الجندوفلي أو بلح البحر، من المأكولات البحرية المميزة والمحببة، واللي ممكن تعمليها كصنف مستقل، أو تضيفيها على السلطات والمكرونات والشوربات، ورغم كل المميزات دي، إلا إن مشكلته الأساسية هي تنضيفه، لإنه بيكون عالق بين الصخور في البحر، فبيدخل فيها رمل كتير، واللي لو ما اتنضفش كويس، للأسف مش بيروح مع الطبخ وهتحسي بيه تحت أسنانك وهيقل مزاجك في الأكلة كلها، عشان كده هنقولك طريقة تنضيف الجندوفلي، وطريقة عمله:
طريقة تنضيف الجندوفلي
تنضيف الجندوفلي أهم خطوة في تحضيره، لإنه لو ما اتنضفش كويس الطبخة كلها هتبوظ بسبب الرمل والفضلات اللي بتكون متعلقة فيه، وفي أكتر من طريقة لتنضيفه، بس هنقولك على أنجح طريقة:
انقعي الجندوفلي في مياه باردة لمدة ساعة، وخلال الساعة دي قلبه كل شوية في المياه، وصفيه منها، وحطي عليها مياه جديدة يتنقع فيها، لحد ما تحسي إنه خلاص مبقاش ينزل منه أي حاجة.
طريقة عمل الجندوفلي
في طرق كتير لعمل الجندوفلي، منها اللي بالكريمة ومنها اللي بخلطات مختلفة، بس هنقولك على الطريقة التقليدية اللي ما بيختلفش عليها اتنين:
مقادير عمل الجندوفلي
- كيلو جندوفلي
- 5 فص ثوم
- 3 فلفل حار
- أعواد بقدونس
- ملعقة صغيرة كمون
- ملعقة صغيرة كزبرة
- 2 ليمونة كبيرة
طريقة عمل الجندوفلي خطوة بخطوة
- حضري قلاية كبيرة وحطي فيها 3 معالق زيت على النار.
- قطعي البصل والفلفل شرايح وحطيهم على الزيت بعد ما يسخن.
- بعد دقيقة من تشويح البصل والفلفل ضيفي الجندوفلي، وبعد ما تقلبيهم كويس ضيفي عليهم البهارات (الكمون والكزبرة والملح).
- صبي كوبايتين مياه وبعدين ضيفي البقدونس، وغطيهم وسيبيهم على النار لمدة 15 دقيقة.
- جهزي طبق التقديم المناسب، واعصري الليمون بعد الغرف.
ودي مجموعة مقالات لوصفات هتحبي تجربيها:
- بالفيديو: طريقة عمل النودلز بالجمبري
- دليل محبي المحشي: أسهل وأسرع طريقة عمل محشي بيتي
- بالفيديو: 3 وصفات مختلفة باللحمة المفرومة
- بالفيديو: وصفة الماك آند تشيز بالبروكلي
وصحتين وألف هنا على قلبك.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك