بسكويت الجنزبيل من أحلى وصفات الكريسماس، فهو بسكوتة مليانة بهارات شتوية متشكلة بأشكال لذيذة ومتزينة بالآيسينج أو عجينة السكر. مبهجة وكل الأطفال بقوا بيحبوها ويطلبوها بعد ما بقت موجودة بشكل كبير في المحلات في فترة الكريسماس والأعياد.
النوع ده من الكوكيز أساسي في طعمها الجنزبيل إلى جانب بهارات تانية دافية ولذيذة زي القرنفل والقرفة وجوزة الطيب وأحيانًا الينسون والحبهان كمان. بتتشكل بقطاعات بأشكال متعددة أشهرها راجل الجنزبيل أو gingerbread man وتتزين بالآيسينج أو الشوكولاتة أو حتى عجينة السكر. النهارده، جيبنا لك وصفة سهلة جدًا طريقة عمل بسكويت الجنزبيل ومقاديره متوفرة في كل بيت. تقدري تفرحي بيها ولادك وتخلّيهم يعملوها معاكي ويزينوها على ذوقهم وتبقى ذكريات حلوة تنهي بيها السنة ولادك دايمًا هيفتكروا الأوقات الحلوة اللي قضيتوها سوا بتعملوا حاجة بإيديكم.
مقادير بسكويت الجنزبيل
3 كوب دقيق
2/3 كوب عسل إسود
1 بيضة
2 معلقة صغيرة جنزبيل
1 معلقة صغيرة قرفة
½ معلقة صغيرة جوزة الطيب
½ معلقة صغيرة سبع بهارات (اختياري)
½ كوب سكر بني
1 معلقة صغيرة بيكاربونات الصوديوم
100 جم زبدة في حرارة الغرفة
خطوات عمل الآيسينج
1 كوب سكر بودرة منخول
2 معلقة كبيرة لبن
½ معلقة فانيليا سايلة
1 معلقة كبيرة شراب الذرة (ممكن يستبدل بعسل أبيض أو شربات تقيل)
ألوان طعام جيل (حسب الرغبة)
طريقة عمل بسكويت الجنزبيل
– في بولة، اخلطي المكونات الجافة مع بعض باستخدام مضرب سلك.
– في العجان، استخدمي أداة الكف paddle attachment واضربي الزبدة مع السكر البني لحد ما يخف قوام الزبدة ويفتح لونها.
– ضيفي البيضة والعسل الأسود واخلطي كويس قبل ما تضيفي خليط المكونات الجافة على دفعات على سرعة بطيئة.
– جمعي العجينة بإيدك وقسميها نصين لسهولة فردها بعد كده وغلفيها كويس وسيبيها في التلاجة ترتاح ساعة على الأقل.
– سخني الفرن على درجة حرارة 180.
– بعد ما ترتاح العجينة، رشي سطح الكاونتر بالدقيق وافردي كل قسم من العجينة بسمك تقريبًا 1 سم.
– باستخدام القطاعات اللي تفضليها، قطّعي العجينة وارفعيها بحرص عشان ما تغيريش شكلها وانقليها لصينية الخبز وسيبي بينها مسافات عشان حجمها بيزيد نسبيًا بعد الخبز.
– اخبزي الكوكيز لمدة من 8-10 دقايق حسب سمكها وحسب الفرن لحد ما حروفها تبدأ تحمر بشكل بسيط.
– اخلطي مكونات الآيسينج كلها مع بعض وصبيه في كيس حلواني واستخدمي أكياس الاستعمال الواحد. قصّي بالمقص كيس الحلواني لعمل فتحة صغيرة جدًا عشان يخرج منها الآيسينج للتزيين.
– زيني الكوكيز زي الصورة أو بالطريقة اللي تحبيها ويحبوها ولادك وتقدري تضيفي الألوان للآيسينج زي ما تحبي.
