من أحلى وأمتع لحظات نهار العيد، هي اللحظة إلي بنرجع فيها من صلاة العيد ونحضر صينية الشاي باللبن، وطبق الكحك البيتي الدايب الجميل المعمول من صنع إيدين الأمهات أو الجدات. لحظة كده بيقف عندها الوقت وبتقف عندها كل حسابات الكالوريز، حتى الكلام بيعجز عن وصف فرحة الواحد بأول كحكاية وأول كوباية شاي في أول يوم العيد!
المصدر: womenofegyptmag
طريقة عمل كحك العيد الناعم الدايب دوب، بتختلف عليها الستات والأمهات كل سنة قبل عيد الفطر، إلي تقول لازم السمنة تكون في حرارة الغرفة، والي تقولك لازم تكون مقدوحة على النار وبتغلي، لكل ست أسرارها وتكاتها إلي بتخلي الكحك بتاعها مختلف ومميز.
لو بتحبي تسقّي مع الشاي، ادخلي هنا عشان تعرفي طريقة عمل بسكويت النشادر
أهم حاجة في طريقة عمل الكحك، واللي ما بيختلفش عليها اتنين، هي نوع السمنة ونوع الدقيق. عشان يكون الكحك ناجح وطعمه وريحته يجننوا، لازم تستخدمي نوع سمن فاخر ومن مصدر موثوق، وبالنسبة للدقيق لازم تستخدمي الدقيق المخصص لعمل الكحك والبسكويت، لإنه بيكون قليل الجلوتين وده بيساعد إن الكحك بتاعك يكون دايب جدًا معاكي، والأنواع دي بقت متوفرة في الأسواق في أكتر من ماركة وشركة.
لو ليكي في الغريبة، إدخلي هنا عشان تعرفي طريقة عمل الغريبة لشيف منال العالم
النهاردة جيبنالك طريقة عمل كحك العيد الناعم الدايب على طريقة شيف سالي فؤاد بنتمنى تجربيها وتعجبك.
مقادير الكحك الناعم (على طريقة شيف سالي فؤاد)
- 250 جم سمن
- 400 جم دقيق فاخر (3 كوبايات)
- 80 جم نشا الذرة (1/3 كوب)
- 1 معلقة كبيرة ريحة الكحك
- 1 معلقة كبيرة سمسم محمص
- 1 معلقة صغيرة خميرة
- 1 معلقة صغيرة سكر
- 4 معالق كبيرة ماء
- رشة ملح
الطريقة:
- في بولة كبيرة تتحمل الحرارة، إخلطي الدقيق والنشا.
- ضيفي الخميرة والسكر لكمية الماء واتركيهم جانبًا.
- في كاسرولة على النار قومي بتسخين السمنة لحد ما تقدح تمامًا.
- قومي بعمل فجوة في نص مزيج الدقيق والنشا، وضيفي السمسم، ريحة الكحك، وصبي فوقهم السمن المقدوح، وقلبي بإستخدام معلقة خشبية.
- ضيفي مزيج الماء مع الخميرة والسكر على المزيج وقلبي كويس لحد ما تتجانس العجينة تمامًا.
- قومي بتشكيل العجينة مباشرة بعد خلطها، بشكل كرات وقومي بنقشها بالمنقاش أو بصامة الكحك.
- يخبز الكحك في فرن متسخن على حرارة 200 درجة، لحد ما يوصل للون خارجي ذهبي خفيف لإضافة طعم التحميصة للكحك.
- بعد ما يبرد تمامٌا يرش بالسكر البودرة ويقدم، أو يحفظ في علب محكمة الغلق.
ودي بقى مقادير الكحك الناعم بالكوب، وبكيلو واحد من الدقيق بدل الجرامات:
- ٣ كوب مملوء سمن
- ١ كيلو دقيق يفضل نوع فاخر
- 1 1/2 كوب مملوء نشا
- ٢ معلقة كبيرة ريحة كحك
- ٥ معلقة كبيرة سمسم
- ١ معلقة كبيرة خميرة
- ١ معلقة كبيرة سكر
- نصف كوب ماء فاتر
- رشة ملح
ادخلي هنا عشان تعرفي طريقة عمل البيتيفور
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
التعليق باستخدام حساب فيس بوك