وهي الواحدة مننا محتاجة إيه غير شوبة فلوس كتير جدًا تعمل بيهم شوبنج وشوكولاتات من اللي بتحبها وأكل متجهز في الفريزر عشان تطلعه على التحضير على طول؟ إحساس الأمان اللي بيبقى عند الست لما بيبقى فيه أكل موجود في الفريزر عشان يساعدها وقت التحضير ما يتوصفش، بيقلل وقت كبير من وقت التحضير ومن التعب والمجهود. وفي الموضوع ده، هاقول لك على أهم حاجة بتتشال في الفريزر لوقت الحاجة: صلصة الطماطم اللي هي أساس أكلات كتير وكمان هاقول لك على الطرق الصحيحة لتخزينها في الفريزر. يعني من الآخر، هاقول لك طريقة عمل الصلصة للتخزين.
طريقة عمل الصلصة للتخزين
الطريقة الأولى لتخزين صلصة الطماطم
- هتجيبي حوالي 3 أو 4 كيلو طماطم مناسبة للعصر.
- هتشقي الطماطم بالسكينة شق بسيط وهتحطيها في الحلة وتولعي عليها النار.
- سيبي الطماطم تنزل مياتها وهاتي هراسة وابتدي اهرسيها بسيط.
- افصلي اهرسي فيها لحد ما توصلي لقوام متجانس وسيبيها تغلي.
- اطفي عليها النار واضربيها بالهاند بليندر كويس قوي لحد ما تتعصر.
- صبيها في أكياس وحطيها في الفريزر ومش لازم تضيفي عليها أي ملح ممكن تستني لحد ما تطبخي.
هنا ممكن تشوفي أكلات جاهزة للتسخين تتخزن في الفريزر هتوفر وقتك
الطريقة الثانية لتخزين الصلصة
- هاتي حوالي 3 أو 4 كيلو طماطم وقطعيها قطع صغيرة وضيفي ليها حوالي نص كوب مياه وارفعيها على النار.
- ضيفي لها معلقة من الباريكيو ومعلقة من السكر ومعلقة من الملح والفلفل.
- سيبي الطماطم تغلي مع بعض حوالي تلت ساعة.
- اضربيها في الخلاط أو الهاند بليندر.
- هاتي مصفاة وصفي الطماطم من البذور.
- هاتي أكياس تخزين أو برطمانات نضيفة ومعقمة وضيفي الصلصة فيها.
الطريقة الثالثة لتخزين صلصة الطماطم
- الطريقة دي ممكن تنفع للبيتزا والباستا بس ما ينفعش تخزنيها فترة طويلة بسبب وجود بصل فيها.
- هاتي حوالي 3 أو 4 كيلو طماطم واضربيها في الكبة وصفيها من البذر لو تحبي أو ممكن تسيبيها من غير ما تصفيها.
- في حلة هاتي زبدة وزيت وحطي عليهم معلقتين من التوم المفروم وشوحيهم.
- ضيفي عليهم حوالي بصلتين مفرومين أو متقطعين قطع صغيرة.
- ضيفي الطماطم وعليهم حوالي نص كوب من المياه.
- ضيفي معلقتين كبار من الصلصة المعلبة ورشي عليهم بابريكا وزعتر مجفف وريحان وملح وفلفل ومعلقة سكر.
- سيبي الصلصة تتسبك حوالي ربع ساعة واطفي النار عليها.
لو بتحضري تجهيزات رمضان أفضل طرق حفظ وتخزين الخضروات الورقية
إزاي تخزني صلصة الطماطم بطريقة صحيحة؟
- أبسط طريقة هي في أكياس التخزين القابلة للغلق حطي فيها الصلصة افرديها واقفليها كويس.
- تاني طريقة هي في برطمانات معقمة بس للأسف ممكن تتكسر فحاولي تجيبي نوع كويس وعقميه قبل الاستخدام.
- لو بتستخدمي القوالب السليكون ممكن تحطي فيها الصلصة بعد ما تبرد وتاخدي منها على قد الكمية اللي محتاجاها.
هنا ممكن تشوفي كمان طريقة عمل صدر الديك الرومي لو عندك عزومة
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
What’s your Reaction?
التعليق باستخدام حساب فيس بوك