ماما يا ماما، اعملي لي كاب كيك.
ماما يا ماما، أنا عاوزك تحطي لي كب كيك في اللانش بوكس.
ماما يا ماما، أنا عاوز في عيد ميلادي كاب كيك ونعملها أنا وانتِ سوا.
كل الأطفال بتحب الكب كيك بكل أشكالها وأنواعها ودايمًا يفضّلوها لأنها صغنونة على قد إيديهم وبياكلوها بسهولة ويا سلام لو عليها كريمة أو فروستينج في مناسبة أو عيد ميلاد بتبقى بالنسبة لهم متعة.
الكاب كيك هي أي وصفة كيك عادية بس معمولة في قوالب الكاب كيك وتقدري تتفننّي في تزيينها والتوبينج بتاعها لو عندك مناسبة أو عيد ميلاد مثلًا واحنا النهارده جايبين لك طريقة عمل الكاب كيك بالفانيليا ودي وصفة أساسية سهلة جدًا في عمايلها ممكن ولادك يشاركوكي فيها وكمان هشة وطرية فتقدري تديها للولاد في اللانش بوكس من غير أي فروستينج لو حبيتي لأنها لذيذة جدًا.
مقادير الكاب كيك الفانيليا
1 ¼ كوب دقيق
1 ¼ معلقة صغيرة بيكينج باودر
¼ معلقة صغيرة ملح
2 بيضة في حرارة الغرفة
1 معلقة صغيرة فانيليا سايلة
¾ كوب سكر أبيض
1 معلقة صغيرة بشر ليمون (اختياري)
½ كوب زيت نباتي
½ كوب لبن خاثرbuttermilk (1/2 كوب لبن مضاف ليه 1 معلقة كبيرة خل أبيض)
لو محتاره في وجبات الفطار لاولادك .. جربي طريقة البان كيك من هنا وهتعجبك
طريقة عمل الكاب كيك الفانيليا
- سخني الفرن على درجة حرارة 180.
- حضرّي اللبن الخاثر وده اللي هيدي معاكِ طراوة للكب كيك، ضيفي الخل على اللبن وسيبيه هتلاقي قوام اللبن اتغير وتقل شوية.
- حضرّي صينية الكاب كيك ورصي فيها ورق الكاب كيك لو عندك أو ادهنيها بالزيت والدقيق.
- باستخدام المضرب الكهربائي، اضربي البيض مع السكر لحد ما يفتح لونه ويتقل القوام شوية. خدي وقتك في الخطوة دي عشان الكيك يدخل له هوا ويطلع هش معاكي.
- ضيفي الزيت والفانيليا واضربي تاني كويس لحد ما يندمجوا.
- في بولة تانية، اخلطي المكونات الجافة كلها بمضرب سلك الدقيق والبيكينج بودر والبيكينج صودا والملح وبشر الليمون لو هتستخدميه.
- ضيفي بالتناوب جزء من خليط الدقيق واللبن على خليط البيض ابدأي بالدقيق بعدين اللبن وانتهي برضه بالدقيق. في المرحلة دي، قلّبي برفق عشان ما تخرّجيش الهوا من العجينة.
- في صينية الكاب كيك، وزّعي الخليط باستخدام سكوب الآيس كريم عشان يساعدك إن كمية العجينة تكون متساوية في كل كاب كيك. حاولي تملي بس ¾ كل واحدة عشان تديها مساحة لما تعلى أثناء الخبز.
- اخبزيهم في الفرن المتسخن لمدة تقريبًا ربع ساعة والمدة بتختلف حسب كل فرن. أهم حاجة أنك تختبري التسوية بخلة أسنان وتطلع نضيفة.
- الكاب كيك دي لونها بيكون فاتح. ما تحاوليش تحمّريها تحت الشواية لأنها هتنشف منك.
- بعد ما تطلع من الفرن، سيبيها تبرد دقيقتين في الصينية وبعدين خرّجيها تكمل تبريدها على شبك.
- لو حبيتي تزينيها بفروستينج أو كريمة. لازم تسيبيها تبرد تماما قبل التزيين.
شوفي هنا طريقة عمل طريقة عمل الأرز باللبن لطفلك الدارج
التعليق باستخدام حساب فيس بوك