محتويات المقال
الستيك بصوص المشروم من أشهر الأطباق اللي دايمًا أغلبنا يحب يروح مطعم شيك وفخم ويطلبه ويستمتع به. طبق محترم ما يختلفش عليه إتنين. الأساس فيه بيكون قطعة الستيك وجودتها. كل ما كانت قطعة الستيك بجودة عالية، كل ما هيكون الطبق أغنى وأحلى. الطبق ده نقدر نقول عليه السهل الممتنع، يعني ممكن ناس كتير قوي تكون بتعمله في البيت، بس في النهاية النتيجة المظبوطة لها أسرار وأسباب. النهارده، هنقول لك أهم عوامل نجاح طبق الستيك بالمشروم، وطريقة عمله بالتفصيل، عشان في أول مناسبة حلوة، أو حتى من غير مناسبة، تعملي أحلى وأشيك طبق ستيك بالمشروم صوص.
أهم أسرار نجاح الستيك بالمشروم
- اختيارك لقطعة الستيك المظبوطة ويكون عندك دراية كاملة عن طريقة تسويتها.
- استخدمي مكونات بجودة عالية: زي المشروم الطازة، الأعشاب الطازة، حتى الفلفل المطحون طازة. كل ده بيفرق في النتيجة النهائية للطبق.
- اشوي الستيك دايمًا على نار عالية جدًا عشان ياخد لون مكرمل جميل من غير ما ينزل مياته ويفقد طراوته.
- خلي الصوص يغلي على النار لمدة كافية، بحيث يتكثف ويتقل ويكون قوامه مناسب.
دليلك لعمل أشهر تتبيلات اللحوم والفراخ والأسماك
طريقة عمل الستيك بصوص المشروم
المقادير (لشخصين)
- 2 قطعة ستيك فيليه (من العرق الفليتو)
- ملح وفلفل أسود مطحون طازة
- أعواد زعتر أو روزماري طازة
- 3 فصوص توم
- 300 جم مشروم طازة
- 1 معلقة كبيرة بصل مفروم ناعم جدًا
- زبدة وزيت زيتون
- 200 مل كريمة طهي
- 1/3 كوب مرقة لحم أو خضار
- 1 معلقة كبيرة صلصة الصويا الغامقة
الطريقة
- في طاسة تقيلة، ضيفي معلقتين من زيت الزيتون، أو أي زيت نباتي وسيبي الطاسة لحد ما تسخن تمامًا.
- تبلي الستيك ويكون في درجة حرارة الغرفة بالملح والفلفل الأسود المجروش.
- حمري الستيك في الطاسة بعد ما سخنتيها، لحد ما ياخد لون مكرمل من جانب واحد.
- اقلبي الستيك على الجانب التاني وهدّي النار (متوسطة) ضيفي مكعبين من الزبدة والأعشاب الطازة وفصوص التوم كسريها بظهر السكينة، وضيفيها عشان تطلع ريحتها وتنكّه الستيك.
- ميّلي الطاسه شوية، وإبدأي بالمعلقة شربي الستيك بالزبدة اللي اتنكهت بالأعشاب والتوم 4-5 مرات.
- سوّي الستيك حسب رغبتك، وارفعيه من الطاسة هو والأعشاب وفصوص التوم (لو قطع الستيك سميكة، تقدري تكملي تسويها في الفرن).
- في نفس الطاسة، هدّي النار وضيفي مكعب تاني من الزبدة، وشوحي البصل المفروم مع رشة من الملح لحد ما يطرى شوية.
- ضيفي شرايح المشروم، وشوّحيها مع البصل، وبعدين ضيفي الصويا صوص ومرقة اللحمة.
- ضيفي الكريمة وقلّبي كل المكونات كويس ودوقي الصوص في المرحلة دي. وتقدري تزودي ملح وفلفل وأي أعشاب تحبيها بس تكون مفرومة ناعم جدًا.
- هدّي النار تمامًا وغطّي الصوص وسيبيه على نار هادية لحد ما يتقل ويتكثف.
- رجعي قطع الستيك في الصوص لمدة دقيقة عشان تشرب من النكهة.
- قدمي الستيك مع الصوص والمشروم والبطاطس المهروسة بالزبدة.
What’s your Reaction?
التعليق باستخدام حساب فيس بوك