محتويات المقال
من استمرار قعدتنا في البيت بسبب فيروس كورونا وخوفنا من إننا نجيب أكل من بره بقى الاعتماد الكلي في التلات وجبات على البيت، ولإن الأكل من أكتر الحاجات اللي بنرفه بيها عن نفسنا ونطلع فيها الزهق والملل من روتين قعدة البيت اتحولت كل ستات وأمهات مصر لشيفات في مطابخ البيوت مطلوب مننا نطبخ بإيدينا كل ما لذ و طاب: الفراخ المقرمشة والبيتزا البيتي والبرجر بيج تيستي والسينابون والكيك واللي زاد و غطا بقى بسكوت العشر دقايق!
المصدر: youtube – بسكوت العشر دقايق
فجأة لقيت فيسبوك كله ما لهوش سيرة غيره. كل ما بافتح الفيسبوك أشوفه قدامي، أشكال وألوان اللي بالفانيليا واللي بالشوكولاتة واللي متذوق واللي متنقرش ومفيش ست فيكي يا بلد إلّا وعلى تليفونها سكرين شوت لوصفة بسكوت العشر دقايق. هو إيه أصلًا بسكوت العشر دقايق وإيه حكايته وليه سَمّوه كده؟
المصدر: youtube – بسكوت العشر دقايق
بصراحة فضلت وراه أدوّر على كل جروبات الأكل والطبخ عشان أعرف أصله وفصله ومين أول حد ابتكره، لقيت إني بادوّر على نقطة في بحر، وإن دمه تفرق بين القبائل وما قدرتش أوصل لأول حد ابتكر الوصفة دي. لكن كل اللي وصلت له إنه سبب شهرة البسكوت ده إن مكوناته بسيطة جدًا، اقتصادية، ومتوفره في أغلب البيوت المصرية: بيض، سكر، دقيق، بيكينج بودر، وزيت أو زبدة: مفيش أبسط من كده!
غير كده كمان مش هتحتاجي عشان تعمليه أكتر من بولة ومعلقة لتقليب العجينة يعني مالكيش حجة إنك ما تعمليهوش يا ست الكل. سر تسميته ببسكوت العشر دقايق هو إنه فعلًا سريع جدًا في إعداده وما بياخدش أكتر من عشر دقايق، وكمان وقت خبزه قليل جدًا يمكن برضه عشر دقايق، ومش محتاج منك أي مهارة حتى لو أول مرة تعملي حلويات في حياتك.
اتفننت الستات في عمايله – ما احنا فاضيين بقى وعاوزين نفرّح الأطفال ونبسطهم – وابتكروا طرق متنوعة لتشكيله وتزيينه وزودوا له كاكاو وغطسوه في الشوكولاتة السايحة. دول حتى ما كفاهمش كده، عملوا منه نسخة حادقة! كل ست وصلت عندها الوصفة حطت التاتش بتاعها وعملت بسكوت العشر دقايق بإمضائها هي شخصيًا. كم أنتِ عظيمة أيتها الست المصرية!
ودلوقتي مع الوصفة حبيبة الملايين اللي بقت ترند في كل صفحات وجروبات الأكل على السوشيال ميديا! الوصفة اللي انتشرت في كل البيوت المصرية بشكل أسرع من إنتشار فيروس كورونا نفسه في العالم كله! الوصفة اللي خلت كل ست تطلع قدراتها الخارقة في عمل المخبوزات والكوكيز وخلت الرجالة تدخل المطبخ عشان تعملها!
طريقة عمل بسكوت العشر دقايق
المصدر: youtube – بسكوت العشر دقايق
المقادير
- 1 بيضة
- كوب و نص دقيق
- 1/2 كوباية زيت أو زبدة سايحة (بعض الوصفات بتقول نص زبدة ونص زيت)
- 1/2 كوباية سكر بودرة
- معلقة صغيرة فانيليا (بعض الوصفات بتقول ممكن تحطي بشر برتقان)
- معلقة صغيرة بيكينج بودر
الطريقة
المصدر: youtube – بسكوت العشر دقايق
- في بولة، هتخلطي البيضة مع الفانيليا والزيت أو الزبدة والسكر وتقلبيهم مع بعض كويس باستخدام مضرب سلك أو معلقة عادية.
- هتضيفي الدقيق والبيكينج بودر وتقلبي لحد ما تتشكل العجينه.
- هتقسمي العجينه لكور صغيره وترصيها على صينيه خبز وتشكليها بأي أداة عندك (قطاعات البسكوت/شوكة/ختامة الكحك/سكينة.. أي حاجة هتنفع)
- تقدري تقسمي العجينة قسمين وتزودي معلقة من الكاكاو واللبن لو احتاجتي لعمل نسخة منه بالشوكولاتة.
- اخبزيه في فرن متسخن حرارته 180 لحد ما يستوي وممكن تحمري وشه باستعمال الشواية.
- خلّي بالك البسكوت بيستوي بسرعة جدًا فتابعيه.
وبكده تقدري تركبي الموجة وتواكبي التريند وتعملي أحلى بسكوت، مش مهم البسكوت، المهم قد إيه احنا مبدعين ومتألقين وبنحب نفرّح الولاد ونعمل لهم كل طلباتهم عشان نحسسهم إن كل حاجة كويسة… إيه الزهق ده؟ أما أقوم أعمل بسكوت العشر دقايق!
التعليق باستخدام حساب فيس بوك