عيد الحب أو الفلانتين خلاص على الأبواب، كتير بيحتفلوا بيه وكتير بيشوفوا إنه مالوش لازمة وخصوصًا الأمهات المطحونين ما بين شغل البيت وتربية الأولاد ومسؤوليات الحياة الكتيرة اللي واخدانا كلنا. أنا بصراحة باشوف إننا المفروض نتلكك لأي مناسبة ظريفة سعيدة ونحاول نعمل شوية تغيير ولو بسيط عشان إحنا بنبقى فعلًا محتاجينه جدًا. يعني مش هنخسر حاجة أبدًا لو عملنا عشوة لطيفة أو زيّننا سفرتنا بشوية ورد أو طلعنا الأطباق الحلوة اللي بنشيلها للضيوف! ويا سلام لو عملنا صنف حلو كده أنيق وبسيط نحلّي بيه بعد العشوة الجميلة.
النهارده اختارت لكم المولتن كيك، مش بس لإنها لذيذة لكن كمان عشان فعلًا حلى سهلة جدًا ومش هتكون مرهقة لكي في عملها. هنقولك طريقة عمل المولتن كيك خطوة بخطوة، اعمليها وفرّحي بيها جوزك وأولادك برضه. ممكن نحتفل بالفلانتين كعيلة، مش شرط بس زوج وزوجة. دي فرصة حلوة جدًا إننا نعلّم ولادنا المعاني الحلوة دي ونعرّفهم إن ممكن بطرق بسيطة نقدر نعبر لبعض عن حبنا.
مقادير المولتن كيك
- 200 جم شوكولاتة خام غامقة
- 60 جم زبدة
- 3 بيضات
- 1/3 كوباية سكر
- 1/3 كوباية دقيق
- 1/4 معلقة صغيرة ملح
- 1/2 معلقة صغيرة بشر برتقان
- 1/2 معلقة فانيليا سايلة
للتزيين تقدري تستخدمي:
- فراولة أو توت
- كريمة مخفوقة أو آيس كريم
- سكر بودرة
طريقة عمل المولتن كيك
- سخني فرنك على درجة حرارة 200 درجة.
- جهزي قوالب فردية لخبز المولتن كيك عن طريق إنك تبطنيها بالزبدة والكاكاو الخام.
- في حمام مائي على النار، سيّحي الشوكولاتة الخام مع الزبدة وسيبيها تبرد شوية.
- في بولة وباستخدام المضرب الكهربائي، اضربي البيض مع السكر والفانيليا وبشر البرتقان على سرعة عالية لمدة ما تقلش عن خمس دقايق لحد ما الحجم يتضاعف ولون الخليط يفتح والخطوة دي مهمة جدًا لنجاح المولتن كيك.
- هتضيفي الشوكولاتة والزبدة بعد ما درجة حرارتهم تنزل شوية لخليط البيض بحذر وتقلبي بخفة باستخدام سباتولا أو معلقة خشب عشان ما تخرجيش الهوا من البيض.
- باستخدام مصفاة هتنخلي الدقيق والملح فوق الخليط السابق وتقلبي بخفة برضه باستخدام سباتولا أو معلقة خشب لحد ما يختلط كل الدقيق مع باقي المقادير، وما تبالغيش في التقليب.
- صبّي خليط المولتن كيك في القوالب اللي حضرتيها واخبزيها في الفرن المتسخن لمدة تتراوح ما بين 10 دقايق لربع ساعة والمدة هتختلف حسب حجم القوالب وحسب طبيعة فرنك، المهم إنك لازم تراقبيها كويس لحد ما تلاقي أطرافها جمدت بس في النص لسه طرية، كدة تكون جهزت.
- قدّميها فورًا بعد ما تطلع من الفرن عشان تضمني إنها سايلة من النص وقدمي معاها فواكه أو كريمة أو آيس كريم ورشة سكر بودرة.
ممكن كمان تجربي طريقة عمل الكريب .. وصفة لذيذة يحبها الأطفال هنا
ملحوظة مهمة
لو المولتن كيك ما اتقدمتش فورا بعد خروجها من الفرن أو لو استوت بزيادة، مش هتكون سايحة من النص، بس برضه هيفضل طعمها لذيذ.
جربيها ومش هتندمي أبدًا، كل سنه وانتي طيبة ودايمًا محبوبة من كل اللي حواليكي.
التعليق باستخدام حساب فيس بوك