الشكلمة من الحلويات المميزة والمهدور حقها كتير، علشان هي مش مشهورة قوي في طبق الحلويات. ودايمًا تلاقيها مهمشة كده وفيه منها كام قطعة بسيطة ومش متوفرة قوي في محلات الحلويات الكبرى يعني نادرًا لما حد يدخل على حد مثلًا وفي أيده كيلو شكلمة.. لكنها في الحقيقة لذيذة جدًا ومش واخدة حقها وطعم جوز الهند وهو بيدوب حكاية تانية خالص. علشان كده، في الموضوع ده، حبينا نغير فكر الناس عنها وهنقول لك على طريقة عمل الشكلمة في البيت أرخص وأوفر من المحلات علشان تعمليها قبل عيد الفطر ٢٠٢٢ وبنتمنى تعجبك. وكل سنة وانتم طيبين وبخير وصحة وسعادة.
طريقة عمل الشكلمة في البيت
مقادير الشكلمة
- ٢ كوب جوز هند ناعم.
- ٤ بياض بيضة.
- كوب سكر.
- معلقة فانيليا سايلة أو أتنين باكو فانيليا.
- ربع معلقة صغيرة من الملح.
- شكولاتة سايلة للزينة (اختياري)
- كريز الحلويات للزينة (اختياري)
طريقة عمل تشيز كيك اللوتس اللذيذة من هنا
طريقة عمل الشكلمة
- في بولة حطي بياض البيض مع الملح واخفقيهم بالمضرب الكهربائي كويس قوي لحد ما يبقى لونه أبيض وقوامه سميك.
- ضيفي جوز الهند والسكر واضربيهم مع بعض لحد ما تحصلي على قوام شبه العجينة وسيبي العجينة ترتاح لمدة ربع ساعة.
- شكلي العجينة على هيئة كرات صغيرة.
- هاتي الصينية اللي هتدخليها الفرن وافرشيها بورق الزبدة وادهني بالفرشاة زيت بسيط عشان ما يلزقش.
- رصي الشكلمة على الصينية ودخليها الفرن على درجة حرارة ١٨٠ وسيبيها لمدة ربع أو تلت ساعة.
- طلعيها من الفرن لما تلاقي إن لونها بقى مايل للدهبي المحمر.
- سيبي الشكلمة تبرد خالص قبل التقديم وزينيها بكريز الحلويات على الوش.
- ممكن تقدمي الشكلمة بشكل جديد ولما تبرد غطيها بالشكولاتة السايلة وحطيها على صينية ودخليها التلاجة لحد ما الشوكولاتة تثبت على الشكلمة.
اعرفي كمان من هنا طريقة عمل السابليه
لو عجبتك الوصفة جربيها وقولي لنا رأيك في التعليقات وبألف هنا وشفا على قلبك وعيدك سعيد إنتي وكل حبايبك.
طريقة عمل الزلابية .. أحلى حلويات شرقية سهلة وسريعة
التعليق باستخدام حساب فيس بوك