.
- في بولة تانية، اخفقي الكريمة السائلة مع مغلفات الكريمة البودرة لحد ما توصلي لقوام هش، خفيف، ومتماسك.
- ضيفي خليط الكريمة لخليط الجبنة مع التقليب بخفة.
- صبي المزيج فوق قاعدة البسكويت، ودخليها التلاجة لمدة 8 ساعات أو طول الليل.
- قدمي التشيز كيك مع أي توبينج تحبيه: مربى، حشوة توت أو فراولة أو كريز، صوص شوكولاتة أو كراميل، أو قطع من الفواكه الطازة.
الشيز كيك المخبوزة (تشيزكيك نيويورك)
المصدر kraftwhatscooking
المقادير
لعمل القاعدة
- 2 كوب بسكويت قمح مطحون
- 100 جم زبدة مذابة
لحشوة الشيز كيك
- 900 جم جبنة كريمي
- 1/3 كوب كريمة خفق
- 5 بيضات
- 3 معالق كبيرة دقيق
- 1 كوب سكر أبيض
- 1 معلقة كبيرة بشر ليمون أو برتقان
- 1 معلقة صغيرة فانيليا سائلة
الطريقة
- لتحضير القاعدة، اخلطي البسكويت المطحون مع الزبدة المذابة لحد ما قوامهم يكون رملي وفي نفس الوقت لو مسكتيهم بإيدك هيكونوا متماسكين.
- في قالب التشيز كيك (قطر 23 سم) ضعي البسكويت واكبسيه كويس باستخدام كوباية أو معلقة خشب.
- دخلي قاعدة البسكوت التلاجة لمدة 30 دقيقة تتماسك لحد ما تحضري الحشوة.
- باستخدام المضرب الكهربائي، اخلطي الجبن الكريمي مع بشر الليمون والدقيق والسكر لحد ما يبقى قوامها طري، متجانس وكريمي.
- ضيفي البيض واحدة واحدة مع الفانيليا، واضربي لحد ما يمتزجوا تمامًا، وبعدين ضيفي كريمة الخفق وكملي ضربها بالمضرب لحد ما توصلي لقوام كريمي متجانس.
- صبي المزيج فوق قاعدة البسكويت، واخبزي التشيز كيك في فرن متسخن على حرارة 180 مئوية لمدة ربع ساعة، وبعدين هتنزلي حرارة الفرن لدرجة حرارة 120 مئوية لمدة ساعة.
- قوام التشيز كيك بعد الخبز هيكون متماسك من الأطراف، لكن من النص هتكون طرية نسبيًا وبتتحرك معاكي مش جامدة.
- سيبي التشيز كيك تبرد لمدة 1/2 ساعة في الفرن وباب الفرن مفتوح قبل ما تكملي تبريدها، لحد ما توصل لدرجة حرارة الغرفة. وبعدين تحفظيها في التلاجة لمدة ليلة كاملة قبل التقديم.
- قدميها باردة مع التوبينج اللي تحبيه.
الشيز كيك اليابانية (بدون قاعدة)
المصدر biggerbolderbaking
المقادير
- 6 صفار بيض
- 225 جم جبنة كريمي
- 50 جم زبدة
- 100 مل حليب
- 60 جم دقيق
- 20 جم نشا
- 1/2 معلقة كبيرة عصير ليمون
- 1 معلقة صغيرة بشر ليمون
- 1 معلقة صغيرة فانيليا سائلة
- 1/4 معلقة صغيرة ملح
- 6 بياض بيض
- 1/2 معلقة صغيرة عصير ليمون
- 140 جم سكر
الطريقة
- سخني الفرن لدرجة حرارة 160.
- في حلة على النار، امزجي الجبنة الكريمي مع الزبدة واللبن، قلبيهم على نار هادية جدًا لحد ما يبقى قوامهم كريمي بدون أي تكتلات.
- انخلي الدقيق والنشا بالمصفاة أو المنخل.
- بعد ما ترفعي المزيج من على النار، سيبيه يبرد قبل ما تضيفي: صفار البيض، الملح، عصير وبشر الليمون والفانيليا. قلبيهم بمضرب سلك لحد ما يمتزجوا، وبعدها ضيفي الدقيق والنشا المنخولين وقلبي لحد ما توصلي لقوام ناعم وهش.
- لتحضير المارينج: في بولة نضيفة، ضيفي بياض البيض مع 1/2 معلقة من عصير الليمون والسكر واخفقيهم لحد ما توصلي لما يسمى ب(soft peaks)، وهو عبارة عن قوام متماسك لكن المزيج هيكون بيتساقط بسهولة من على المضرب. ما تبالغيش في الضرب للحفاظ على هشاشة القوام.
- ضيفي مزيج صفار البيض على دفعات للمارينج، وقلبي بخفة لحد ما يمتزجوا
- صبي المزيج في صينية التشيز كيك، وبطّني الصينية من الخارج بورق الفويل، واخبزيها في حمام مائي لمدة ساعة.
- سيبي التشيز كيك تبرد داخل الفرن لمدة نص ساعة وسيبي باب الفرن مفتوح عشان تضمني عدم هبوط الكيك بعد الخروج من الفرن.
- بردي الكيك في التلاجة لمدة 4 ساعات أو طول الليل، ورشيها بالسكر البودرة وقدميها.
التعليق باستخدام حساب فيس بوك