بما إننا قاعدين في البيت، وظروف عيد الفطر 2020 هتكون مختلفة عن أي سنة عدت علينا، السنة دي محتاجين نفرح بالعيد وبكل مظاهره وعاداته البسيطة اللي ما كناش مقدرينها زمان. أنا فاكرة واحنا صغيرين كنا دايمًا نعترض ونقول لأهالينا “هو العيد بس قاعدة بلكونة وكحك وبسكويت وشاي؟ احنا مش هنتفسح؟ مش هنخرج ولا هنروح سينما ولا مول؟” .. دلوقتي كل المتاح لنا من مظاهر العيد في ظل الظروف اللي بنمر بيها هي العادات الصغيرة عشان كده، جيبنا لك النهارده طريقة عمل بسكويت النشادر البيتي، اللي له طعم وشكل بيتي خاص غير بسكويت المحلات.
أهم نصيحة أقدر أقدمها لك لعمل بسكويت النشادر هو إنك تمشي على المقادير مظبوط وهتلاحظي إن نسبة النشادر بسيطة جدًا في الوصفة، وده لإن النشادر ليها تأثير قوي جدًا في رفع البسكوت، ولو نسبتها زادت، البسكويت بينفش بشكل مبالغ فيه وبيفقد كل معالمه. هنستخدم في تشكيل البسكوت القمع لإنه متوفر أكتر عند أغلب البيوت وكمان هنستخدم الزبدة وتقدري طبعًا تستبدليها بالسمن لطعم أغنى. المهم إن النوعية تكون محترمة وجودتها عالية سواءً زبدة أو سمن.
مقادير بسكويت النشادر
- 500 جرام دقيق (يفضل المخصص للكحك والبسكوت)
- 250 جرام زبدة في حرارة الغرفة
- 1 وربع كوب سكر بودرة منخول
- 2 بيضة
- 2 مغلف فانيليا
- 1/2 معلقة صغيرة من النشادر
- 75 مل من اللبن الحليب
لإضافة نكهات اختيارية (كل الجاي إضافات اختيارية لإضافة نكهات مختلفة للبسكوت)
- معلقة كبيرة بشر برتقان
- أو معلقة كبيرة جوز هند وروح جوز الهند من العطار
- أو 1 معلقة صغيرة قرفة
- أو معلقة صغيرة حبهان مطحون
طريقة عمل بسكويت النشادر
- باستخدام المضرب الكهربائي، اخفقي الزبدة كويس جدًا لحد ما تنفش ويدخلها الهوا.
- ضيفي السكر البودرة واخفقي مرة تانية كويس لحد ما يفتح لون المزيج والخفق هنا مهم جدًا لهشاشة البسكويت.
- ضيفي البيض واحدة واحدة واخفقي كل بيضة لحد ما تختفي وبعدين ضيفي التانية ومعاهم الفانيليا.
- ذوبي النشادر في كمية اللبن كويس وضيفيها على طول للمزيج واخفقي.
- ضيفي الدقيق بخفة على دفعتين بدون المبالغة في الخفق، بس يمتزج مع المكونات ونبقى جاهزين.
- حطي العجينة في كيس الحلواني واستخدمي البلبلة المخصصة للبسكوت، شكلي البسكوت على صينية مبطنة بورق الزبدة أو مدهونة بمسحة بسيطة من الزيت النباتي.
- اخبزي البسكوت في فرن متسخن على درجة حرارة 160 تقريبًا لمدة 10 دقايق لحد ما الجوانب تحمر بشكل بسيط، تقدري تشغلي الشواية عشان تحمري الوش وتاخدي لون دهبي.
نصائح هامة لعمل بسكويت النشادر
- عند خبز بسكويت العيد، حاولي تفضلي تتابعيه طول مدة الخبز عشان ممكن يغمق منك بسرعة، فالأفضل ما تبعديش من جنب الفرن.
- يفضل الخبز على صواني لونها فاتح زي الألومينيوم لإن الأسطح الغامقة زي التيفال ممكن تلسع البسكويت بسهولة.
- أثناء تشكيل بسكويت العيد، لو الجو كان حر وغير مناسب وقوام العجينة مش متماسك معاكي، يفضل إنك تسيبي العجينة في التلاجة مدة بسيطة لحد ما تتماسك وارجعي كملي تشكيل تاني.
ممكن تشوفي هنا طريقة عمل البيتيفور على طريقة سالي فؤاد
التعليق باستخدام حساب فيس بوك