الفول المدمس يا جماعة أحلى وأطعم وجبة من وجبات السحور في رمضان، مالوش بديل عند المصريين. هو اللى بيقضي على الجوع طول فترة الصيام، قابل للتغيير والتشكيل والتنويع في وصفاته بشكل رهيب. وعشان احنا عارفين إن طبعا الفول المعمول في البيت أصح وأضمن بكتير من اللي بنشتريه من بره، جيبنا لك النهارده طريقة عمل الفول المدمس في البيت بكل تفاصيلها. تقدري تعملي الكمية اللي تناسبك وتحفظيها في أكياس في الفريزر عشان تكفي احتياجاتك طول رمضان. أهم حاجة في الفول المدمس البيتي هي اختيارك لنوع فاخر من الفول نفسه، عشان أحيانًا نوع الفول الوحش بيكون هو السبب إن الفول المدمس البيتي ما ينجحش معاكي. إضافة الكركم والبابريكا والعدس الأصفر للفول بتدي لون جميل، ومعلقة الخل على الوش بعد التدميس هتمنع الفول يسود أو يغير لونه، تقدري كمان ترشي على وشه رشة من الزيت عشان تحفظه في التلاجة. جربي الطريقة دي وشاركينا رأيك، بنتمنى لك سحور شهي ولذيذ مع أسرتك.
مقادير الفول المدمس البيتي
- 1/2 كيلو من الفول الجاف
- مياه للنقع
- 1/4 كوب من العدس الأصفر مغسول ومصفى
- 1 جزرة مبشورة
- 1 ليمونة كاملة مقطعة أرباع
- 1 ثمرة طماطم مقطعة أرباع
- 1/2 معلقة من الكركم
- 1/2 معلقة من البابريكا
- 1 معلقة كبيرة من الخل الأبيض
- 1/2 معلقة صغيرة ملح للنقع
طريقة تدميس الفول
- اغسلي الفول في مصفاة تحت مياه جارية وانقعيه في بولة وغطيه بالمياه وضيفي نص معلقة ملح للمياه هتساعد على تطرية قشرة الفول أثناء التسوية وسيبي الفول منقوع مش أكتر من أربع لخمس ساعات.
- اتخلصي من مياه نقع الفول وحطيه في الدماسة مع كل المكونات ما عدا الخل الأبيض، واغمري الفول بالمياه، حاولي إنه يكون فيه مكان كافي فوق المكونات عشان مع الغليان والتسوية، حجم الفول هيزيد.
- سيبي الفول بعد ما يغلي، يستوي على نار هادية جدًا ولو احتاجتي أثناء فترة التسوية إنك تضيفي مياه لو نشفت منك، ضيفي مياه مغلية.
- بعد ما يستوي الفول تمامًا، ضيفي على وش القدرة أو الدماسة الخل الأبيض هيمنع إن لونه يتغير وما يغمقش.
- يفضل تحفظيه في علبة زجاجية محكمة الغلق في التلاجة أو أكياس في الفريزر حسب رغبتك.
ممكن تعرفي هنا أماكن شراء ياميش رمضان 2020 أون لاين
التعليق باستخدام حساب فيس بوك