الديك الرومي على سفرة أي عزومة بيبقى مالي مركزه، ومتربع على عرش السفرة فوق سرير من الرز أو الشعرية مع المكسرات والذي منه، بصراحة هو بطل العزومات الكبيرة والأفراح والمناسبات السعيدة. حجمه الكبير بيخلّي ساعات ست البيت تخاف تتعامل معاه وتلجأ لأي مطعم كبير عشان يسوّيه وطبعًا بتدفع قد تمنه وأكتر عشان تسوّيه وتجهزه للأكل. تعالي في المقال ده نجرّب ناخد المغامرة مع بعض ونشوف طريقة عمل الديك الرومي بأطعم وأسهل شكل وتسوية مظبوطة جدًا في البيت.
تسوية الديك الرومي
في البداية، هنتكلم عن نقطتين مهمين جدًا لتسوية الديك الرومي في البيت:
- تسوية الديك الرومي محتاجة استعدادات، عشان كده لازم تتأكدي إن حجم فرنك هيستوعب الديك الرومي وإن يكون عندك صينية فرن مناسبة لحجم الديك عشان يستوي فيه، ويكون مرتاح في الصينية عشان تعرفي تتعاملي معاه بسهولة أثناء التسوية.
- نقع الديك الرومي في محلول ملحي: الخطوة دي مهمة جدًا عشان الديك الرومي يطلع طري ولحمه متبّل ولذيذ، والخطوة دي هتحتاج مكان في تلاجتك عشان نحتفظ بالديك في محلول النقع لمدة ما بين 5-10 ساعات. عشان كده، مهم جدًا تجهيز وعاء كبير لنقع الديك ومكان في تلاجتك لحفظه أثناء فترة النقع.
- زمن تسوية الديك بيتحدد حسب وزنه، هنعتبر إن كل 1 كيلو من الديك الرومي هيحتاج من 20-30 دقيقة للتسوية، يعني مثلًا لو عندك ديك رومي وزنه 5 كيلو هيحتاج حوالي ساعتين ونص للتسوية بالكتير.
- يفضّل يكون عندك ترمومتر قياس حرارة الأطعمة عشان ده هيسهل عليكي كتير. عشان تتأكدي إن الديك الرومي استوى تمامًا هتكون حرارته الداخلية حوالي 74 درجة مئوية.
لو عندك عزومة، اقري 7 نصايح مهمة قبل ما تعملي عزومة رمضان
مقادير عمل ديك رومي في الفرن (وزن 5-7 كيلو)
تحضير محلول النقع: (القاعدة العامة لمحلول النقع هي 1/4 كوب ملح لكل لتر من الماء)
المصدر: dinneratthezoo
- 1 كوب ملح
- 1/2 كوب سكر
- 1/2 كوب من خل التفاح
- 4 لتر ماء
- ورق لورا
- حبوب الفلفل الأسود
- فصوص الحبهان
- أعواد الروزماري
- شرايح من الليمون والبرتقال
تتبيلة الديك الرومي
المصدر: tastesbetterfromscratch
- 200 جم من الزبدة في حرارة الغرفة
- 1/4 كوب روزماري أخضر مفروم ناعم
- 2 معلقة كبيرة بودرة بصل
- 2 معلقة كبيرة بودرة توم
- 2 معلقة كبيرة بابريكا
- 1 معلقة كبيرة جنزبيل مطحون
- 1 معلقة كبيرة فلفل أبيض
- 1 معلقة كبيرة بهارات مشكلة
- 2 معلقة كبيرة بشر ليمون
- 2 معلقة كبيرة بشر برتقال
حشو الديك الرومي من الداخل
- 3 بصلة كبيرة مقطعة مكعبات
- 1 جزرة مكعبات
- أعواد روزماري طازة
- شرايح برتقال وليمون
لتسوية الديك الرومي
- 2 بصلة كبيرة شرايح
- 1 كوب كرفس مكعبات
- 1 جزرة
- كرات
- فصوص توم سليمة
- ورق لورا
- حبهان
- حبوب الفلفل الأسود
- أعواد الروزماري
طريقة عمل الديك الرومي بالخطوات
- لتحضير محلول النقع: اخلطي كل المكونات مع 2 لتر فقط من الماء وارفعيهم على النار لحد الملح والسكر ما يذوبوا تمامًا.
- صبي المزيج في الوعاء إللي هتنقعي فيه الديك، وزودي عليهم 2 لتر من الماء البارد، وسيبي المنقوع يبرد تمامًا قبل ما تحطي الديك بحرص شديد.
- غطي الديك بإحكام وسيبيه في المحلول في التلاجة لمدة من 5-10 ساعات.
- بعد مرور مدة النقع، طلعي الديك من المحلول واغسليه كويس تحت ماء جاري وصفّيه ونشفيه كويس جدًا من جوه وبره بمناديل المطبخ.
- في بولة كبيرة، اخلطي كل البهارات ومكونات التتبيلة مع الزبدة واعجنيها بإيدك بحيث تتداخل كل التوابل وبشر البرتقال والليمون مع الزبدة وتبقى زي المعجون.
- افصلي بصوابعك أو بظهر معلقة بين الجلد واللحم بتاع صدر الديك وابدأي تبلي كويس بالزبدة المنكهة إللي جهزتيها، اعملي مساج للديك من كل الجوانب بالتتبيلة كويس وسيبيه يتتبل تاني لمدة 3-4 ساعات.
- طلّعي الديك من التلاجة قبل وقت التسوية بساعة عشان يوصل لدرجة حرارة الغرفة، واحشي الديك من جوه بكل مكونات الحشوة العطرية واربطي رجلين الديك بدبارة سميكه، أو كتفيه.
- رصي الخضراوات في صينية الفرن وفوقها الديك الرومي وغطي بطبقة سميكة من الفويل ودخليه الفرن على حرارة 180 درجة، مدة التسوية حسب وزن الديك (كما ذكر مسبقًا).
- أثناء التسوية، قومي بدهن الديك بالعصارة إللي هتنزل منه إللي كلها نكهات، كل 30 دقيقة استخدمي فرشاة وادهنيه كويس.
- بعد مرور نصف زمن التسوية، شيلي الفويل عشان تساعدي الديك على التحمير والوصول للون ذهبي مميز، وطبعًا يفضل تكون مروحة الفرن شغالة عشان توزع الحرارة بشكل أفضل.
- لإضافة لون دهبي للديك الرومي تقدري تخلطي معلقتين كبار من كل من العسل الأبيض وصلصة الطماطم والصويا صوص الفاتح وتدهني بيهم الديك بعد تمام التسوية، لحد ما يوصل للون لامع وجميل.
دلوقتي عرفتي طريقة عمل الديك الرومي .. شوفي باقي حاجات العزومة من هنا.
ملحوظة مهمة جدًا
تقدري تقومي بعملية تسوية الديك الرومي بكل خطواتها السابقة باستخدام الكيس الحراري، إللي هيساعدك تحافظي على طراوة الديك الرومي، المهم إنك تقصي الكيس بعد مرور 3/4 زمن التسوية عشان الديك يتحمر وياخد لون لامع، وفي المرحلة دي هتسقيه برضه بالعصارة إللي نزلت منه وتدهنيه بمزيج العسل والصلصة والصويا للون محمر ولامع.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك