الكبسة أكلة خليجية محبوبة جدًا ومميزة بطعمها وبهاراتها. تعتبر وجبة متكاملة، فيها النشويات والبروتين وخضراوات، ومش هتحتاجي جنبها أكتر من سلاطة الدقوس اللذيذة اللي بتتقدم معاها دايمًا في مطاعم الأكل الخليجي. تعتبر وصفة الكبسة من وصفات الحلة الواحدة لأنك فعلًا مش هتحتاجي غير حلة واحدة لطهي الرز والفراخ. وعشان توفري وقتك أكتر، جيبنا لك طريقة عمل الكبسة بأوراك الفراخ المخلية، وده لأن الأوراك ليها ميزتين في الوصفة دي: أولًا إنها سريعة في طبخها، وثانيًا إن فيها نسبة دهون، وده بيحافظ على طراوتها لما تتطبخ مع الرز.
مقادير كبسة الدجاج
- ½ كيلو أوراك الدجاج مخلية من الجلد والعظم
- 2 كوب رز بسمتي مغسول ومنقوع 30 دقيقة
- 1 معلقة كبيرة معجون الطماطم
- 2 معلقة صغيرة بهارات الكبسة
- 3 عود قرنفل
- 2 حبة لومي (ليمون أسود)
- 4 حبات حبهان
- 1 عود قرفة
- 3 ورق لورا
- 2 معلقة صغيرة كركم
- 1 معلقة صغيرة قرفة ناعمة
- 1 قرن فلفل أحمر حار
- 1 ثمرة فلفل أخضر مقطعة مكعبات
- 2 ثمرة طماطم مقطعة مكعبات صغيرة
- 1 بصلة كبيرة مقطعة جوانح
- ملح وفلفل أسود
- سمنة وزيت نباتي
- 4 كوب مرقة دجاج
للدقوس هتحتاجي
- 5 ثمرات طماطم مبشورة
- 1 ثمرة فلفل حار (حسب الرغبة)
- 1 ثمرة فلفل أخضر
- عصير ليمون
- ملح وفلفل
- ¼ معلقة صغيرة قرفة ناعمة
- زيت نباتي
طريقة عمل كبسة الدجاج
- في حلة واسعة، سخني الزيت والزبدة وضيفي ليهم البهارات السليمة وحمصيها لحد ما تظهر ريحتها.
- ضيفي قطع الدجاج وحمريها لحد ما توصلي للون دهبي وبعدين ضيفي باقي البهارات.
- ضيفي البصل والفلفل الحار والفلفل الأخضر ومعجون الطماطم ومكعبات الطماطم وقلبيهم مع بعض كويس وبعدين ضيفي مرقة الدجاج المغلية.
- غطي الحلة وسيبي المذاقات تندمج مع بعضها لمدة 10 دقايق وبعدين ضيفي الرز البسمتي.
- أول ما يبدأ الرز يتشرب المرقة، وطي النار تمامًا لحد ما تستوي الكبسة.
- أثناء التسوية، جهزي الدقوس بأنك تخلطي كل مكوناتها في محضرة الطعام، ما عدا الطماطم المبشورة وبعدين تضيفي المزيج ده للطماطم وسيبيها في التلاجة نص ساعة على الأقل.
- قدمي الكبسة وزينيها بالزبيب والبقدونس وتقدري تضيفي لها أي نوع مكسرات تحبيه أو حبوب رمان للمسة مميزة وقدمي جنبها الدقوس.
وبكده نكون قدمنا لك طريقة عمل كبسة الدجاج بأسهل وأسرع طريقة، قدميها لعيلتك ويهمنا دايمًا نعرف رأيك.
What’s your Reaction?
1 comment
[…] كبسة الدجاج: ودي بتحتاج ½ كيلو أوراك الدجاج مخلية من الجلد والعظم. […]