الناس أنواع: كييفة القهوة اللي بيشربوها زي المياه، مصلحجية القهوة واللي ميعرفوهاش ولا يشربوها إلا بس لما يبقوا مصدعين ولا عايزين يسهروا عشان عندهم امتحان ولا شغل، والنوع الأخير وهما مبتدئين القهوة اللي بيحبوا يشربوها بس مش بيعرفوا يعملوها، وفي الموصوع ده هنقولك على طريقة عمل القهوة التركية بسهولة في البيت.
طريقة عمل القهوة التركية
- هاتي كنكة وحطي فيها معلقة أو معلقتين بن والسكر على حسب رغبتك.
- ضيفي ميه ساقعة من التلاجة بمقدار نص الكنكة وارفعيها على النار وسيبيها دقيقة.
- بعد الدقيقة قلبي كويس وبعدين ضيفي لبقية الكنكة ميه ومتقلبيش.
- سيبي القهوة لحد ما تغلي بس خلي بالك عشان متفورش.
- صبي القهوة مباشرة في الفنجان المفضل ليكي.
هنا ممكن تشوفي أفضل 5 أنواع ماكينة قهوة في مصر بالأسعار
مسميات القهوة
كل واحد بيشرب القهوة على حسب رغبته وتفضيله للسكر والتلقيمة بتاعت القهوة ومن أسماء القهوة قي مصر:
- القهوة السادة أو السكيتو: القهوة اللي مش بتضاف ليها أي معلقة سكر.
- قهوة على الريحة: القهوة اللي بيضاف ليها حوالي ربع معلقة سكر فقط.
- قهوة مضبوطة: القهوة اللي بيتضاف ليها معلقة واحدة سكر.
- القهوة الزيادة: القهوة اللي بيتضاف ليها معلقتين سكر.
- قهوة المانو: ودي اللي بين الزيادة والمضبوطة بيتضاف ليها معلقة ونص سكر.
طرق مختلفة لعمل مشروبات القهوة الباردة في الصيف
فوائد القهوة التركي
القهوة التركي تحتوي على مضادات الأكسدة وليها فوائد كتير للصحة ومن ضمنها:
- تحسين ضغط الدم.
- التقليل من خطر الاصابة بالأمراض زي القلب والسكري والاكتئاب.
- تحسين مستويات الطاقة وتقليل الشعور بالتعب.
- تقليل الدهون في الجسم والمساعدة في خفض الوزن.
اعرفي أكتر عن القهوة الخضراء وفوائدها من هنا
أشهر أماكن شراء القهوة التركي في مصر
وفي مصر مطاحن بن مخصوصة لصناعة البن بأسعار مختلفة ومن أشهرها:
- بن العميد.
- بن شاهين.
- بن العروبة.
- بن عبد المعبود.
- بن العروبة.
- بن أبو عوف.
- بن محمد افندي.
وأفضل طريقة لعمل القهوة هي على السبرتاية عشان تسيبيها تتحضر على نار هادية براحتها، ودلوقتي ظهر ماكينات بالكهرباء لعمل القهوة التركي في وقت سريع جدًا. ودلوقتي قوليلنا قهوتك إيه؟
التعليق باستخدام حساب فيس بوك