لما تبقي في يوم مشغولة أو راجعة من الشغل تعبانة أو حتى في وقت الحر الشديد في فصل الصيف ومش قادرة تقفي في المطبخ تعملي أكل، ساعتها هتدوري على وجبة سهلة وسريعة تقدري تنقذي بيها اليوم زي الجلاش الحادق، وبرضو لو عندك عزومة أو لو ضيف كلمك قالك إنه جاي في الطريق ومعندكيش حلو تقدميه ممكن تعملي الجلاش الحلو بسرعة وهيعجب ضيوفك ويبقى طبق شيك على سفرتك.. الجلاش بنوعيه الحلو والحادق من الوجبات السريعة والمحببة عند الكبار والأطفال كمان، لو عايزة وصفة حلوة للجلاش الحادق والحلو اقري المقال ده وهنقولك عليها.
طريقة عمل الجلاش الحادق
المكونات
- لفة جلاش
- سمن بلدي سايلة
- بيضة
- نص كوب لبن
- ملح وفلفل
- حوالي ربع كيلو من اللحم المفروم المعصج
الطريقة
- هتجيبي صينية مدورة وتدهنيها بشوية من السمنة السايلة وتفردي فيها الجلاش ولو فيه أي زيادات ممكن تقطعيها عشان تبقى متساوية مع حجم الصينية.
- اقسمي باكت الجلاش اتنين وافردي قطع الجلاش في الصينية وادهني كل طبقتين منهم بالسمنة السايلة وحطي على طبقة منهم مش مدهونة اللحمة المفرومة وافرديها عشان تكفي كل الصينية.
- بعد ما وزعتي اللحم المفروم غطيه النص التاني من قطع الجلاش وادهني السمن السايلة وآخر طبقة سيبيها من غير دهن السمن وقطعي الجلاش برفق واقسميه لقطع زي ما تحبي.
- اضربي البيض مع اللبن والملح والفلفل واسقي بيه الجلاش ودخليه الفرن على درجة حرارة متوسطة لحد ما لونه يبقى دهبي.
طريقة عمل الجلاش الحلو
المكونات
- حوالي نص كيلو من الجلاش
- مكسرات مشكلة مجروشة (بندق / لوز / فستق / زبيب / جوز هند مبشور)
- معلقة صغيرة سكر
- معلقة صغيرة قرفة
- سمنة أو زبدة سايلة
- شربات سكر
الطريقة
- حضري المكسرات اللي هتستخدميها في الجلاش وافرميها بسيط وامرجزي معاها معلقة السكر والقرفة ورشة بسيطة من شربات السكر وشيليهم على جمب.
- هاتي صينية وادهنيها البزبدة أو السمنة السايلة وافردي فيها نص كمية الجلاش وبين كل طبقتين ادهنيها بالسمنة أو الزبدة السايلة.
- وزعي مزيج المكسرات بشكل متساوي على الجلاش وغطيه بالنص المتبقي من الجلاش وادهني كل طبقتين بالسمنة أو الزبدة السايلة.
- ادهني آخر طبقة السمنة أو الزبدة وقطعييها بالأشكال اللي تحبيها ودخلي الصينية الفرن على درجة حرارة متوسطة لحد ما لونه يبقى دهبي.
- خرجيه من الفرن واحطي عليه شربات السكر.
الجلاش ممكن يتعمل بأكتر من حشوة وأكتر من شكل، فيه الجلاش الملفوف وفيه الجلاش بالمهلبية والجلاش بحشوة القراخ أو السجق وغيرهم كتير، الوصفتين اللي اتكلمنا عليهم من أسهل الوصفات اللي ممكن تعمليها للجلاش وإنتي ممكن تبدعي وتعملي الحشوات المفضلة ليكي، شاركينا بطريقتك وحشوات الجلاش المفضلة ليكي في كومنت ولو جربتي وصفتنا دي قوليلنا في كومنت وبألف هنا وشفا.
التعليق باستخدام حساب فيس بوك