بحس إن الفراخ دي هي التجسيد للطيبة بعد قلب الأم. يعني أقصى طموحها تقوم فرحانة من النوم مع البط وهات يا لعب، هي مصدر البيض اللي بيدخل في أساسيات كل الأكل تقريبًا. عندها نوع غريب من أنواع المرونة اللي مش موجود في أي نوع بروتين تاني. هتسلقيها هتنزل لك شوربة. تتبليها هتعمل لك أحلى غدوة. تحشيها وتعملها حمام كداب مش هتعترض. هتشويها هتديكي أحلى أكلة باربكيو.. أنا شخص بيحب الفراخ جدًا وباعتبرها من أساسيات الأسبوع اللي باحاول أنوّع فيها وباشفق على أي شخص ما بيحبش الفراخ عشان فايته كتير.. من حبي فيها قررت أشارك معاكم النهارده وصفة من الوصفات المحببة لقلبي عشان ما بتاخدش وقت ولا مجهود وهي طريقة عمل الفراخ الروستو في الفرن.
طريق عمل دجاج روستو في الفرن
المقادير لعمل فرخة كبيرة الحجم
- فرخة كبيرة في الحجم (حوالي 2 كجم).
- ملح وفلفل.
- معلقة صغيرة من التوم والبصل باودر.
- معلقة صغيرة بابريكا.
- معلقة صغيرة روز ماري.
- معلقة صغيرة زعتر.
- معلقة كبيرة من الزبدة في درجة حرارة الغرفة.
- عيدان روز ماري وأكليل الجبل فريش.
- عدد 2 بصلة متوسطة الحجم.
- عدد 2 بطاطس متوسطة الحجم.
هنا بقى ممكن تشوفي بالفيديو: طريقة خلي الفراخ بسهولة
طريقة عمل الفراخ الروستو بالفرن خطوة بخطوة
- اغسلي الفرخة كويس عشان تتخلصي من الزفارة وصفيها كويس من السوائل.
- في طبق، هاتي الزبدة وكل التوابل واخلطيهم كويس قوي مع بعض لحد ما تحصلي على قوام متناسق.
- هاتي خليط الزبدة والتوابل وحطي جزء منه تحت جلد الفرخة وادعكي كل الفرخة بباقي الخليط ودلكيها.
- سيبي الفرخة في التتبيلة لمدة لا تقل عن ساعتين ويفضل تسيبيها ليلة كاملة.
- قطعي البصل والبطاطس قطع صغيرة.
- هاتي الصينية اللي هتدخليها الفرن وحطي فيها البصل والبطاطس وحطي الفرخة عليها.
- دخلي الصينية الفرن على درجة حرارة 180 لمدة ساعة تقريبًا لحد ما تستوي وقلبيها في نص المدة.
- في آخر نص ساعة افتحي ليها الشواية عشان تاخد لون دهبي جميل.
لعشاق الناجتس طريقة عمل الناجتس البيتي زي بتاع المحلات
ممكن تسوّي الفراخ في كيس حراري وتحطي معاه خضروات بطاطس وبصل وجزر، وممكن تسوّيها كمان في حلة التابر وير من غير ما تحتاجي تقلبيها.. قدمي مع الفراخ بطاطس بيوريه ورز وسلطة وبألف هنا وشفا :).
التعليق باستخدام حساب فيس بوك