محتويات المقال
الخيار المخلل واحد من ألذ وأطعم المخللات إللي كلنا بنحبها، ومن أهم مميزاته إنه بيستخدم استخدامات كتير قوي. يعني مثلًا ممكن يضاف للساندويتشات الشرقي زي الكبدة والسجق، وكمان الغربي زي البرجر والهوت دوج بيضيف للطعم كتير قوي، وكمان تقدري تضيفيه مفروم كنوع من أنواع التوبينج لأكلات كتير، زي البطاطس المحمرة، فتة الشاورما، أو حتى السلطات.
مخلل الخيار واحد من أسهل وأسرع أنواع المخللات يعني ممكن تخلّي طريقته سهلة جدًا وما بيحتاجش ولا وقت ولا مجهود، وبما إن الخيار موجود تقريبًا في كل درج تلاجة فيكي يا مصر، جيبنا لك طريقة عمل مخلل الخيار السريع جدًا إللي تقدري تاكليه بعد ساعتين تلاتة من تخليله.
طريقة عمل مخلل الخيار السريع
المقادير
- 1 كيلو خيار (تقدري تقطعيه بأي شكل حسب رغبتك، أو تخلّيه كامل لو كان حجم الخيار صغير)
- 1/4 كوب ملح
- 1/4 كوب خل
- 2 فص توم مقطع شرايح
- 1/4 كوب كرفس مفروم
- 1 ورقة لورا
- 1 معلقة صغيرة حبوب الفلفل الإسود
- 1 قرن فلفل أحمر حار (اختياري)
- ماء مغلي حسب الحاجة
طريقة تخليل الخيار
- في بولة زجاجية، ضيفي الماء المغلي وضيفي عليه الملح والخل وقلبيهم لحد ما تدوب كل كمية الملح.
- في برطمان زجاجي معقم قومي بعمل طبقات من شرايح الخيار ووزعي بينهم باقي المكونات: التوم، الفلفل الحار، الكرفس، حبوب الفلفل الأسود وورقة اللورا.
- صبي الماء المغلي فوق الخيار لحد ما يغطيه تمامًا واقفلي غطا البرطمان بإحكام، تقدري تاكل المخلل خلال 3 ساعات. خصوصًا لو الخيار مقطع شرايح مش كامل، لكن الأفضل تستني يوم كامل لحد ما تاكلي منه.
- عشان تحافظي على الخيار المخلل مقرمش أكتر فترة ممكنة، لازم تحفظيه في التلاجة بعد الاستخدام.
نصايح مهمة قبل تخليل الخيار
- تقدري تنكهي مخلل الخيار بمنكهات متنوعة زي حبوب المستردة، أعواد الشبت، حبة البركة، حبوب الكزبرة أو الشمر.
- تقدري كمان تضيفي للكمية السابقة معلقة كبيرة من السكر لو عاوزة تضيفي نكهة مختلفة للخيار تليق أكتر مع الساندويتشات الغربية.
- تخليل حبات الخيار كاملة بدون تقطيع، بيساعد في الحفاظ عليه وبيفضل مقرمش فترة أطول، في الحالة دي هتختاري الثمرات الصغيرة في الحجم عشان تخلليها والتخليل ممكن ياخد مدة أطول شوية.
- تقدري تدي الخيار غلوة سريعة على النار قبل التخليل، لو حابة تسرعي أكتر عملية التخليل، لكن هيكون عمر المخلل قصير ويفضل استهلاكه سريعا.
ادخلي على اللينك ده عشان تعرفي طريقة عمل مخلل اللفت البيتي.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك