من وقت ظهور فيروس الكورونا واحنا بقينا عاملين زي الغرقان اللي بيتعلق بقشاية، بيقول لك الليمون بيرفع المناعة، لأ ده بيقول لك الينسون هايل، اشرب منه تلات مرات في اليوم، خلوا بالكم اشربوا مياه كل ربع ساعة، ابلع فصين توم الصبح فيرفع مناعة جسمك، وآخر حاجة طلعت بقى أكلة الشلولو. يمكن عشان اسم الأكلة غريب شوية أو يمكن عشان مش معروفة قوي غير عند سكان وجة قبلي والصعيد لفتت أنظار كتير من الناس وبدأ البحث عن طريقة عمل الشلولو لما ذكر اسمها الدكتور مجدي نزيه، رئيس قسم وحدة التثقيف الغذائي بالمعهد القومي للتغذية في برنامج الإعلامي محمود سعد اللي كان كل غرضه إنه يشرح للناس إن فيه أكلات مصرية صحية أصيلة وقديمة وتراثية مليانة فوايد لصحة الإنسان وتقوية مناعة الجسم. ما افتكرش أبدًا إنه الضيف أو الإعلامي محمود سعد كانوا يتخيلوا إن الشلولو هيتشهر بالشكل ده ولا كانوا يتصوروا الكم الرهيب من التعليقات الفكاهية اللي ابتكرها المصريين كعادتهم ونشروها على السوشيال ميديا.
المهم، الهوجة قامت على الشلولو، ويوتيوب اتملى بطرق عمايله وتقريبًا الملوخية الناشفة اللي في مصر كلها خلصت، طيب إيه هو الشلولو ده؟ خلونا نديله وضعه ونتكلم عليه شوية. هو أكلة اشتهر بيها أهل الصعيد معمولة من الملوخية الناشفة، بيضاف لها مياه على البارد، يعني من غير طبخ على النار، وبيتعمل لها دقة من الفلفل الحراق وتوم كتييير وعصير ليمون وطماطم شبه دقة البتنجان المخلل كده وبتتضاف عليها، ويتقلب كله مع بعضه، والمفروض يكون قوامها سميك عشان تتغمس بالعيش.
المصدر: elconsolto – طريقة عمل الشلولو لرفع المناعة
طيب إيه المميز يعني في الأكلة دي عشان تكون ليها فوايد لتقوية المناعة؟ المميز إنها ما بتطبخش على النار، طبخ الخضروات وتعريضها للحرارة بيفقدها كتير من قيمتها الغذائية. عشان كده الشلولو بيحافظ على القيمة الغذائية للملوخية، والتوم، والليمون، والطماطم. لما نيجي نحلل مكونات الشلولو، هنلاقي أهم مكون هو الملوخية الناشفة، الملوخية بشكل عام مليانة فوايد صحية للإنسان بصورة مذهلة، من فوايدها مثلًا:
- تعزيز صحة القلب
- تنظيم عمل الجهاز الهضمي
- الوقاية من هشاشة العظام
- الوقاية من الأنيميا
- تنظيم عمل الأعصاب والمساعدة على التخلص من الأرق وتحسين اضطرابات النوم
- مليانة بمضادات الأكسدة اللي بتساعد على تحسين المناعة
- مكافحة الالتهابات وتخفيف آلام المفاصل
إضافة التوم والليمون كمان للشلولو بيعلّي من القيمة الغذائية وبيضيف لفايدة الأكلة الأصيلة دي. يمكن يكون الشلولو تريند، بس هو عرّفنا قد إيه إحنا عندنا أكلات في بلدنا عمرنا ما كنا نعرفها ولا نسمع عنها وقد إيه ممكن نلاقي فوايد غذائية في أكلات بسيطة ورخيصة ومش مكلفة خالص، المطبخ المصري كان وهيفضل مليان بالأسرار والوصفات المميزة.
وفي النهاية، نحب نفكرك بإن الكورونا لحد دلوقتي فيروس غامض مالهوش علاج، وكل النصايح اللي بيتم تداولها عن أكلات ومشروبات الغرض منها إن أكلنا يكون صحي ومتوازن عشان نكون أقل عرضة للإصابة بالأمراض بشكل عام وعشان تكون أجسامنا قوية وصحية. وده ما يمنعش إننا ندّي فرصة للشلولو ونجربه، لو عندك أي معلومة عن الشلولو ما تتردديش وشاركينا!
ممكن تشوفي هنا دليلك الكامل لتأثير فيروس كورونا على الحامل والمُرضع
التعليق باستخدام حساب فيس بوك