محتويات المقال
الكباب الكباب!!! اللقمة العظيمة المكونة من حتة عيش بلدي طازة متغمسة في الطحينة وعليها حتة لحمة مشوية سخنة، ومتبلة بتتبيلة طعمة ومستوية على الشعرة وهوووووب على بق واحد! حاجة كده تطمن القلب وتهون عليكي الدنيا ودوشتها. الكباب في مصر، أكلة مميزة جدًا، لها رونقها واحترامها وسمعتها الرنانة. والحقيقة، احنا البلد الوحيدة في البلدان العربية اللي بنطلق مسمى كباب على مكعبات اللحمة المشوية، بلدان شرق أوسطية كتير بتسمي الكفتة بأنواعها كباب.
عشان كده، في مصر، الكباب عندنا غير، وتتبيلته حرشة ومميزة. ومعانا النهارده هنقول لك ازاي تتقمصي شخصية الكبابجي، وتمسكي المروحة الريش بكل شموخ واحترام، وتهوي بمزاج على أحلى كباب. ياللا الجو جميل الفترة دي، لمي العيلة، واشوي لهم أطعم كباب.
المصدر cookinglsl
نصايح مهمة جدًا عشان تعملي أحلى كباب:
- الكباب الضاني، بيكون في نسبة دهون أعلى، اوعي تتخلصي منها لإنها هتدي طراوة للكباب.
- الفخدة، أو الكتف تقدري تاخدي منهم مكعبات للكباب سواء ضاني أو بتلو.
- الكباب الضاني ممكن يكون من بيت الكلاوي بدون عظم هيكون طري جدًا.
- اوعي تشوي الكباب، سواء على الفحم أو على البوتجاز لمدة أطول من 15 دقيقة. المبالغة في التسوية هتخليه ناشف جدًا.
- سيبي الكباب يتبل ليلة كاملة لأفضل نتيجة.
- لا يفضل استخدام الزبادي في التتبيلة، لإنه هيتحرق على الفحم ويغير لون اللحمة.
- استخدمي مياه البصل ومياه الطماطم فقط عشان قطع البصل وقشور الطماطم بتتحرق مع الشوي.
المقادير
- 1 ك مكعبات لحم بتلو أو ضاني حسب الرغبة
- 3 بصلة كبيرة مبشورة
- 2 حبة طماطم مبشورة
- 2 معلقة كبيرة عصير ليمون
- ملح وفلفل أسود
- 1 معلقة كبيرة بهارات لحمة (سبع بهارات)
- 1 معلقة صغيرة كبابة صيني
- 1 معلقة صغيرة جوزة الطيب
- 1 معلقة صغيرة زعتر ناشف
- 1/4 كوب زيت نباتي
- أسياخ خشبية منقوعة في مياه دافية لمدة 15 دقيقة
طريقة عمل الكباب المشوي
- في الخلاط أو بالمضرب اليدوي، اضربي البصل والطماطم مع شوية من المياه، لحد ما ينعموا تمامًا.
- في مصفاة كبيرة، صفي البصل والطماطم كويس جدًا، واستخدمي مياتهم فقط في التتبيلة.
- اخلطي كل مكونات التتبيلة مع مياه البصل والطماطم وضيفي لها الملح والفلفل حسب الرغبة.
- تبلي مكعبات اللحمة كويس بالتتبيلة، وسيبيها في التلاجة تتبل ليلة كاملة.
- حطي مكعبات اللحمة في الأسياخ الخشب، أو الأسياخ المعدن. ولو تحبي، ضيفي معاها مكعبات من البصل والفلفل.
- اشوي الكباب على شوايه فحم، أو على البوتجاز في شواية أو طاسة واسعة جدًا ومفتوحة وتكون سخنة جدًا.
- ادهني الكباب بباقي التتبيلة أثناء الشوي عشان ما ينشفش، وقت التسوية لا يزيد عن 15 دقيقة.
- قدميه ساخن مع العيش البلدي، سلطة الطحينة، والسلطة الخضراء.
دليلك لعمل أشهر تتبيلات اللحوم والفراخ والأسماك
التعليق باستخدام حساب فيس بوك