الأطفال دايمًا بيحبوا الأكل الخفيف زي أكل الـFinger food عشان بيبقى صغير في الحجم وسهل إنهم يمسكوه وكمان كميته قليلة على معدتهم الصغيرة. فيه أطفال ما بتحبش تقعد قدام طبق وتاكل فيه، فبالنسبة للأمهات الأكل من النوع ده هيكون منقذ ليها وقت الغدا، وكمان في وقت تحضير اللانشبوكس. ومن أشهر أنواع الأكلات دي واللي كل الأطفال بتحبها هي الناجتس وهنقول لك على طريقة عمل الناجتس البيتي زي بتاع المحلات بالظبط طريقة سهلة وسريعة مش هتاخد منك وقت.
بالفيديو: طريقة عمل ناجتس البطاطس والبروكلي
الناجتس في البيت خطوة بخطوة
مقادير الناجتس البيتي
- نص كيلو صدور أو أوراك فراخ حسب المتوفر عندك.
- ملح وفلفل حوالي معلقة صغيرة لكل منهم.
- نص معلقة صغيرة توم باودر.
- تص معلقة صغيرة بصل باودر.
- رشة بابريكا.
- 4 معالق كبيرة من الدقيق.
- 2 معلقة كبيرة من دقيق الذرة.
- 2 بيضة.
- بقسماط.
إزاي تتخلصي من زفارة الفراخ وتنضفيها كويس
طريقة عمل الناجتس البيتي
- اطحني الفراخ كويس في الكبة لحد ما تحصلي على قوام شبيه بالعجينة.
- ضيفي للفراخ دقيق الذرة والتوابل واخلطيهم كويس أوي مع بعض.
- هاتي قطاعات على أشكال مختلفة زي الدواير والنجوم أو شكليها بإيدك زي ما تحبي.
- اخفقي البيض ورشي عليه شوية فلفل.
- غطسي الناجتس في الدقيق وبعدين حطيه في البيض وبعدين في البقسماط.
- لما تخلصي الكمية كلها دخليها في الفريزر حوالي ساعة عشان تمسك شوية.
- حطي الناجتس في الزيت عشان تتحمر أو في الآير فراير أو ادهنيها زيت ودخليها الفرن.
طريقة عمل الإكلير .. مش هنخليكي تشتري من برا
ممكن تزودي لولادك خضروات زي الكوسة والجزر والبطاطس لو عايزاها صحية للأطفال ولو ولادك ما بياكلوش خضار هتكون فكرة هايلة ليهم، وممكن تستخدمي بدل البقسماط الكورن فليكس المطحون أو البانكو عشان تكون مقرمشة وبألف هنا وشفا 🙂
التعليق باستخدام حساب فيس بوك