طريقة عمل السحلب في البيت وأهم فوائده

واحد من المشروبات الشتوية المميزة جدًا، بيدفي بشكل مش عادي، دسم ولذيذ وممكن ناكله بالمعلقة من كتر ما قوامه تقيل وغني، نكهاته عربية لذيذة ومتناسقة مع بعضها جدًا، إنه السحلب يا جماعة. السحلب مشروب مش عادي فعلًا وله عشاقه في كل مكان، كتير مننا بيشتري بودرة السحلب الجاهزة ويحضرها بخطوات بسيطة، بتتذوب في لبن بارد وتترفع على النار مع التحلية بالسكر لحد ما يغلي وبعدين يتقدم مع اختيارك من المكسرات وجوز الهند والزبيب، لكن عمرك جربتي تحضري بودرة السحلب في البيت؟

المكونات اللي هتحتاجيها لتحضير بودرة السحلب سهلة وبسيطة وموجودة في كل بيت. كمان السحلب من المشروبات اللي لها فوايد صحية مهمة جدًا لنا في فصل الشتاء، تعالي نتعرف على الفوايد دي:

فوايد السحلب

• اللبن والسمسم من المكونات الأساسية في السحلب، والاتنين بيمدوا الجسم بنسبة عالية من الكالسيوم.
• السحلب بيساعد على تنشيط الدورة الدموية، وبيساعد كمان على ضبط ضغط الدم، فضلًا عن الشعور بالدفء والحرارة في فصل الشتاء.
• دقيق الرز فيه نسبة عالية من البروتين والألياف اللي بتساعد على تحسين عملية الهضم.
• جوز الهند وهو أساسي في السحلب معروف بفوايده الهايلة واحتوائه على مضادات الأكسدة والفيتامينات والمعادن المهمة لصحة الجسم وتقوية مناعته.
• السعرات الحرارية لمشروب السحلب عالية وهو يعتبر من المشروبات الدسمة، عشان كده بننصحك تشربيه باعتدال لو عاوزة تحافظي على نفسك.

طريقة تحضير بودرة السحلب في البيت

المقادير

• 1 كوب لبن بودرة
• 1/4 كوب دقيق الرز
• 1/4 كوب نشا الذرة
• 1/4 كوب سمسم محمص
• 1/2 كوب جوز هند (كمية جوز الهند هنا اختيارية، تقدري تقلليها أو تزوديها حسب ما تحبي)
• 5 فصوص مستكة
• 1 معلقة كبيرة سكر أبيض
• 2 معلقة صغيرة فانيليا بودرة

الطريقة

• قومي بطحن المستكة والسكر الأبيض في هون خشب أو رخام لحد ما ينعموا تمامًا.
• في محضرة الطعام، اخلطي كل المكونات مع بعض لحد ما تنعم تمامًا.
• احفظي بودرة السحلب في برطمان أو علبة محكمة الغلق.

طريقة عمل السحلب

• ارفعي على النار 3 أكواب من الحليب كامل الدسم لحد ما يقرب يوصل للغليان.
• ذوّبي معلقتين كبار من بودرة السحلب المنزلية في ربع كوب من الحليب البارد لحد ما يذوب المزيج تمامًا.
• صبي مزيج السحلب على اللبن وقلبي باستخدام مضرب سلك، واستمري في التقليب لحد المزيج ما يتقل ويوصل للقوام المطلوب للسحلب.
• صبي السحلب في الأكواب (تكفي الكمية لعمل 2-3 أكواب من السحلب) وزينيه بالمكسرات والزبيب وجوز الهند.