بحس دايمًا إن البشاميل بيتحط على أي أكلة هيديها طعم وشكل جديد هيحليها. زي مثلا المكرونة بشاميل، برام الرز واللحم المفروم بالبشاميل، البطاطس الجراتان بالخضروات والبشاميل وأخيرًا الكوسة بالبشاميل. بالرغم من فوايد الكوسة الكتيرة جدًا لكن ناس كتير مش بتفضل تاكلها سواء بالدمعة أو سوتيه أو حتى محشية. لكن لو زودتي البشاميل للكوسة، هيضيف ليها طعم تاني خالص في منتهى اللذاذة. لو ولادك مغلبينك ومش بياكلوا كوسة أو نفسك تاكلي الكوسة بشكل جديد، اقري الموضوع ده وهنقول لك على طريقة عمل الكوسة بالبشاميل وبنتمنى وصفتنا تعجبك 🙂
طريقة عمل الكوسة بالبشاميل
مقادير الكوسة بالبشاميل
- كيلو كوسة
- نصف كيلو لحمة مفرومة
- عدد ٢ بصلة كبيرة مبشورة
- سمنة وزيت
- ملح وفلفل
- رشة قرفة
- رشة جوزة الطيب
- لتر لبن
- ٤ معالق كبيرة دقيق أبيض
- عبوة صغيرة من الكريمة اللباني
- جبن موتزاريلا للزينة (اختياري)
هنا أحلى طريقة عمل المكرونة بالبشاميل
طريقة عمل الكوسة بالبشاميل
- هاتي حلة وحطي فيها شوية سمنة وزيت شوحي فيها البصل المبشور وقلبيه لحد ما ياخد لون دهبي.
- حطي اللحم المفروم على البصل وقلبي كويس وضيفي ليهم الملح والفلفل ورشة القرفة ورشة جوزة الطيب.
- عصجي اللحم كويس واطفي النار عليها.
- اغسلي الكوسة كويس أوي وقشريها وصفيها.
- بعد ما الكوسة تتصفى قطعيها قطع مدورة أو شرايح طويلة على حسب رغبتك.
- في نفس الحلة حطي شوية سمنة تانيين وشوحي الكوسة.
طريقة عمل البشاميل .. وأحلى 5 أكلات بالبشاميل
طريقة تحضير البشاميل
- هاتي حلة جديدة وحطي فيها السمنة أو الزبدة ومعاهم شوية زيت وحطي فيها الدقيق وقلبي كويس لحد ما الدقيق يتحول لونه للأصفر.
- حطي لتر اللبن بشكل تدريجي لحد ما يبقى قوامه كويس ومش مكلكع.
- ضيفي الملح والفلفل ورشة جوزة الطيب وافضلي قلبي.
- ضيفي معاهم الكريمة اللباني وقلبي كويس وسيبيهم عشر دقايق يغلوا مع بعض.
- هاتي صينية بايركس وادهنيها بشوية سمنة.
- حطي طبقة بشاميل رفيعة وبعدين كوسة وبعدين بشاميل.
- حطي اللحم المفروم وعليها طبقة كوسة.
- حطي البشاميل على الوجه وضيفي عليه طبقة من الموتزاريلا لو تحبي.
لو البشاميل كلكع منك، ممكن تضربيه بالهاند بليندر أو تصفيه، قدمي الكوسة بالبشاميل ومعاها رز أبيض وسلطة خضرا وبألف هنا وشفا.
طريقة عمل القلقاس بالسلق وبالصلصة
التعليق باستخدام حساب فيس بوك