تيتة زمان كانت دايمًا تقول لي إن مفيش حاجة هتدفي في الشتا غير القلقاس. ولما كبرت، ارتبط عندي القلقاس بالشتا والدفا وأكلة سخنة تدفي البيت كله. القلقاس كمان مرتبط عند اخواتنا المسيحيين بعيد الغطاس، وفي كل عيد غطاس لازم تتقدم وجبة القلقاس ومعاها القصب. في الموضوع ده، هنقول لك على طريقة عمل القلقاس بالسلق وبالصلصة الحمرا وبنتمنى تعجبك.
وصفة القلقاس بالسلق
طريقة عمل القلقاس بالسلق – أكلات عيد الغطاس
مقادير القلقاس بالسلق
- قلقاس
- سلق
- كزبرة خضرا
- ٤ فصوص توم مفرومة
- سمن وزيت
- مرقة
- ملح وفلفل
- كزبرة ناشفة
طريقة عمل القلقاس بالسلق
- قشري القلقاس واغسليه كويس وقطعيه مكعبات صغيرة أو متوسطة الحجم على حسب رغبتك.
- هاتي المرقة وحطيها في حلة وارفعيها على النار على درجة حرارة متوسطة لحد ما تغلي.
- بعد ما تغلي المرقة، ضيفي ليها مكعبات القلقاس.
- حطي شوية سمنة وزيت في طاسة وحمري فيها السلق والكزبرة.
- ضيفي التوم المهروس للسلق وقلبي لمدة دقيقة ورشي شوية كزبرة ناشفة.
- ارفعي الخليط من على النار واضربيه في الكبة أو الخلاط.
- ضيفي السلق للقلقاس على النار مع الملح والفلفل.
- سيبي السلق يغلي مع قطع القلقاس واطفي عليه النار لما يستوي ويطرى.
هنا ممكن تشوفي طريقة عمل كفتة داوود باشا
وصفة القلقاس بالصلصة
طريقة عمل القلقاس بالصلصة – أكلات عيد الغطاس
مقادير القلقاس بالصلصة
- قلقاس
- نص كيلو طماطم
- مرقة
- ٣ فصوص توم مفرومة
- بصلة كبيرة الحجم مبشورة
- سمنة أو زيت
- ملح وفلفل
- كزبرة ناشفة.
طريقة عمل فطيرة التفاح .. ولا أسهل ولا أسرع من كده
طريقة عمل القلقاس بالصلصة
- قشري القلقاس واغسليه كويس وقطعيه مكعبات صغيرة او كبيرة الحجم حسب رغبتك.
- ابشري البصل واهرسي التوم.
- هاتي حلة كبيرة وحطي فيها السمنة والزيت وشوحي البصل والتوم.
- حطي الطماطم المعصورة والمرقة وسيبيها لحد ما تتسبك وضيفي مكعبات القلقاس.
- في طاسة اعملي الطشة من التوم المفروم والكزبرة الناشفة وضيفيها للقلقاس.
قدمي القلقاس مع رز أبيض سادة أو رز أبيض بالشعرية وممكن كمان تعملي معاه لحم مكعبات أو فراخ مشوية وبألف هنا وشفا. وكل سنة وأخواتنا المسيحيين بألف خير. لو عجبتك الوصفة وعملتيها شاركينا برأيك في كومنت وقوليلنا بتحبي القلقاس بالسلق ولا بالصلصة الحمرا.
طريقة عمل سمك السلمون .. 3 وصفات جديدة وسهلة
التعليق باستخدام حساب فيس بوك