محتويات المقال
الحكاية بدأت لما الجو ابتدى يبقى حر شوية، الناس على التيك توك والفيسبوك بيتكلموا عن حلو جديد وغريب أول مرة يدوقوه وإزاي وقعوا في حبه وغرامه من أول قطمة والحلو ده فجأة بقى تريند وكل الناس هتتجنن وتجربه.. الحلو ده هو الموتشي وزي ما اسمه غريب سعره أغرب وبعد بحث طويل عن الأماكن اللي بتبيعه لقيت إن سعره عالي جدًا مقارنة بحجمه اللي بيبقى قد الكرة الصغيرة في كف الإيد وتقريبًا سعر القطعة بيتراوح بين الـ30 لـ 60 جنيه. فالأوفر نقول لك طريقة عمل الموتشي الكوري.
طيب إيه هو الموتشي ده؟
الموتشي عبارة عن أكلة حلوة كورية وفيه أقاويل بتقول إنها أكلة يابانية مش هنختلف كتير كلها شكليات D: وهناك بيتاكل كسناك علشان يمدهم بالطاقة وهناك بتتعمل من الفاصوليا الحمراء الكورية أو عجينة الرز وهو عبارة عن عجينة ملونة محشية آيس كريم.. وبما إن سعره غالي شوية وكمان مش منتشر قوي في مصر هنقول لك على طريقته في الموضوع ده.
طريقة عمل أيس كريم مانجو على طريقة سالي فؤاد
طريقة عمل الموتشي الكوري
مقادير الموتشي
- كوب دقيق رز.
- كوب مياه.
- ربع كوب سكر.
- آيس كريم نكهات مختلفة فانيليا، شوكولاتة، فراولة..
- ألوان طعام صحية مختلفة.
طريقة التحضير
- هاتي ورق الكب كيك وحطي فيه بولات الآيس كريم وشكليها على شكل كورة ودخليها الفريزر.
- هاتي طبق بيدخل الميكرويف وحطي فيه دقيق الرز والميه والسكر واخلطيهم مع بعض كويس.
- لفي الطبق بكلينج فيلم وخرميه بالسكينة كذا خرم.
- حطيه في الميكرويف دقيقتين وكل 30 ثانية افتحي قلبي الخليط.
- قسمي العجينة كذا قطعة وحطي عليها ألوان الطعام وقلبي.
- ضيفي شوية نشا على الرخامة وافردي العجينة.
- حطي كورات الآيس كريم في العجينة ولفيها على بعض وحطيها في الفريزر لمدة ساعتين.
- طلعيها من الفريزر وقدميها مجمدة وبألف هنا وشفا.
لو عجبتك الوصفة وجربتيها شاركينا في كومنت برأيك وبألف هنا وشفا 🙂
طريقة عمل الآيس كريم بدون ماكينة في البيت
التعليق باستخدام حساب فيس بوك