طريقة عمل الريش الضاني .. 3 وصفات أحلى من بعض

استعدوا يا جماعة! عيد الأضحى 2020 خلاص على الأبواب عيد الأكل والأكيلة، العيد المليان باللحوم وفتة العيد بوصفاتها والرقاق وكل ما لذ وطاب، أكل شرقي جميل كلنا بنحبه ونقدره. الريش يا جماعة واحدة من أجمل قطعيات اللحمة وخصوصًا الريش الضاني، ليها شعبيتها ومحبيها وزي ما بيقولوا إن “أطيب اللحم ما جاور العظم”. عشان كده، الريش الضاني مليانة طعم ونكهة عظيمة، قطعية طرية، بتستوي بسرعة، وممكن تطبخ بطرق كتير جدًا، علشان كده هنقول لك طريقة عمل الريش الضاني بوصفات جديدة وغير تقليدية.

 

فيه مننا بيحب الريش الضاني مشوية على الفحم، وطبعًا نسبة الدهون الموجودة فيها بتسيح مع الشوي وتضيف طراوة ونكهة ما حصلتش. وفيه اللي بيحب يشوحها على النار مع حتة زبدة، فاكرين فؤاد المهندس لما غنا وقال: “ريحة صواني مفحفحة.. وكوستاليتا مشوحة”؟ هي دي بقى الكوستاليتا، وساعات بتطلق على بيت الكلاوي، ودي تعتبر أطرى جزء في منطقة الريش. وفيه بقى اللي يحبها في الفرن صينية أو طاجن ريش ضاني مع الخضار. على العموم، تعددت الطرق وتظل الريش واحدة من أهم وأشهر أكلات عيد الأضحى.

 

 

النهارده جمعت لكم 3 وصفات متنوعة ولذيذة لطبخ الريش الضاني بطرق مختلفة عشان تناسب أذواقكم، كل سنة وانتم طيبين.

 

 

•  الريش الضاني المشوية

 

مقادير تتبيلة الريش الضاني المشوية

• 1 ك ريش ضاني
• 1/2 كوب مياه بصل
• 1/2 كوب عصير طماطم مصفى
• 3 فصوص توم مفروم ناعم
• 1 معلقة صغيرة نعناع مجفف
• 2 معلقة كبيرة صويا صوص
• ملح وفلفل أسود
• 1 معلقة صغيرة كبابة صيني
• 2 معلقة كبيرة عصير ليمون
• 1 معلقة كبيرة خل
• 2 معلقة صغيرة من العسل الأسود
• 1/4 كوب زيت نباتي

 

لو بتحبي المشويات، يبقى لازم تشوفي المقال ده .. دليلك لعمل أشهر تتبيلات اللحوم والفراخ والأسماك

 

 

 

طريقة عمل الريش الضاني المشوية

• اخلطي كل مكونات التتبيلة مع بعض وتبلي الريش لمدة ما تقلش عن 3-4 ساعات ويفضل ليلة كاملة.
• خرجي الريش المتبلة من التلاجة قبل ما تبدأي الشوي بمدة كافية عشان توصل لدرجة حرارة الغرفة.
• تقدري تشوي الريش الضاني في الفرن على شبكة وتحتها صينية تكون درجة حرارة الفرن 220 درجة لمدة 15 -20 دقيقة، أو على شواية البوتوجاز أو على الفحم.
• نصيحة مهمة جدًا عند الشوي على الفحم: خلّي دايمًا جزء من الشواية ما يكونش معرض للفحم عشان اللحمة بعد الشوي ترتاح بدون ما تستوي زيادة وبدون ما تبرد.
• أثناء الشوي، تقدري تخلّي دايمًا معاكي فرشاة وتدهني الريش عشان تتشرب نكهة أكتر وما تنشفش.
• الريش الضاني ما بتاخدش وقت خالص في الشوي يعني بالكتير 3-4 دقايق على كل ناحية وتكون جاهزة.
• قدمي الريش المشوية مع السلطة الخضرا والعيش الشامي.

 

 

 

• الريش الضاني بصوص دبس الرمان

 

المقادير 

• 6 قطع من الريش الضاني متوسطة الحجم
• 2 معلقة كبيرة دبس الرمان
• 1 كوب عصير برتقان
• 1/2 كوب عصير رمان غير محلى
• 1 معلقة صغيرة توم مفروم
• ملح وفلفل أسود
• 1 معلقة صغيرة شطة مجروشة (اختياري)
• روزماري مفروم ناعم
• زبدة وزيت زيتون
• حبوب رمان للتقديم (لو متوفرة)

 

طريقة عمل الريش الضاني بصوص دبس الرمان

• تبلي الريش الضاني بعد دهنها بزيت الزيتون بالملح والفلفل والروزماري المفروم من كل الجوانب، وسيبيها 30 دقيقة في التتبيلة.
• في طاسه سخنة جدًا، شوحي الريش الضاني وضيفي لها مكعبين من الزبدة لحد ما تاخد لون من كل الجهات، ارفعيها من الطاسة.
• في نفس الطاسة، شوحي التوم المفروم في معلقة من زيت الزيتون، ضيفي عصير البرتقان والرمان ودبس الرمان والشطة المجروشة وسيبي المزيج يغلي لحد ما يتقل ويتكثف ويلمع لونه.
• رجعي الريش للطاسة تتشرب من نكهة الصوص لمدة دقيقتين واطفي النار وقدميها مع الرمان والبقدونس.

 

هنا ممكن تشوفي 5 وصفات شهية للشيف مي يعقوبي

 

• صينية البطاطس بالريش الضاني في الفرن

مين ما بيحبش صينية البطاطس باللحمة؟ أكلة كلاسيكية للمصريين كلهم بيعشقوها. فما بالكم لو بالريش؟

 

المقادير

• 1 كيلو ريش ضاني
• 4 حبات بطاطس كبيرة مقطعة مكعبات
• 1 بصلة مفرومة
• 1 فلفل أخضر رومي حلقات
• 1 فلفل حار
• 1 لتر عصير طماطم طازة
• 1 معلقة كبيرة صلصة طماطم
• شرايح من الطماطم الطازة
• 2 معلقة صغيرة كزبرة ناشفة
• 4 فصوص توم شرايح
• ملح وفلفل
• 1 معلقة صغيرة كمون
• زيت نباتي وزبدة

 

طريقة عمل صينية بطاطس بالريش الضاني في الفرن

• في صينية واسعة قابلة لدخول الفرن، شوحي الريش الضاني في معلقة من الزيت النباتي والزبدة وتبليها بالملح والفلفل من الجهتين لحد ما تاخد لون، ارفعيها من الصينية على جنب.
• زودي زيت وشوحي البصل والتوم وضيفي الكمون والكزبرة لحد البصل ما يصفر. ضيفي صلصة الطماطم وعصير الطماطم وسيبيهم يتسبكوا 10 دقايق.
• رصي مكعبات البطاطس والفلفل الأخضر والفلفل الحار وعليهم شرايح الريش وتبليهم بالملح والفلفل وزيني وش الصينية بشرايح الطماطم وزودي مرقة لحمة لو احتاجتي.
• غطي الصينية بالفويل ودخليها الفرن لحد ما تستوي الريش والبطاطس، تقدري تدخليها تحت الشواية دقايق عشان تحمري الوش.
• قدميها مع الرز بالشعيرية.

 

 

هل عندك تعليق على المقال ده؟ شاركينا هنا

Leave a Comment Cancel Reply

Δ

التعليق باستخدام حساب فيس بوك