ما أقدرش أنسى أبدًا أمي وجدتي وهم بيحضروا الأكلة دي، كنت باحس إن فيه حدث كبير بيحصل في البيت، والموضوع كله مجرد ملوخية بالأرانب. وبتوصل الحفلة دي لأحلى فقرة فيها لما ريحة طشّتها تملا البيت كله، هي وريحة السمنة البلدي وأمي بتحمر فيها الأرانب، كنت باحس إن خلاص الجوع وصل لقمته، وإن الفرعون الصغير جاهز للاحتفال.
اتفقنا أو اختلفنا على حب الأرانب، بس هي مش واخدة حقها على الساحة، مع إن لحمها فعلًا خفيف جدًا وسهل الهضم وشوربتها صحية وخفيفة. النهارده، هاقول لكم على طريقة عمل الوجبة المفرحة لأطفال مصر كلهم: الملوخية، بس بالأرانب. الأرانب كانت أول نوع بروتين أدخّله لابني، وده لإن حقيقي مميزاتها كتير قوي، زي ما قلنا وخفيفة على معدة الأطفال. ولإن اللي كان بيحصل أيام أمي وجدتي من غسيل وتنشيف، وتقطيف، وتخريط بقى يعتبر عملية مرهقة لجيلنا من الأمهات، هنستخدم النهارده الاختراع العبقري الموجود في فريزر أي أم: كيس الملوخية المجمدة، أنا متأكدة مفيش أم فيكي يا مصر ما عندهاش كيس ملوخية قابع في أعماق الفريزر.
المصدر egypteyetour
المقادير
لعمل الأرانب المسلوقة
- 1 أرانب مقطعة (الجزار هيقوم بالخطوة دي)
- 1 بصلة كبيرة مقطعة أرباع
- 1 جزرة صغيرة مقطعة
- 1/4 كوب كرفس مفروم
- 4 فصوص حبهان
- 3 ورقات لورا
- ملح وفلفل أسود
- 1/2 معلقة صغيرة جوزة الطيب
- ماء مغلي
- زبدة
لعمل الملوخية
- 400 جم ملوخية مجمدة
- حوالي 3 أكواب من مرقة الأرانب
- 6 فصوص توم كبيرة
- 2 معلقة صغيرة كسبرة ناشفة
- ملح
- سمنة بلدي أو زبدة
طريقة عمل الملوخية بالأرانب
لسلق الأرانب
- تبلي الأرانب بالملح والفلفل وجوزة الطيب.
- في حلة كبيرة على النار، شوّحي الأرانب في معلقة من الزبدة على نار متوسطة مع إضافة الحبهان واللورا أثناء التشويح.
- أول ما يبدأ لون الأرانب يتغير، ضيفي الخضروات: البصل، الجزر، والكرفس وقلبي كل المكونات مع بعض.
- ضيفي الماء بكمية تغمر الأرانب تمامًا، غطي الحلة وسيبي المرقة لحد ما توصل للغليان، بعدها هدّي النار بحيث يكون الغليان بطيء، وتستوي الأرانب كويس، ويفضل لحمها طري جدًا.
- اختبري تسوية الأرانب بإنك تغرزي السكينة في قطعة سميكة، وتدخل بسهولة في لحمة الأرانب، هي هتحتاج مش أقل من 45 دقيقة حسب وزن الأرنب.
- انشلي قطع الأرانب من المرقة وصفيها وسيبيها على جنب لحين الاستخدام.
لتجهيز الملوخية
- جهزي كيس الملوخية بإنك تفكيه في المايكروويف أو تسيبيه يفك في حرارة الغرفة بمدة كافية قبل التحضير.
- في هون خشب أو رخام، (ودي طريقة جدتي التقليدية)، دقي التوم مع معلقة صغيرة من الملح لحد ما ينعم، وبعدين ضيفي الكسبرة الناشفة، ودقي كله مع بعضه في الهون لحد ما يشكلوا معجون، سيبيه على جنب لحد ما تقرب الملوخية تجهز.
- في حلة على النار، ضيفي كوبين من مرقة الأرانب، وسيبيهم لحد ما يوصلوا للغليان.
- ضيفي الملوخية وباستخدام مضرب سلك قلبي كويس لحد ما تندمج تماما مع المرقة.
- اظبطي قوام الملوخية بباقي المرقة، عشان كده دايمًا ابدأي بكمية مرقة قليلة لإنه من السهل إنك تزودي مرقة عشان تخفّي القوام، لكن لو كان القوام خفيف من البداية هيكون صعب تظبيطه.
- في طاسة على النار، هتضيفي معلقة كبيرة من السمنة أو الزبدة وتشوحي التقلية لحد ما يبقى لونها ذهبي وتملا ريحتها المكان.
- أول ما تقرب الملوخية تغلي، ضيفي بسرعة التقلية (مع الشهقة الشهيرة) واطفي النار فورًا.
- قدمي الملوخية سخنة جدًا مع قطع الأرانب الكاملة، أو تقدري تخليها من اللحم وتضيفي لحم الأرانب جوه طبق الملوخية، وألف هنا.
التعليق باستخدام حساب فيس بوك