حلويات شرقية: طريقة عمل بلح الشام

المصريين كلهم بيعشقوا الحلويات الشرقية، مش بس في رمضان لكن في كل الأوقات. في زيارة للجيران، بناخد صينية بسبوسة، وفي تجمع العيلة يوم الجمعة، بناخد صينية كنافة، وفي لمة صحاب، نجيب صينية حلويات شرقية مشكلة مليانة ما لذ وطاب، بنحبها مهما أكلنا تورت وجاتوه، بنحن لها، ويهفنا الغرام عليها وعلى لونها الذهبي وشرباتها المظبوط. بلح الشام واحد من ألذ وأطعم الحلويات الشرقية التي لا تقاوم، وهو للوهلة الأولى يبدو إن تحضيره في البيت إعجاز علمي، لكنه في الحقيقة مش صعب بالمرة ومكوناته سهلة وموجودة في كل بيت.

أهم حاجة في طريقة عمل بلح الشام هي طريقة تسويته إللي ممكن تستغربيها شوية، لكن في الحقيقة هي عامل كبير من عوامل نجاحه. بلح الشام لازم يتقلي في زيت غزير بارد تمامًا، وده إللي بيدي فرصة للعجينة تنتفخ كويس وتستوي من جوه كويس وتكتسب قرمشة خارجية خطيرة، التكنيك جديد شوية بس مهم جدًا لنجاح بلح الشام. تعالي معانا نشوف طريقة تحضير بلح الشام بكل تفاصيلها، طريقة ناجحة ومضمونة لازم تجربيها.

ادخلي على اللينك ده عشان تعرفي طريقة عمل الكنافة بالكريمة

مقادير عمل بلح الشام

• 250 جم دقيق
• 250 جم ماء
• 1/2 كوب زبدة (100 جم)
• 5 بيضات
• 1 معلقة صغيرة سكر
• 1/2 معلقة صغيرة ملح
• 2 كيس فانيليا بودرة
• بشر برتقانة (ناعم جدًا)

مقادير شربات بلح الشام

• 2 كوب ماء
• 3 أكواب سكر
• عصير ليمونة
•  2 كيس فانيليا

طريقة عمل بلح الشام

طريقة عمل بلح الشام – المصدر: cleobuttera

اعرفي هنا بالفيديو: طريقة عمل شربات الحلويات

• لعمل الشربات، ضيفي كل المكونات ما عدا الفانيليا على بعض في حلة وسيبيه لحد الغليان، اطفي النار وضيفي الفانيليا وسيبي الشربات يبرد تمامًا.
• في كسرولة على النار هتضيفي الماء، الزبدة، الملح، والسكر وتسيبيهم لحد ما يوصلوا للغليان.
• ضيفي الدقيق للخليط السابق وقلبي باستخدام معلقة خشب تقليب سريع على نار متوسطة، لحد ما يتشرب الدقيق كل السوائل، ويتجانس الخليط ويترك جوانب الكسرولة.
• في العجان الكهربائي، باستخدام أداة الكف، اضربي خليط الدقيق لحد ما يبرد ويخرج منه البخار (تقدري تقومي بالخطوة دي يدويًا عن طريق التقليب بمعلقة خشب) أهم حاجة يبرد المزيج تمامًا قبل إضافة البيض.
• ضيفي البيض مع الفانيليا وبشر البرتقان، إضافة البيض هتكون واحدة واحدة واخلطي بنفس الأداة بين كل بيضة والتانية لحد ماتختفي تماما في العجينة وتتجانس.
• تترك العجينة ترتاح لمدة 30 دقيقة في حرارة الغرفة.
• توضع العجينة في كيس الحلواني مزود بفوهة بالشكل إللي تفضليه، ونبدأ نشكلها في الزيت الغزير البارد، ونستعين بمقص، أو بسكينة مائدة مدهونة زيت نباتي لتقطيع حبات بلح الشام بسهولة في الزيت.
• ارفعي الزيت على النار بحيث يسخن تدريجيًا، وسيبي بلح الشام لحد ما يتحمر وياخد لون ذهبي.
• ارفعي بلح الشام من الزيت للشربات مباشرة وقلبيه على كل الجهات وارفعيه فورًا.
• قدمي بلح الشام مع رشة من المكسرات إللي تفضليها أو سادة، أو افتحيه بالسكينة واحشيه بالكريمة المخفوقة أو القشطة الطازة.

ادخلي هنا عشان تتعرفي على 6 طرق مختلفة لعمل الكنافة في رمضان

راحة بالي هي منصة لراحة كل أم، انضمي لأكبر وأهم مجتمع دعم للأمهات في مصر هنا. وفري احتياجاتك ومصاريفك اليومية من خلال كارت خصومات راحة بالي هنا. اخسري وزن الحمل والرضاعة وكلي أكل صحي في برنامج رياضي ونظام غذائي متفصل على احتياجاتك هنا.