فيه أكلات كده باسمّيها الأكلات النينجا، أكلات مش بتاخد لا وقت ولا مجهود في التحضير ومناسبة للميزانية وكمان فيها عناصر مغذية مفيدة ليكي ولولادك. ومن الأكلات النينجا دي اللي بحب أعملها لو ما عنديش وقت أحضر ولّا مفرهدة من تعب الحر والولاد وعايزة أنجز هي الكشري الإسكندراني. الكشري الإسكندراني مفيد للولاد عشان مليان عدس ولازم يتعمل جنبه بيض. فبكده إنتي قدمتي لولادك حصة بروتين ونشويات مفيدة وكمان لو إنتي بتتبعي نظام دايت نباتي فالكشري الإسكندراني اختيار مناسب جدًا. وفي الموضوع ده هنقول لك على وصفة سهلة وسريعة لعمل الكشري الإسكندراني.
طريقة عمل الكشري الإسكندراني
مقادير الكشري الإسكندراني
- 2 كوب من الرز المصري.
- 1 كوب من العدس الأصفر.
- 1 بصلة كبيرة متقطعة شرايح صغيرة.
- معلقة كبيرة من التوم المفروم.
- سمنة وزيت.
- حوالي 2 كوب من الشوربة.
- ملح وفلفل.
- رشة كمون.
- بيض.
أكلات شعبية مصرية: طريقة عمل الكشري المصري
طريقة عمل كشري اسكندراني
- اغسلي الرز والعدس كويس وصفيهم.
- قطّعي البصلة مكعبات صغيرة الحجم.
- في الحلة، على النار، ضيفي السمنة والزيت وحطي عليهم البصل لحد ما ياخد لون.
- ضيفي التوم على البصل وقلبي لحد تبتدي ريحته تظهر.
- ضيفي الرز والعدس على البصل والتوم وشوحيهم كويس.
- ضيفي الملح ورشة صغيرة من الفلفل والكمون وقلبي كويس.
- ضيفي الشوربة ولو مش عندك شوربة ضيفي ميه مغليه وماتغطيش الرز كتير غطيه بحاجة بسيطة علشان مايعجنش منك.
- سيبي الرز والعدس يغلي وبعدين وطي النار عليه لحد ما يستوي.
- في وقت طبخ الرز والعدس اسلقي البيض.
- قشري البيض بعد ما يتسلق وحطي شوية زيدة في طاسة ودحرجيه لحد ما ياخد لون.
طريقة عمل الكبيبة .. الشامية بالبرغل والمصرية بالأرز
طرق مختلفة لأكل الكشري الأصفر
- فيه طريقتين لأكل الكشري الأصفر، أول طريقة جنب البيض المدحرج أو البيض المسلوق العادي.
- تاني طريقة هي الرز والعدس وجنبه الصلصة زي صلصة الكشري العادي.
- قدمي الكشري الإسكندراني مع البيض المدحرج والبطاطس المحمرة.
- من أشهر السلطات اللي بتتاكل جمب الكشري الأصفر هي السلطة الخصرا أو الطماطم بالتوم والطماطم باالتوم طريقتها سهلة وسريعة هتقطعي الطماطم شرايح وتضيفي توم وخل وكزبرة ناشفة وبألف هنا وشفا.
طريقة عمل حمص الشام المصري (الحلبسة) في الشتاء
راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.
What’s your Reaction?
التعليق باستخدام حساب فيس بوك