من أكتر الأكلات المحبوبة في مصر، خصوصًا في عيد الأضحى الممبار. وعلاقتنا مع الممبار بتثبت احنا قد إيه ممكن نتسامح مع الماضي لو الحاضر كان جميل 😀 بس عشان نتسامح مع الماضي، ونغفره، لازم ما يبقاش فيه أي آثار منه على الحاضر. عشان كده، هنقول لك طريقة تنظيف ممبار هتنسي الممبار شخصيًا هو كان إيه قبل كده! وبعدها هنقول لك طريقة عمل الممبار اللذيذ.
يا سلام على الريش الضاني وهي خارجة من الفرن ريحتها تجنن.. اعرفي 3 طرق للريش من هنا
طريقة تنظيف الممبار
هاقول لك طريقة سهلة وسريعة جدًا. أهم حاجة إنك في الأول تتأكدي إن الممبار من جوا نضيف، ده من قبل ما نبدأ كده. المفروض الجزار هيكون نضفه كويس من أي مخلفات فيه. وزيادة تأكيد حطي أول جزء في الممبار عند الحنفية ونزلي ميا تمشي فيه بطوله. انقعي الممبار لمدة ساعتين في ميا وخل وملح ودقيق لضمان التخلص من أي شوائب. بعدها، اشطفيه كويس وانقعيه تاني في ميا وخل. بعد كده، اعملي الخطوات الجاية.
اعرفي هنا أشهر أكلات عيد الأضحى وطريقة عملها.
- لو فيه أي دهون بيضا من برا اقطعيها بسكينة حامية وخدي بالك إن السكينة ما تقطعش الممبارة نفسها.
- قطعي الممبار لأجزاء أصغر عشان التعامل معاه يكون أسهل.
- بسكينة حادة، اكشطي الطبقة الخارجية للممبار لحد ما تتشال تمامًا.
- اشطفي الممبار كويس وحطيه في ميا وخل وملح ودقيق وافضلي افركيه بها.
- اشطفي الممبار تاني من الميا دي، واقلبيه (الوش اللي جوا يبقى بره) تحت الحنفية.
- كرري الخطوات كلها بالترتيب مع الوش ده.
عيد الأضحى يعني فتة! اعرفي من هنا طريقة عمل الفتة
طريقة عمل الممبار
المقادير الكافية لكيلو ممبار
- 1 كيلو رز منقوع
- كيلو بصل مفروم ناعم
- كيلو طماطم مفروم ناعم
- كوب شبت متقطع صغير
- كوباية بقدونس متقطع صغير
- كوباية كزبرة متقطعة صغير
- راس توم
- فلفلتين رومي كبار متقطعين ناعم
- قرن فلفل حامي متقطع ناعم (اختياري)
- ملح وفلفل أسود
- معلقة كمون مطحون
- نص كباية زيت
- معلقة شطة (اختياري)
- ورقتين لورا
- عود كرفس
- زيت قلي
الممبار يحلى مع الكبدة، اعرفي ازاي تعملي كبدة زي اللي بتاكليها عند البرنس من هنا.
طريقة العمل
- اخلطي كل مقادير الحشوة زي ما بتعملي تخديعة المحشي.
- قطعي الممبار بالتساوي على قد طول صباع.
- احشي كل قطعة بالحشو بس خدي بالك ما تكبسيهاش بالحشو عشان أثناء التسوية ممكن تفرقع.
- في حلة كبيرة مليانة ميا مغلية، وبصل وتوم وكرفس وورق لورى وطماطم، حطي الممبار المحشي لمدة 5 دقايق عشان يستوي.
- اتأكدي إن الرز استوى بإنك تضغطي على الممبار برفق.
- سخني زيت للقلي
- اقلي الممبار لحد ما يبقى لونه دهبي.
وبالهنا والشفا، وكل سنة وانتي وأسرتك طيبين.
التعليق باستخدام حساب فيس بوك