الفشار من التسالي اللذيذة جدًا، ومناسبة للكبار والأطفال، ومناسب كمان للناس اللي ماشية على نظام غذائي متوازن بسبب إن سعراته قليلة، ودلوقتي بقت فيه وصفات كتيرة للفشار، منها الفشار بالكراميل، واللي هنقولك على مقاديره وكمان طريقة عمل الفشار بالكراميل بالخطوات، بس أهم حاجة لو أطفالك هياكلوا فشار، يبقى لازم تخلي بالك منهم كويس جدًا، وما تسمحيش لهم إنهم يلعبوا وهما بياكلوه، علشان ما يتسببش لأي حد -لا قدر الله- في دخول الفشار في مجرى التنفس، ودلوقتي تعالي شوفي تعمليه إزاي:
مقادير الفشار بالكراميل
- كوباية مليانة حبوب الذرة.
- 2 كوباية سكر بني.
- 2 ملعقة كبيرة عسل.
- ½ كوباية زبدة طرية.
- 4 معالق كبيرة زيت.
- ملعقة صغيرة فانيليا.
- ½ ملعقة صغيرة بيكنج باودر.
- رشة ملح.
5 طرق مختلفة لعمل الشاي الأحمر.. كل مرة مزاج مختلف
طريقة عمل الفشار بالكراميل
طريقة عمل الفشار
اعمليه بالطريقة العادية، سخني معلقة زيت كويس جدًا في حلة لها غطا محكم، وبعدين حطي مقدار حبوب الدرة ووطي النار، هتسمعي صوت طقطقة الفشار، ولما يقل الصوت قلبي الحلة كويس لحد ما تحسي إنك كل حبوب الدرة اتحولت لفشار.
طريقة عمل الكراميل
- في حلة تانية حطي الزبدة والسكر والعسل مع بعض على نار هادية لحد ما يوصل لونهم للدهبي المطلوب.
- ضيفي الفانيليا والبيكنج باودر وقلبي الخليط كويس.
- صبي الخليط على الفشار اللي انتي مجهزاه وقلبيهم كويس.
- حطي الفشار بالكراميل في فرن سخن لمدة 10 دقايق، وممكن تستغني عن الخطوة دي لو عاوزه.
وصحتين وألف هنا.
التعليق باستخدام حساب فيس بوك