يا محلاها كوباية الشاي بلبن بعد صلاة العيد الصبح بدري والناس معيدين وجنبها طبق البيتيفور والكحك والبسكويت. ويا سلام بقى كمان لو معاهم السابليه بأشكاله ونكهاته المختلفة اللي تحلي العيد كمان وكمان. وعيد الفطر 2022 كمان مختلف ومميز عشان العيد هيبقى ٣ أعياد مع بعض، عيد القيامة المجيد وعيد شم النسيم وعيد الفطر واخواتنا المسيحيين هيحتفلوا قبلنا بالعيد ومفيش عيد من غير سابليه. ومن دلوقتي لازم نقول لكم على طريقة عمل السابليه غير البيتيفور التقليدي عشان باقي أيام على العيد. اقري الموضوع ده، وهنقول لك على وصفة السابليه المميزة بعيدًا عن البيتيفور التقليدي عشان تعمليها لولادك وحبايبك في العيد وكل سنة وانتم طيبين وبخير وسعادة.
طريقة عمل السابليه
مقادير السابليه
- 7 كوبايات من الدقيق المنخول (ويفضل إنك تشتريه من محلات مستلزمات الحلويات النوع المخصوص للبسكويت).
- 2 كوب من السكر السنترافيش.
- نص كوب سكر بودرة للزينة.
- معلقة كبيرة من البيكينج باودر.
- 2 كوب من الزبدة في درجة حرارة الغرفة.
- 3 بيضات في درجة حرارة الغرفة.
- معلقة صغيرة من الفانيليا السايلة أو عدد 2 باكو فانيليا.
- معلقة كبيرة من بشر الليمون أو بشر البرتقال.
- مربى مشمش وفراولة للزينة.
- شوكولاتة بني وبيضا سايلة للزينة.
طريقة عمل الكحك الناعم للشيف سالي فؤاد
طريقة عمل السابليه
- اضربي البيض مع الفانيليا وبشر الليمون أو البرتقال في الخلاط أو بالمضرب الكهربائي.
- ضيفي السكر والزبدة اللي في درجة حرارة الغرفة واضربي كويس لحد ما السكر يضرب كويس.
- ضيفي الباكينج باودر والدقيق واحدة واحدة وافضلي اضربي لحد ما توصلي لقوام متماسك شبه العجين.
- غطي العجينة وسيبيها ترتاح لمدة ساعة في التلاجة.
- طلعي العجينة ورشي دقيق على الرخامة عشان متلزقش.
- افردي العجين بالنشابة لحد ما تبقى طبقة رقيقة.
- قطعي العجينة دواير بالقطاعة وممكن تقطعيها ورد أو نجوم لو عندك قطاعات.
- ممكن تقطعي الدواير من النص دايرة صغيرة عشان تعملي شكل مختلف.
- هاتي الصينية اللي هتدخليها الفرن وحطي عليها ورق زبدة وادهنيها بالزيت وحطي فيها كمية السابليه.
- شغلي الفرن على درجة حرارة ١٨٠ مئوية وطلعي السابليه لما يوصل للون الدهبي.
- زيني السابليه بالمربى والشوكولاتة وبألف هنا وشفا.
طريقة عمل بسكويت العيد بالكيلو بدون نشادر
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
What’s your Reaction?
التعليق باستخدام حساب فيس بوك