طريقة عمل الكانيلوني باللحمة المفرومة

الكانيلوني من الأكلات الإيطالية الممتعة جدًا، الكانيلوني له صورتين بيتقدم بيهم: إما الكانيلوني المصنوع من الباستا المجففة اللي بتكون على شكل أسطوانات مفرغة (زي الصورة اللي تحت)، بنحشيها بحشوات متنوعة وتتغطى بصوص الطماطم مع البشاميل أو من غيره، وطبعًا مع الأجبان وتتخبز في الفرن. والصورة التانية هي الكانيلوني كريب، وهي عجينه بتتحضر زي عجينة الكريب وتتلف بالحشوة، وبرضه تتخبز مع صوص الطماطم والأجبان. احنا النهارده اختارنا لك الطريقة الأسهل للكانيلوني باستخدام الكانيلوني الجاهز بحشوة اللحمة المفرومة اللذيذة. الكانيلوني بالطريقة دي بيكون سهل جدًا وسريع في تحضيره وبيكون مناسب جدًا للعزومات والمناسبات، جربيه ويهمنا رأيك.

thepastaproject

الكانيلوني بحشوة اللحمة المفرومة

المقادير

• حوالي 16 قطعة كانيلوني

لعمل حشوة اللحمة:

• 350 جم لحمة مفرومة
• 1 بصلة متوسطة مفرومة ناعم
• 3 فص توم مفروم
• زيت زيتون
• ملح وفلفل
• 1 معلقة صغيرة أوريجانو مجفف
• 1 معلقة صغيرة ريحان مجفف
• 1/4 معلقة صغيرة جوزة الطيب

لعمل صلصة الطماطم

• 2 كوب مرقة لحم أو خضار
• 1 لتر عصير طماطم طازة، أو تقدري تستخدمي طماطم معلبة
• 1 معلقة كبيرة معجون الطماطم
• ملح وفلفل
• 1/4 كوب ريحان أخضر مفروم
• 1 معلقة صغيرة أوريجانو
• 1 معلقة صغيرة ريحان مجفف
• 1 فص توم مهروس

للوجه

• 1/2 كوب جبنة بارميزان
• 1 كوب جبنة موتزاريلا

طريقة عمل الكانيلوني بحشوة اللحمة المفرومة

• في طاسة على النار، ضيفي معلقتين من زيت الزيتون وشوحي اللحمة المفرومة مع البصل والتوم لحد ما يتغير لونها.
• ضيفي الملح والفلفل والأوريجانو وجوزة الطيب للحمة وسيبيها على جنب.
• في حلة على النار، ضيفي عصير الطماطم والمرقة وسيبيهم على النار لحد ما تغلي الطماطم وتتسبك ويقل حجمها.
• ضيفي الملح والفلفل لصوص الطماطم وأوراق الريحان والأعشاب المجففة والتوم المهروس، وارفعيها من على النار.
• ضيفي كبشتين من صوص الطماطم لحشوة اللحمة المفرومة، وحضري صينية للفرن وضيفي فيها شوية من صوص الطماطم واحتفظي بالباقي للوجه.
• بعد ما تبرد الحشوة، باستخدام معلقة صغيرة، احشي حبات الكانيلوني (بدون سلق) ورصيها فوق صلصة الطماطم اللي حضرتيها.
• غطّي الكانيلوني باللي اتبقى من عصير الطماطم وغرّقيه بالأجبان، تقدري تستخدمي مع الموتزاريلا والبارميزان أي نوع تاني زي الشيدر مثلًا.
• غطي الكانيلوني بالفويل ودخليه الفرن المتسخن على حرارة 180 لمدة 20 دقيقة، بعدها شيلي الفويل وسيبي الكانيلوني لحد الوش ما يتحمر والأجبان تسيح.
• قدمي الكانيلوني ساخن وزينيه بأوراق الريحان الطازة.

ملحوظة:

• لو بتحبي صوص البشاميل، تقدري تضيفي تحت الكانيلوني وعلى الوجه، شوية من صلصة البشاميل.
• تقدري تضيفي 1/2 كوب من الأجبان مع حشوة اللحمة المفرومة جوه الكانيلوني نفسه لو حبيتي مذاق أقوى للجبنة في كل قطمة.