محتويات المقال
عن أصل وفصل الحواوشي، حاولت أبحث وأدور. كل إللي لقيته حكايات بتقول إن مُسَمَّى الحواوشي بيرجع لاسم عائلة الشخص إللي خلط اللحمة المفرومة مع البصل جوه العيش وخبزه، ولما الأكلة حازت على إعجاب أصدقاؤه وضيوفه، بدأ يبيعها ويقدمها للجماهير، وطبعًا حازت على الإعجاب الشديد، وفضل محتفظ بسر خلطة الحواوشي إللي توارثتها أفراد العيلة كلها. والحقيقة طريقة عمل الحواوشي فيها شبه من أكلات كتير تانية في بلاد مختلفة: فكرة اللحمة المفرومة مع الخضراوات والبهارات وتستوي مع العيش أو العجين، زي اللحمة بعجين، والعرايس الشامية مثلًا. لكن بصراحة تحبيشة الحواوشي المصري في العيش البلدي أبو ردة، وعجينة الحواوشي الإسكندراني المشطشط مفيش زيهم. عشان كده، النهارده، جيبنا لك طريقة عمل الحواوشي في البيت، طعم وتحبيشة حواوشي الشارع، لكن بمكونات البيت الطازة المضمونة ليكي ولأولادك.
تقدري تدخلي على اللينك ده عشان تعرفي أكتر عن وصفات سريعة وسهلة.
طريقة عمل الحواوشي في العيش البلدي
المقادير
- 1 كيلو لحمة مفرومة (بنسبة دهون 20%)
- 2 بصلة كبيرة مفرومة
- 4 فصوص توم
- 2 ثمرة فلفل أخضر
- 1ثمرة فلفل أحمر حار (اختياري)
- حزمة بقدونس مفروم ناعم
- 1 حبة طماطم مبشورة
- 1 معلقة كبيرة طحينة
- ملح وفلفل أسود
- 1 معلقة كبيرة سبع بهارات (أو بهارات الحواوشي)
- 1 معلقة صغيرة كزبرة ناشفة
- 2 معلقة صغيرة بابريكا
- 1 معلقة صغيرة جوزة الطيب مطحونة
- 5-6 أرغفة عيش بلدي
- زيت نباتي لدهن العيش
طريقة عمل الحواوشي
- في محضرة الطعام، اخلطي اللحمة المفرومة مع البصل والتوم والفلفل الأخضر وكل التوابل واخلطيهم كويس مع بعض لحد ما يتجانسوا.
- في بولة كبيرة، صبي خلطة الحواوشي وضيفي عليها الطماطم المبشورة، الطحينة، والبقدونس المفروم ناعم، واخلطيهم بإيدك كويس لحد كل المكونات ما تتداخل مع بعض. بكده خلطة الحواوشي جاهزة.
- باستخدام مقص المطبخ، افتحي العيش البلدي لحد نصه وابدأي افردي كمية من خلطة الحواوشي جوه الرغيف بالتساوي بدون ما تبالغي في كمية اللحمة جوة الرغيف عشان تضمني تمام التسوية. اقفلي الرغيف وادهنيه كويس بزيت نباتي من كل الجهات.
- لتسوية الحواوشي في الطاسة: في طاسة سخنة على البوتجاز، هتسوّي رغيف الحواوشي المدهون بالزيت لحد ما ياخد لون على الوش الأول، اقلبيه على الوش التاني وهدّي النار تمامًا، وغطي الطاسة عشان تتأكدي من تمام تسوية اللحمة داخل الرغيف.
- لتسوية الحواوشي في الفرن: هتلفّي كل رغيف حواوشي بورق الزبدة، وترصيهم في صينية للفرن، وتدخليهم فرن متسخن على حرارة 200 لمدة 20 دقيقة، بعدها هتتخلصي من ورق الزبدة وترجعي الأرغفة تاني تحت الشواية فقط عشان تاخد لون دهبي والعيش يبقى مقرمش.
- قدمي الحواوشي ساخن مع البطاطس المحمرة والمخلل.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك