محتويات المقال
يمكن تكون أحلى حاجة في فصل الشتاء هي قعدة البيت في الدفا قدام فيلم لذيذ، تحت غطا ناعم وتقيل وكوباية مشروب دافي تحضنيه بإيديكي الإتنين.

هوت شوكليت – المصدر countrylivingmagazine
وطبعًا مفيش ألذ من الشوكولاتة الساخنة كمشروب دافي، مسكر ولذيذ، أنا شخصيًا باعتبر الهوت شوكليت مش مشروب، بعتبرها صنف حلو بيرضي رغباتي في أكل السكريات خصوصًا في الليالي الشتوية الباردة. في طرق كتير لتحضير مشروب الشوكولاتة الساخنة، بس طريقتنا النهارده متوازنة ومظبوطة جدًا، هنستخدم فيها الكاكاو مع حبيبات الشوكولاتة. الكاكو الخام هيضيف نكهة الشوكولاتة القوية، وحبيبات الشكولاتة هتضيف قوام كريمي رائع للمشروب، أما باقي الإضافات الاختيارية هتكون القرفة بتدي نكهة عميقة للهوت شوكليت والمارشميلو بيدوب على سطح الكوباية، وبيدي نكهة طفولية لذيذة عشان تكتمل المتعة. ياللا جهزي الفيلم وحضري الغطا الناعم، والبسي اللكلوك واستمتعي!
طريقة عمل الشوكولاتة الساخنة

هوت شوكليت – المصدر tasty
المقادير (لشخصين)
- 2 كوب حليب كامل الدسم
- 1/2 كوب حبيبات أو قطع الشوكولاتة (استخدمي الشوكولاتة الداكنة أو بالحليب حسب ذوقك)
- 2 معلقة كبيرة كاكاو خام
- 1/2 كوب كريمة
- 1/4 كوب ماء
- سكر أو عسل للتحلية حسب الرغبة
- عود قرفة
- 1/2 معلقة صغيرة فانيليا
للتقديم
- حبيبات مارشميلو صغيرة
- كريمة مخفوقة
طريقة التحضير
- في كاسرولة أو حلة صغيرة على النار، سخني اللبن والكريمة ومعاهم الفانيليا وعود القرفة لو هتستخدميه على نار متوسطة.
- لما يبدأ اللبن يدفى وقبل ما يوصل للغليان، ضيفي الكاكاو وحبيبات الشوكولاتة وباستخدام مضرب سلك، قلبي كويس على نار هادية لحد ما تذوب كل حبيبات الشوكولاتة ويتجانس قوام المشروب.
- أول ما يغلي المزيج، ارفعيه من على النار وصبيه في المجات وحليه حسب الرغبة بالسكر أو العسل الأبيض.
- زيني الأكواب بالمارشميلو أو الكريمة المخفوقة.
ملحوظة:
لعمل نسخة صحية من مشروب الشكولاتة، استبدلي الحليب كامل الدسم بالحليب خالي الدسم، واستغني عن الكريمة تمامًا، وقللي كمية حبيبات الشكولاتة لربع كوب فقط واستخدمي الشوكولاتة الداكنة، واستخدمي السكر الدايت أو الستيفيا للتحلية.
لو عايزة أكلات شتوية تدفيكي، جربي الأكلات اللي في المقال ده، ولو عايزة مشروبات تانية تدفيكي، شوفي المقالة دي.
التعليق باستخدام حساب فيس بوك