وقت التسنين بيكون من المراحل الصعبة جدًا على الأطفال، مرحلة بتبقى كلها آلام في اللثة والأسنان وقلب المزاج. وفي بعض الأحيان، المناعة بتقل للأسف وممكن الأطفال يلقطوا دور برد. مش بس التسنين بيسبب ألم وقريفة، التسنين كمان بيقلل شهيتهم جدًا للأكل وساعتها بيبقوا مش عايزين ياكلوا خالص. كل اللي بيبقى الطفل بيدوّر عليه هو أي حاجة ناشفة ياكلها أو يعض فيها عشان يقدر ينسى وجع اللثة والسنان. ومن ضمن الحاجات دي هي البسكويت اللي بيبقى محبب جدًا ليهم في الوقت ده. ومن أفضل الحاجات اللي ممكن تقدميها لطفلك في مرحلة التسنين الصعبة دي هي بسكويت التسنين المغذي. وفي الموضوع ده، هنقول لك على وصفات سهلة فيها طريقة عمل بسكويت التسنين للطفل الدارج، هيكون مفيد ومغذي، وفي نفس الوقت هيكون أساسي وهيعجب طفلك في الفترة الصعبة دي.
طريقة عمل بسكويت التسنين للطفل الدارج
الوصفة اللي هنقول لك عليها مناسبة لبعد سن السنة عشان فيها عسل. لو حابة تعمليها لابنك اللي أقل من سن سنة، هتضطري تشيلي منها العسل. ولو ابنك عنده حساسية من أي من المكونات دي، استشيري دكتور الأطفال أولًا قبل ما تقدميه لطفلك.
د. محمد فاروق بيقدم لك الدليل الكامل عن حساسية الطعام
الطريقة الأولى
مقادير بسكويت التسنين
- كوب شوفان مطحون
- 2 موزة
- نص معلقة قرفة
- معلقة كبيرة عسل
- 2 معلقة زيت جوز هند
طريقة عمل بسكويت التسنين
- هاتي الموز واهرسيه كويس في الكبة وحطي معاه العسل والقرفة والزيت والشوفان.
- اضربي المكونات كويس قوي مع بعض لحد ما توصلي لقوام متجانس.
- هاتي صينية وافردي فيها المكونات مع بعض وقطعيها أشكال مختلفة بالقطاعة.
- دخليه الفرن على درحة حرارة 180 لمدة نص ساعة تقريبًا أو أقل.
علامات التسنين عند الأطفال وطرق تخفيف الألم
الطريقة الثانية
مقادير بسكوت التسنين
- نص كوب من الجزر.
- نص كوب من الزبيب.
- كوب من الشوفان المطحون.
- معلقتين من زيت الجوز الهند.
- نص معلقة من القرفة.
- ربع معلقة من جوزة الطيب.
- معلقة صغيرة من العسل.
- كوب من المياه.
طريقة عمل بسكوت التسنين
- اسلقي الجزر في ربع كوب من المياه لحد ما يطرى.
- اغلي مياه وحطي فيها الزبيب لمدة عشر دقايق.
- حطي الشوفان المطحون وعليه التوابل وقلّبي.
- هاتي الجزر والزبيب والزيت وقلبي مع بعض كويس وبعدين ضيفيهم على الشوفان والتوابل.
- اخلطيهم كويس في الكبة لحد ما توصلي لقوام متجانس.
- هاتي صينية وافردي فيها البسكوت وقطعيها بقطاعة ودخليها الفرن على درجة حرارة 180 لمدة حوالي نص ساعة.
بعد ما يبرد البسكويت قدميه لطفلك وممكن تشيلي المتبقي في علبة محكمة الغلق ولو عايزة كمية ممكن تضاعفي الكمية وتشيليها في الفريزر وتطلعيها وقت الحاجة وبألف هنا وشفا.
أسباب تأخر التسنين عند الأطفال
التعليق باستخدام حساب فيس بوك