ملكه من ملوك أكلات الشارع المصري. بيحبها كل فئات وطبقات الشعب، كانت السبب في شهرة الكتير من المطاعم بطعامتها، عربيات كتير في الشارع اتحولت بسببها لمطاعم كبيرة.. إنها يا سادة الكبدة الإسكندراني!
سواء هتتاكل في رغيف عيش فينو رفيع في صورة سندوتشات أو تتغمس بالعيش البلدي مع شوية مخلل مشكلين في كل أحوالها محبوبة وليها شعبية كبيرة جدًا في بلدنا. اشتهر بيها شعب إسكندرية الجميل وما ينفعش نروح إسكندرية من غير ما نخطفلنا سندوتشين.
سر الكبدة الإسكندراني في طريقة تسويتها أغلب المحلات بتسويها في كميه غزيرة من الزيت السخن جدًا مع تقليب سريع بتكون استوت في وقت قليل جدًا وطرية وما بتشدش وطبعًا كل ماكانت الكبدة طازة ومن مصدر موثوق فيه بتكون النتيجة النهائية أكتر من رائعة.
النهاردة هنقولك طريقة عمل الكبدة الإسكندراني في البيت بخطوات بسيطة، عشان تستمتعي بيها مع أسرتك واللذيذ في الموضوع إنها سريعة جدًا في عمايلها ومش هتقفي فالمطبخ كتير.
مقادير عمل الكبدة الإسكندراني
- ½ كيلو كبدة كندوز متقطعة شرايح
- 1معلقة صغيرة كمون
- 1 معلقة صغيرة من الكزبرة الناشفة
- ¼ معلقة من جوزة الطيب
- 1 معلقة كبيرة خل أبيض
- 5 فصوص توم مفرومين ناعم
- 1 قرن فلفل حار إختياري
- شرايح فلفل أخضر
- عصير ليمون
- ملح وفلفل
- زيت نباتي لتشويح الكبدة
لأن فوائد الشوفان كتير اعرفي هنا 7 طرق صحية لأكل الشوفان على الفطار
طريقة عمل الكبدة الإسكندراني
- تبّلي الكبدة بالكمون والكزبرة والتوم والملح والفلفل وسيبيها في التتبيلة على الأقل ساعتين.
- في طاسة عميقة حطّي كمية غزيرة من الزيت وسخنيه كويس قوي وبعدين ابدأي نزلي الكبدة بالتتبيلة بتاعتها وقلبيها كويس.
- شوحي الكبدة على نار عالية لحد ما يغير لونها وتبدأ تستوي، ما تسيبيش الكبدة كتير على النار عشان ما تستويش زيادة وتشد معاكي.
- ضيفي عليها الفلفل الأخضر والفلفل الحراق وآخر حاجة قبل متقفلي النار على طول ضيفي الخل وعصير الليمون وجوزة الطيب.
- قدمي الكبدة في سندوتشات مع سلاطة الطحينة أو قدميها مع عيش بلدي والمخلل المشكل.
ملحوظة
بالنسبة للكبدة نفسها اوعي تغسليها لإن بكدة هتضيعي فايدتها طالما المصدر موثوق فيه متقلقيش خالص ونشفيها كويس بمناديل المطبخ قبل ما تتبيليها.
شوفي هنا طريقة عمل قالب البطاطس باللحم المفروم
التعليق باستخدام حساب فيس بوك