محتويات المقال
الكابوريا هي ملكة الأزأزة، محترفين السي فود هما بس اللي يعرفوا قيمتها كويس، واللي عندهم القدر الكافي من الصبر على رحلة الأزأزة والتفصيص عشان يوصلوا لمرادهم في النهاية، لحم طري، وطعم مسكر مليان بنكهة البحر اللي مفيش زيها. أهم معلومة لازم تعرفيها لما تنقي الكابوريا وتشتريها، هي إنك تعرفي الفرق بين الكابوريا الذكر والنتاية، النتاية أو الأنثى يعني هي الأفضل من ناحية الطعم، بتكون مسكرة أكتر، ومن أشهر ما يميزها هو وجود البطارخ اللي كتير من الناس بيحبوها، حتى كمان سعرها بيكون أعلى من سعر الكابوريا الذكر. التفرقة بينهم سهلة جدا وبسيطة تقدروا تلاحظوها بعينيكم زي الصورة كده.
مصدر الصورة: pinterest
أهم حاجة في أي سي فوود أو أسماك هي الطزاجة والمكان المضمون اللي نشتري منه بثقة. أما بالنسبة لطرق تحضير الكابوريا وطبخها، فهي بسيطة جدًا، الكابوريا يفضل دايما سلقها أو تسويتها على البخار مع منكهات وأعشاب عطرية تنقلها ريحة جميلة، وبعد الخطوة دي نقدر نشويها على البوتجاز، في الفرن أو على الفحم مع خلطة من البهارات والخضراوات اللي هتضيف لها نكهة لذيذة جدًا. لو عندك طريقة مميزة وجديدة لعمل الكابوريا نتمنى تشاركينا.
النهارده هنقول لك طريقة سلق الكابوريا بمنتهى السهولة، ممكن تقدميها مسلوقة أو تشويها بعد السلق بأي طريقة من الطرق اللي ذكرناها.
طريقة عمل الكابوريا المسلوقة
المقادير
- 5-6 كابوريات نتي متوسطة الحجم
- 1 حبة طماطم مقطعة أرباع
- 1 حبة جزر مقطعة حلقات
- 1 بصلة كبيرة مقطعة شرايح
- 5 فصوص توم مقطعة شرابح
- 1/2 كوب أعواد كرفس مقطعة مكعبات
- 1 حبة فلفل أخضر مقطعة مكعبات
- 2 شريحة ليمون أضاليا
- 1 معلقة كبيرة حبوب الفلفل الإسود
- 4 فصوص حبهان
- 1/4 معلقة شطة (اختياري)
- 2 ورق لورا
- ملح
- زيت نباتي
- 1 كوب ماء
الطريقة
- في حلة عميقة على النار، ضيفي معلقتين من الزيت النباتي وضيفي الخضروات والبهارات كلها وشوحيها لحد ما تظهر ريحتها العطرية بدون ما يتغير لونها.
- ضيفي الكابوريا للحلة وغطي الحلة بالغطاء كويس، وامسكي الحلة من إيديها وابدأي حركيها بحرص عشان تتخلط الكابوريا مع كل الخضار والبهارات.
- ضيفي كوب واحد فقط من الميه للكابوريا، وضيفي الملح، وشريحتين الليمون، وغطيها وسيبيها لحد ما تستوي تماما ويتغير لونها للون البرتقالي الجميل.
- قدمي الكابوريا مع مرقتها وشرايح من الليمون، أو صفيها تمامًا من المرقة واشويها في طاسة أو جريل للبوتجاز مع شرايح من البصل والفلفل الألوان ورشة من الكمون.
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك